Kanmah Lo Kan Riahnak i Kan Thilton Mi bak A Si Caah Lih pakhat Hmanh Ai Tel Lo, Rak Ka Share Piak Cio Uh!

Ka pu nih thil khuaruahhar a tonmi hi a mah kho taktak. A tonnak khuale min hi chim a rem lo caah kan rak chim lai lo. Asinain ka pu nih ram tangah a tonmi a tak bak si ti tu cu ka chim khawhmi si.ka pu thil tonmi cu kumkhat cu lo caah ram pakhat an sam i ka thinlung tho lo ngai. A ruang cu a hla tuk i riantuan tha baat hnu i lo lam hlam tuk kal hi cu huat a tlai tuk i ram tang riah peng le si kho fawn lo.

A sinain kum upa deuh nih cun thingsei ram timi cu a ram a that pin ah ramveihnak zongah sakah ding a tam tiin a duh ngaimi zong an um. Hlan deuh ah khan thinsei ram ah hin MNf ralkap le vai ralkap pawl hi fak ngai in an rak i kap cang i MNF ralkap lei a thimi hna zong thingsei ram ah cun an rak phum cang hna .Thingsei ram hi pi tar le pu tar deuh nih cun thawngan theih kong hi an chim sep sep tawn i a ram ah hin ramsa a tlawngmi zong an um ngai i ramvai pawl zong an luhchuah ngainak ram a si. A sinan ram vai i a tlungmi hi cu kut bengh buin a tlungmi hi cu an um loh.

Tu ka rak chim dingmi zong hi thinseiram i ka pu nih a rak tonmi ka pu nih a rak chimh mi kong ka rak chim dingmi si. Ka pu chim bantuk in ka rak chim lai i ka thawh hlanah kan khua tlangau capo duh ngaimi pakhat cu tlang a rak au i tuni ah tlangrian tuannak ah inn khat ah pa simi paoh cu i thawh dih ding a si lai tiah tlang cu a rak au. Ka tho rih lo i tlangau nih cun a ka thangh i tlangriantuan si lai a van ti cun ka huam lo ngai i sinan ka pa nih lo tleihmi zoh ve hauh caah thawh cu ka van i tim i cu vialah cun ka nu nih pate tho cang law tlangrian tuan ding hna si hih a tlai cemah nan chuak hoi sual lai tiah ka nu nih cun a rak ka thangh.

Thaithawh kan van ei khawh cun tlangrian tuanmi i tonnak a tinak hmun ah cun ka meithal keng i kai thawh ve i miral tha tak tiah chimmi cu ka si lo nain keimah tawkah cun ai ti pa ngaimi tih a ngei ve lem lomi ka si. Cu ti cun tlangrian tuan cu kan mak i inn lei tlungding cun buai cio kan si hna. Kei tu cu a tlung colh ding ka si lem lo i kai hnawh lem loh. Ka tlun pahah thingsei ram pawngah hin banhla serthlum tibantuk dum hmun kan ngei i banhla tuk pah ding cu kai tim. Cu tlawmpal cun thingsei ram i kan dum leiah cun kal kai thawh i kan dum he ai neihmi ramah cun zaneh tha taktakmi ka hmuh.

Cu ram cu a hmun hi a chia ngaingai i nikumah khan lo caah an rak samhnak hmu a si. Cu sa neh ka hmuhmi cu ka zulh i a neh a thar tuk caah hla a kal cu ka zum lo i cu tin a neh cu ka zulh. A hnu ah mak ngai i kan dum chunglei ah a neh cu ka hmuh i kan dum i thei pawl a tlanmi a si ko lai hih tiin ka lungtho taktak. Kan dum hi kan khuain km 4 hrawng hla a si. Kan dum chung cu ka phan i kan thlamchungah cun hnangam ngaiin ka lut i ka chuncaw funmi a tangmi cu khin ngaiin ka ei than i kan thlam lengah cun khuacuan pah in ka rak chuak.

Cu lioah cun kan thlam pawng i banhla kung ai hni cuahmah mi cu ka hmuh i tuzaan cu ka hual tha lai hih ttin ka meithal cu ka van i tim colh. Banhla hmu umnak panh cun ka kal colh i banhla hmun umnak ka phak cu banhla kung a cawlmi cu pakhat hmanh a cawl ti lo. A ka hmuh manh le maw si hnga tiin a pawngah cun ka bawh i thawng hmanh ngei lo cun ka hngak. Cu tlawmpal ah cun ka thlangah thawng ka theih i thawng ka theihnak hmun cu mitthep lo cun ka zoh. Cu ti i banhla kunglei thep loin ka zoh ko lioah cun ka ruah lo ning tuk i ka chaklei cun ka u fa pa nih cun aw fiang taktak in ka pute tiah a rak ka uah.

Cu ti a ka uah ah cun ka lau tuk i ka meithal cu zokzok in tangah ka chiah. Chaklei zoh cun sau ngai a rat cu ka hngak nain zei thawnghmanh ka thei hoi ti lo. Ka u fa pa cu ka hnu nihnih chung kha a taksat a dai kho ti lo i ka lungtha kho ti lo a ka au tu cu a mah aw bak si ti cu zu ka ri fawn lo i fiang tukin ka theih. Cu lioah ka thinlungah a rak langmi cu hlan kan pipu nih a dam lomi an thih lai te ah hin an thla a vak tawn i an hawikom tha si lo an ngamhtlakmi hna hi an thla nih an veh tawn hna an timi cu ka thinlungah cun a rak chuak. Cu ruangah ka lungtha ti lo i inn leiah cun zokzok in ka tlung.

Ka va tlun cu kan nau cu a khuasik a rak sang tuk i kan inn pawngpa pu david an rak uah i an rak chanh khawh fangfang hi a rak si. A hmaizarh ah cun kan khua pa pawl cu lo vat dingin an i thawh hna i ka pa le kei zong cu kan i thawh ve. Kan lo pa he hna cun thlam kan i tawm ti hna i ka huam lo bu he ka ruahnak in kai nuam ngai. Cu ti cun ka pa he cun lo cu kan vat i kan dum vah ding he si caah kan i hne tuk lo. Kan riah a zaanlinak ah cun tuan deuhin kan rian cu kan mak i kan lo pawl i vah loah varit bawh dingin ka meithal he cu ka kal than ve.

Cu ti ka va kal ah cun kan lo pawng pu mawi te lo vah lomi ah cun sa hram thawng ka theih i cu sahram thawng cu a mak tuk i zaan mui hnu i theih dingah cun lung cu a nuam lo ngai. Tlawmpal ka kal i varit ka bawhnak ding hmun ka phak ah cun ka chakah hnahthial lakah cun cawl thawng le a zuangmi thawng cu ka theih i ka meithal le ka dahmei cu ka chuah i ka hei ceuh cuvarit a rak si. Ka meithal cun ka van kah i ka meithal puah thawng cu A hman lo .ka meithal cu ka van tuah than i ka kap la ka van ti ah cun varit cu a rak um ti lo. A kal thawng le a zuan thawng zong zeihmanh thei lo cun a tlau i khuaruahhar deuh in ka um.

Cu tlawmpal ah cun varit ai futnak pawngah cun ram cu a cawl than i ka mei kenmi cun ka hei ceuh cu pitar muichia taktak a sam kir taktak mi le a rimchia takmi a thut ko cu ka hmuh. A tak pum cu hnulei a ka chit nain a lu lei cu hmailei a hawih i a mit kau nawn pi cu a rak ka zoh. Cu vial ah cun ka fa le cu thiah piak maw na ka timh. Kan zuah ve lai loh tiah aw ngan nawn pi cun a rak ka ti. Ka tha thir thluahmah i zam ding zongin cahnak ka ngei kho ti lo ka tha thir dih cang. Ti hin cun a si kho ti lo ka ti i ka mei cu ka van than i pitar nu umnak cu ka tih tuk bu cun ka hei ceuh than i ka ruah lo ning tukin pitar nu cu a leichah pah buin ka leiah cun vokvah in a rak vak cuahmah.

Cu vial ah cun ka meithal cu ka chuah i pitar nu cu ka kah ciammam cu a aw te nawn pi in tih nung taktak khin a aw cu a chuah i thisen rimchia tukmi khin ka hmai ah cun a rak ka theh thluahmah. Ka mei cun ka hei ceuh than i thinkung phenah cun a lu pi lawng hi a rak langh i tihnung taktak in a rak ka nih. Cu vialah a ke cu a hngawngah a bah i a bansau pi he cun ka lei cu a rak panh thluahmah hoi. Ka pawng i thingthan ummi cun ka hei cheh than i aw tih nungtaktak cu a ka nih i ka pawng thingkungah cun a rak thu i ka van zoh cu a cung zawn bak si i amah pi cun aw chuah buin ai ceih thluahmah.ka mei cun ka van ceuh than i amah takpum bak cu a rak hlai i a chung thin pawl cu thawt hmel taktak cun a rak ei cuahmah.

Cu lio ah cun ka lungcu fim ko nain ka tha nih cun a ka tom dih i a thirh in a ka thirh. Mei cun ka ceuh than i tih nungtaktak cun a ka nih than i cu hnuah duh sah tein thinkung cung cun a tum i a mah ten a kal. Rang ngai in ka meithal cu kai lak than i riah buk leiah cun ka kal. Riah buk ka phak ah cun ka pa le nih cun sa kap ding bakin an rak ka ruah i sa kap loin pitar tu ka kah cu an thei lo. Sinan a pawng deuh ka rak phak ah cun ka pa mui cu ai dang colh i pate ziah zeitin dah na um na mui cu ai dang viar.

Thil tha lo tak a tong ti cu ka pa nih cu a ka theihthiam piak colh. Cu tlawmpal ah cun kan thlamchak ah cun aw thawng ka theih i midang nih cun cu thawng cu a thei vemi zong an lo lo. Cu thawng cu minung thawng bantuk khin ka theih i thlam inn ka cun ka va chuak i kha pitar nu thiamthiam nih khan a chungril ei pah in a rak ka zoh i a rak ka nih len hoi. A cuap bantuk a chungthin put pah buin byebye a ka tuah i a kal. Cu vialah cun ka thlan cu hnaeh cawk loin a luang i ka pa nih cun heh tiah ka thlan cu a ka hnawh zeihmanh hal lem lo cun thilmak deuh a hmuh ti cu ka pa mitah cun ka hmuh khawh.

A thaizing khua deiah ka pa nih cun kan lo vahmi cu a peh than i kei tu cu lo zong vat kho ti lo cun ka um. Kei mah cang i pasal le tih ngei lo ai ti vemi cu rian tuan kho loin sau pi ka um i kan lo zongah cun ka kal duh ti lem lo. Hi thingsei ram hi tuandeuh zongah thlam a hnih piakhna ti bantuk tete in thawng hi an theih peng i ka pa zongnih hin a rak ton ve bakmi si. Sinan kei nih cun cu bantuk kong cu ka hal duh lem lo tiin ka pu nih cun a chim . Credit : Pc Htar Channel

Be the first to comment

Leave a Reply

Your email address will not be published.


*