Sagaing ramṭhen, Kalaymyo, Chainmayaungsi(ချမ်းမြေ့အောင်စည်) sang ummi phungki sianginn ah rawl a petu SAC ralkap hna cu an kir lei, nihin September 8 zinglei suimilam 10:30 ah bomb lung thum kan puahhnawh hna, tiah PDF Kalay nih an thanh.
Bomb a puah hnu ah phungki sianginn pawnghrawng cu SAC ralkap nih an duhnak hmun poh an kah, SAC ralkap hna nih chunhnu suimilam 1:00 tiang motor le cycle cu an tlaih hna, tiah theih a si. Cun phungki sianginn pawnghrawng ah cun ral vengtu an chiah i, a pawng ummi inn hna cu checkhlatnak an tuah hna tiah theih a si.
SAC ralkap hna nih Kalay pengchung Kantaya(ကံသာယာ), Kanpale(ကံပုလဲ) khua um phungki sianginn ah rawl peknak le pekchanhnak an tuah tawn. Biaknak lei biapi ah kan chiah ti langhter in SAC ralkap thawngthanhtu telegram channel le social media hna ah pekchanhnak an tuahmi cu an langhter tawn.
Phungki sianginn i pekchanhnnak an tuah caan ah cun ralbawi nih a zulh tawn hna i, tutan zong ahhin ralbawi aho nih a zulh hna ti cu theih a si lo nain, rank sang bawi pakhat khat nih a zulh hna i hliamhma tuarmi zong an um caah SAC ralkap nih ralvengtu tampi chia in fakngai in checknak an tuah, tiah tualchung mi pakhat nih a chim.
Bomb hmanhnak a tuahtu tualchung hriamtlai phu hna cu a himnak hmun an phan dih cang nain, tualchung mi pa pakhat cu SAC ralkap nih an tlaih, tiah tualchung mi nih an chim. Chunhnu suimilam 2:30 tiang SAC ralkap hna nih phihkhamnak tuah in checkhlatnak an tuah, tiah theih a si. Credit : The Chin Post
Leave a Reply