Dollar Man A Kai Tuk Caah Yangon Ah Cun Siidawr Ngeitu Hna Nih Rikhiah Ngei In Sii An Zuar!: Yangon khuapi ah thil man a kai tuk caah siidawr cheukhat ah cun sii cawk tikah rikhiah ngei in sii an zuar, tiah Yangon khuachung ummi nih an chim. “Sii kan cawk tikah kan duh zat in cawk khawh a si lo, Decolgen si tlangkhat ah Ks. 300 a si. Minung pakhat nih Paracetamol, Decolgen le khuhsii tibantuk cu a tam bik strip 2 lawng cawk khawh a si i, cheukhat siidawr cu an khar,” tiah Yangon khuachung ummi pakhat nih cun a chim.
Atu lio cu US dollar man a kai tuk caah cuhlan sii man nakin zatuak 20(%) in a kai, tiah siidawr ngeitu cheukhat nih an chim. Atu bantuk in thil man a kai tuk caah kan ngeihciami sii-ai hna cu rikhiah in kan zuarnak hi a si, tiah sii zuartu pakhat nih cun a chim ve.
“Siidawr cheikhat cu an khar i, sii zuar ding an ngeih ti lo caah siloin kan sung lai ti an phan caah an khar chung. Phaisa ngei deuh cheukhat nih cun sii-ai an catcham sual lai ti phan ah tam ngai in an i cawk cia i, phaisa ngei lo caah cun a har ngai cang. Covid rai a tam lio zong ahkhan hi bantuk thil hi a rak um bal cang. Curuangah kei cu ka ngeih mi sii hi man kaiter lo in ka zuar ko lai, ka ngeih ti lo zong ah dawr cu ka khar ve te ko lai,” tiah siidawr ngeitu pakhat nih a chim.
SAC ralkap nih nawlngeihnak an laak hnu in US dollars man cu a kai peng caah atu ah cun dollar($ 1) khat ah Myanmar phaisa in Ks. 2400 tiang a phan cang. Credit : The Chin Post
Leave a Reply