Mandalay ramṭhen, Madaya peng Ayeyawaddy tiva kam ummi Yaelelkyun khua ah SAC ralkap le tualchung hriamtlai phu kar kahdohnak a chuak, tiah theih a si. Nihin september ni 9 zinglei ah Madaya peng, Yaelelkyun khua lei ah SAC ralkap nih rallam an sial caah tualchumg hriamtlai phu nih an kah hna i kaphnih kar kahdohnak a chauk, tiah Bo Kaung Kin (ဗိုလ်ကောင်ူကင်) PDF nih cathanh an chuah.
Cu kahdohnak ah cun SAC hriamngan kahnak in tualchumgmi ngakchia pakhat a lu ah hliam a pu i nu pakhat zong a ke ah hliam a tuar, tiah theih a si. SAC hriamngan ruangah hliamtuarmi ngakchia cu a nunhimnak ca ah thinphang ngai a si, tiah an cathanh ah cun an langhter.
Cu kahdohnak ah cun SAC ralkap lei in ralbawi pakhat telh in ralkap 13 an thi, tiah PDF nih an thanh. Kahdohnak kong he pehtlai in Bo Kaung Kin PDF in ṭuanvo ngeitu pakhat nih cun, “Zing suimilam 5 hrawng ah tilawng in an ra i kanmah nih kan kah hmasa hna. Kan hriamnam thazaang aa thlau tuk ruangah kanmah lei tu hnu kan tolh ṭhan nain kan mithmuh ah ralbawi pakhat le ralkap 13 ruak cu mizawphur mawṭaw in an kalpi hna,” tiah a chim.
Yaelelkyun khua ah hin a luancia July 27 in August ni 1 tiang ninga chung pehtlai in kahdohnak a rak chuak i phungki pakhat a rak thih pinah tualchung mi pakhat hliamfak ngai a rak tuar i, SAC ralkap 8 nak tlawm lo an rak thi bal.Crd the chin post
Leave a Reply