CNDF RALBAWI NIH MIPI BIAHALNAK TUAHMI BIAPI LEHNAK A TUAH

CNDF RALBAWI NIH MIPI BIAHALNAK TUAHMI BIAPI LEHNAK A TUAH

CNDF Ralbawi In Mipi Thusuhmi A Let – A tufang ram buainak ah ralhrang in khua an urkang asile khua an urkang laiah ziangruangah mipi ralkap lamin an kap lo timi cu mipi lamin thusuhnak tambik a si ih, CNDF ralbawi Peter Thang cun mipi thusuhnak a let. CNDF ralbawi Peter Thang cun “Ralhrang pawl khua ih a luh tikah ziangruangah mipi ralkap lamin kan kap lo timi thusuhnak a tam tuk.

Thenkhat cu theithiam cia an sinan, thenkhat cu theithiam lo taktak ih suttu khal an um. Ziangruangah ralhrang kan kap lo , ziangah kan kap timi zaten mipi simthluh cu a har nan, tuitum thusuhnak cu malten ka simfiang ding.Ralhrang ralkap pawl hi kannih hnakin an caksawn ih ralthuam khal an nei tha sawn. Curuangah an cak laifang le an ralrin laifang ah kan kap ngam dah lo ih, an ralrin lolai le an man lo laiah kan kap tlangpi.

Khuasung an umlai ih kan kap lo cingin khua ih inn tampi an urkang ih, khuasung an umlai ah kap sehla khua cu vaivut ah a cang thluh ding. Curuangah, kannih mipi ralkap cun khuasung ah kap aw lo dingin theitawk kan zuam ih, kan hrial.Cun, khuasung an um tikah an ralring, an man cia , an cak laifang a si ih,cumi laifang ih va kah ding cu ral daan khalin a kaih lo. Cutlukin ruahnak nei lo kan silo.

Kannih mipi ralkap pawl cu thupte cangvaihnak kan fehpi vivo lai.Ziangruangahtile, ralthuam kan neimal sawn ih, mipum khal kan malsawn ringring. Kan ngam lo asilo, kan ngam tuk rori nan, tampi nunnak kan can ding kan duh lo. Curuangah kannih mipi ralkap cun ralhrang pawl an man lo lai, an ralring lo lai, an cauh lai tak fang le an hrang hmunrem lo bikah kan kap sawn theu. Hivek cu ralhrang kan do dan tlangpi a si ih, mipi lamin in theihthiampi dingah kan lo sawm duh.

Mipi ralkap pawl kan cak tuk hrih lo ih, ralthuam tla duh vekin kan nei lo. Kan caknak dingah mipi in nasa sin ih in bawm a ttul hrih. Kan meithal neihmi a mal tuk lai, kan cerek neihmi a mal tuk lai. Curuangah kan neihsun ih kan sakhan kilhim tla a ttul lai.Ralhrang pawl kan lamah an ra timi felfai zetih kan theihmi cu an ratnak ding lamzin ah bomb kan kam ih, rinloparal ah kan rak kap theu.

Khuasung lut zomi, khawilam ah an feh ding tihman theih hrih lomi, khua sungah valut ih, vakap vivo ding timi cu Rambo kan silo ruangah a theih ve lo. Curuangah ,kan mipi pawl in theithiam hram uh. Ralhrang in mipi inn an urkang tikah kan tuar tuk,kan riahse tukih kan thin a naa tuk. Hivekin ralhrang pawl an sualnak ruangah, duhduh in mi an that ih, duhduh in mipi inn an urkang ruangah tuar thei lo, zohmen thei loin ralhrang do dingah pumpe aw, hramlak ih um kan si.

Asinan, kan ral pawl hi duhduh in va kah theih men an silo. An thuhla theihcia a tul, bawh cia a tul ih, tanhmun rak khuar cia a tul. Khua sungih ralhrang ralring cia, man thepthep cia do dingin kannih mipi ralka pawl ralthuam kan nei tam hrih lo ih, kan cak hrih lo. Asile,ralhrang pawl khuasung lut ding hman kham thei lo cun do duh hlah uh titu tla an um vivo. Asile, khuasung ih ralhrang pawl lut ding kan kham thei hnu lawngah ralhrang kan do ding asile ziangtikah ralhrang kan do thei ding?

Cuvek ih cangvai thei dingin mipi lamin in thuam uh. Cucun , ralhrang kan do vutvo mai ding. Ralhrang kan do tikah mipi hmuahhmuah le khua hmuahhmuah ka humhim thei lawngah kan do ding ti a silo.Kannih cun mipi tuar ding zawng le mipi harsa ding zawngin ral kan do lo. Anmai umnak ah kan va do sawn. Asinan, anmah ralhrang pawl thluak le cangvaihnak a si ih, mipi tuar ding zawng hlir in an cangvai thlang. Mipi le mipi ralkap kan buai an duh tuk ruangah ralhrang in mipi an tuarter hrimmi khal a si. Curuangah mipi thattu, mipi inn urkangtu ralhrang sawn hua uh,kanmah lamlam in hua hlah uh.

“Ralhrang pawl kan do asile inn an urkang ding tin anmah ralhrang do lo ih ummen a theih lo. Cuvekin kan um ding asile kumkhua in ralhrang sal ih tan ding lawng kan covo a siko. Curuangah ralhrang sal ah kan lut ding maw, kan do ding timi ruah a ttul. Kannih cu ralhrang sal ah kan lut thei lo ih, mipi khal ralhrang sal ih nan luh ding kan siang ve lo. Curuangah ralhrang pawl neh ding rori in kan do a ttul.

Neh dingin kan do ding titikah van ihsin khat hnih thum timen in neh a theih lo. Ral a um tikah tuarnak phunphun a kengtel ih, cuvek tuarnak le siatralnak pawl khal kan zaten kan tuartlang a ttul. Mipi le mipi ralkap kan tantlang vivo a tul. Mipi ralkap pawl tha in pe vivo sawn uh. Mipi le mipi ralkap kan tantlang lawngah ralhrang pawl kan neh thei ding a si,” tin a sim. Credit: Vapualauaw.

Be the first to comment

Leave a Reply

Your email address will not be published.


*