Nihin Moebye Kahdohnak Ah Ralhraang 20 Nak Tlawm Lo An Thi, Hriamnam Tampi An Lak!
========
Shan – Karenni aa tonnak Pekon peng, Moebye khu pawng, Wayiso Hpalai khua ah nihin kahdohnak fak a chuak i council ralhraang lei 20 nak tlawm lo an thi, hriamnam tampi an lak tiah Karenni’s Voice nih a langhter.
September 8 Wayiso Hpalai khua in Moebye lei a ra mi council ralhraang le tualchung PDF kar kahdohnak faak a chuak. Moebye khuachung biakinn pawng ah ralhraang 400 tluk nih hmai an nawr ca ah tualchung PDF nih an kah hna hi a si tiah theih a si.
Zing suimilaam 9:00 hrawng in kahdohnak aa thawk. Ralhraang lei a tlawm bik 20 cu an thi. Ka hmaika meter 3 tluk lawng aa hlatnak in ka hmuh hna. Keimah pakhat lawng nih 9 ka thah hna. Ka bawngbi hi anmah thi lawng te a si” tiah hmaisuang ralkap pakhat nih a chim tiah Karenni’s Voice nih a langhter.
Cu kahdohnak cu Moebye PDF, KA, KNDF, KRU le URF phukomh nih an kah mi hna a si. Kahdohnak chung ah hriamnam zong an lak i Ngagyinhmi 1, Setkalay 3, RPG 1 tel in hriamnam a zapi 10 hrawng an lak tiah kan theih.
An rak kai ah hin a tomtom in an ra. A thi mi le hliamtuar zong an tam ngai. Kahdohnak a fak ngai. Hriamngan lawng te in an kan kah. Kanmah lei hliam hma fak tuar kan um lo” tiah KNDF thawnghram nih Yangon Khit Thit Media ah a chim.
Kachin Ramkulh, Mogaung Khua Ah Zu Dawr Ngeitu Pyusawhti Hruaitu Cu PDF Nih An Thah. Kachin ramkulh, Mogaung(မိုးကောင်း) khua Zekung sang um, zu dawr ngeitu Pyusawhti hruaitu Maung Soe cu nihin September 8 zing sml 4:00 hrawng ah kan kah thah, tiah UG black K phu nih an langhter. Nihin zingka ah khual riahnak le zu dawr va hun ding in aa timhtuah lio ah KA 2.5 zun 6 in kan kah i, a hmun ah a thi colh, tiah UG black K phu in ṭuanvo ngeitu pakhat nih a chim.rel chap >>>>>>
UG black K phu cu Pyusawhti hruaitu pa a inn an va phak ah Pyusawhti Maung Soe nih cun meithal aa cuh ve nain, a laak manh hlan ah an kah thah, tiah theih a si. Pyusawhti hruaitu Maung Soe cu SAC ralkap thawngpetu a si pinah PDF an si tiah a zumhmi hna cu a tlaih hna i, a hrem lengmang hna caah hi bantuk an an kah, tiah theih a si.
Maung Soe thah a ton lecangka in SAC ralkap pawl cu an kal colh lo. Khua ceu hnu lawng ah Pyusawhti hruaitu pa inn ah cun an kal. Maung Soe cu Zekung sang ah inn zaa uktu pakhat zong a si, tiah theih a si.
Binlin Peng Ah Ralbawi Hlun le Pyusawhti Hruaitu Hla Win Thein Cu PDF nih An Thah: Mon ramkulh, Bilin peng ah ralbawi(Major) hlun Vice Chairman, Pyusawhti hruaitu Hla Win Thein cu tualchung hriamtlai phu nih an thah, tiah tualchung mi hna le Bilin UG phu sinin theih a si. Nihin September 8 zing sml 8:00 hrawng ah Bilin peng Kantharyar No.7 sang ummi, ralbawi hlun Pyusawhti hruaitu, Hla Win Thein cu an kah, tiah theih a si.
Ralbawi hlun(Major) Hla Win Thein nih cun hramhram uknak duh lo lamzawhnak ah aa telmi hna cu SAC ralkap sinah a puan hna i, a tlaihter lengmang hna caah kan kah thahnak a si, tiah UG phu nih an langhter. Pyusawhti hruaitu Hla Win Thein thah a ton hnu in SAC ralkap nih Bilin khua luhnak le chuaknak an kham dih, tiah theih a si.
Leave a Reply