Karen Ramkulh Ah SAC Ralkap, BGF Le Cobra Phu Kahdohnak Ah SAC Ralbawi Pakhat Telh In 5 An Thi

Karen ramkulh, Myawaddy peng thlanglei Myawaddy-WawLay motor lampi ah SAC ralkap Kha Ma Ya 207 le Cobra phu cu, nizan July 7 ah an i kap i, SAC ralbawi(Captain) pakhat telh in ralkap 5 an thi. Hriamnam tam ngai an chuh hna, tiah Cobra sin in theih a si.

SAC ralkap Tatma 44 kuttang Kha Ma Ya 207, Kha La Ya 8, Kha Ma Ya 204, Kha Ma Ya 9, Kha Ma Ya 102 le BGF ralkap 100 hrawng cu Phalulay-Phalukyi(ဖလူးလေး၊ ဖလူးကြီး) hmun ah an i pum i, Myawaddy-Wawlay lam thluan hmun paoh cu lak dingah an i tim.

SAC ralkap Kha Ma Ya 207 cu Myawaddy-Wawlay lampi hmun ah July 7 ah an phan i, Cobra phu he kahdohnak a chuak. Nihin July 8 zinglei sml 9:00 hrawng ah SAC ralbawi pakhat telh in ralkap ruak 5 kan hmuh hna i, hliamhma pumi an tam, tiah Cobra Phu nih cathanh an chuah.

Kahdoh lio a si caah SAC ralkap a thi mi ruak a zat cu fehter dingah chekhlatnak an tuah cuahmah. SAC ralkap meithal MA-1 zunkhat, kuan 475, kuan bawm 4, bomb lung 1 le a dang ralkap he aa pehtlai mi thilri an chuh hna, tiah theih a si.

Cu pinah SAC ralkap pawl nih nihin July 8 zing sml 4:30 hrawng ah Laykekaw hmun um Cobra phu nih humhimnak an laknak hmun tlang par ah, Vanlawng in an kan kah ko nain Cobra phu cu a thi mi le aa hliammi kan um lo, tiah cathanh an chuah. Credit: The Chin Post

Be the first to comment

Leave a Reply

Your email address will not be published.


*