Hticheik Ah SAC Ralkap Bomb Puahh An Ton Caah Ralkap 10 Hrawng An Thi, 6 Hliamhma Fak An Pu

Sagaing ramṭhen, Hticheik peng ah rallam a sialmi SAC ralkap pawl cu nihin September 1 zing ah PDF nih bomb voi hnih an puahhnawh hna, tiah theih a si. Hticheik peng, Aung Tharyar(အောင်သာယာ) hmun pawng ah nihin September 1 zing sml 7:30 hrawng le sml 8:00 hrawng ah voi khat an puah i, cu hnu tlawmpal ah voikhat kan puahhnawh hna, tiah Special 9-HPDF ṭuanvo ngeitu nih a chim.

“A voikhatnak cu Aung Tharyar hmun tlang par an phanh hlan ah kan puahhnawh hna i, SAC ralkap 5 hrawng an thi. Cu hnuah SAC ralkap 100 hranwg cu Aung Tharyar hmun tlang par an phanh ah bomb kan puahhnawh ṭhan hna i, tam ngai an thi,” tiah a chim chap.

Cu Bomb puahnak ah cun SAC ralkap 10 hrawng an thi i, 6 hliamhma fak an pu, tiah ralhmai kalmi PDF nih an chim. SAC ralkap pawl cu Mandalay ramṭhen, Tapaihcin(သပိတ်ကျင်း) peng ah umhmun khuarmi No. 13 an si i, Takaung khua lei in Hticheik lei ah rallam a sialmi an si, tiah theih a si.

A luancia August 22 lio zong ah Hticheik peng Yephyo Lwin khua ah rallam a sialmi SAC ralkap pawl cu Special 9-HPDF nih an rak kah hna caah ralkap 15 hrawng an tak thi. Credit : The Chin Post

Be the first to comment

Leave a Reply

Your email address will not be published.


*