Magway ramṭhen, Gangaw peng khuate a khaangtu SAC ralkap pawl cu Gangaw PDF le Pah Kah Pha nih an kah hna caah ralkap 30 nak tlawm lo an thi, tiah theih a si.
Khah Lah Ya 55 in SAC ralkap 150 hrawng cu Pyusawhti he i bawm in ralzam mi an umnak lei ah rallam an sial i ralzam mi umnak cu an khangh dih, tiah Gangaw PDF ṭuanvo ngeitu nih a chim.
SAC ralkap nih ralzam mi umnak ramlak ah rallam an sial. Riahcaw an i chiahnak thlam zong an khangh piak dih hna. Voidang bantuk in rallam an sial ti lo ralzam mi umnak theng ah an kal. Ralzam mi hna nih inn ah riahcaw kan i chiah ahcun SAC ralkap nih an kan khangh piak lai ti an phan caah ramlak ah an riahcaw an chiahnak a si tiah Gangaw PDF ṭuanvo ngeitu nih a chim.
SAC ralkap nih ralzam mi hna riahcaw chiahnak an khangh piak hna caah voi 8 nak tlawm lo kahdohnak a chuak. Kahdohnak a daih in ralkap pawl umnak lei kan va kal tikah an angki le an ruak kan hmuh i a tlawm bik 30 an thi lai, tiah a chim chap.
Cu SAC ralkap hna cu a luancia August 21 le 22 lio ah Hnankha in nitlak thlanglei ramlak um ralzam mi umnak thlam 9 riahcaw chiahnak, cacawnnak sianginn le motor 3 a khaangtu an si, tiah theih a si.
August 27 lio zong ah Hteyhlaw khua inn 14, motor 1 cycle 5 zong an rak khangh. August 28 le 29 ah Mauklin khua inn 24 le Kyaw khua inn 8 zong an rak khangh, tiah an cathanh ah an langhter.
Cu kahdohnak ah cun Gangaw pengkomh No.1 Battalion le Pah Kah Pha ralkap hna i bawm in an kah hna i, anmah lei in No.1 Battalion ralkap pakhat le Pah Kah Pha ralkap pahnih hliamhma an pu, tiah theih a si.
Leave a Reply