China nih a duh lo tuk ko nain, US speaker Pelosi cu Taiwan President Tsai Ing-wen a tlawng thiamthiam.>>>.

aiwan: Beijing a Thinhunmi Zei poi lo in Pelosi nih President Tsai a Ton
=====================================================

China nih a duh lo tuk ko nain, US speaker Pelosi cu Taiwan President Tsai Ing-wen a tlawng thiamthiam.

Kum 25 chung i Taiwan a tlawngmi US palai vialte lakah Pelosi hi senior bik a si i, US nih tikulh ram Taiwan hnungchit a timh lo zia tutan a khualtlawnnak nih fiangtein a langhter.

Pelosi nih a tlawn hna ah cun US nih a theipar nan zun lai, tiah tuan ah khan China ai hrocer.

Taiwan hi mahtein ai ukmi ram a si, asinain China belte nih cun a ram chungum pengkulh pakhat ah a chiah i, i hmunkhat nak ding lam a kawl peng.

“Taiwan dirpi dingin US nih biakamnak kan tuahmi hi kum 43 a si cang. Nihin i keimah le a hawile nih Taiwan kan in tlawmmi hna nih hin hnungchit kan in timh hna lo zia le kan biakammi kan nunternak fiangtein a langhter ko, tiah Taiwan Relations Act chirhchan in Pelosi nih a chim.

Kan hnung kum hrawnghrang tein khan, Washington le Beijing an i entaunak le biaka in an i charnak karlak Taiwan hi ai tenh.

US nih hin ‘One China’ policy hi a upatpiak ngaingai ko hna. Hi policy hi US le China an i pehtlaihnak ah biapithla in chiahmi a si zong kha a theih ko. Asinain hi policy hi anmah China he lawng ai pehtlaimi a si i, Taiwan he pehtlaihnak a pelte hmanh a um lo. Asinain, US nih official theng lo in Taiwan he pehtlaihnak a ngei i, amah le mah ai kilvennak caah, tiin hriamnam zong a zorh, tiah theih a si.

Pelosi nih Taiwan a tlawmmi nih hin US nih Taiwan a dirkamh ti a langhter, tiin Beijing nih a ti ve.

“Taiwan hi zalonnak a tlaichanmi rampi an khuasaknak ram a si. Democracy le ralkapuknak kong i duhthimnak karlak ah vawlei pi hi khua a sa. Taiwan ah democracy hmun camcin seh, tiin America nih biachahnak kan tuahmi hi kahpathir bang a fek,” tiin Taiwan President Tsai he an i tonnak ah Pelosi nih a chim.

Kapnih an i pehtlaihnak cu Tsai zong nih a chimthiam ngai i, Taiwan zong zumhawk a tlakmi le rinh awk a tlakmi US i hawitha a si peng ko, tiin a chim.

Taiwan hi tuk dingin ceilak in hrocer kan tong lengmang. Asinain, kan lung an thum hrimhrim lo. Cucaah, mah le mah kan i runvennak thazang hi a si khawh chungin thanchoter kan duh, tiin Tsai nih a chim.

Wednesday chunhnu ah human rights phu pakhat Pelosi nih a ton hna lai. Tuan ah khan Taiwan Deputy Speaker of Parliament Tsai Chi-Chang a ton cang.

Tuesday zan i a vanlawng Taiwan i a tum ah khan, kan ral vanlawng pawl Taiwan tikulh tiang an phan, tiin China state media nih thawng a thanh. Cu lio ah cun Taiwan nih a zum lo nain, an vun hlathlai than tikah cun, Tuesday ah khan Taiwan van ralvennak hmunhma (air defense zone) chungpi tiang China vanlawng 20 lenglo an luh kha an theih than.

Pelosi a phak suimilam pakhat chung bakah, tutan zarh chungah Taiwan rili le van ralvennak hmunhma velcheh ah kuan taktak hmangin PLA nih raltuk cawnnak kan ngei lai. Cucaah cuka hmunhma hrawngah cun tilawng le vanlawng maw rak zuanter hna lai u ci, tiah China nih thawng a thanh colh.

China le Taiwan an karlak i aho ta theng ti a um lo mi hmunhma ah China lei nih an ral vanlawng he tiah an zuanternak can hi a sau ngaingai cang, tiah theih a si.

An thihpheih kho lai lo

Pelosi nih Taiwan tlawn a timhmi kong hi vawlei cung pumpi ah a lisa ngaingai i, a donghnak i Taiwan a phak hlan chung paoh kha cu ahohmanh nih a tlawn lai an zum lo.

Sunday i a Asia khuallam ai thawh ah khan, Taiwan tlawnnak kong hi official tein chim a um lo. Singapore, Malaysia, South Korea le Japan tlawn ding kong lawng an langhter.

Pelosi khuatlawnnak kong hi a duhmi nih doh khawh a si, tiin White House lila zong nih kutka a awn. Ralkap thazang he khuatlawn ding cu ‘idea’ tha a si ruam lo, tiin Biden zong nih a ti bal.

Asinain, Taiwan i Pelosi a phak hnu cun, hi khuallam hi cuhlan kan official pawl an tlawmmi he ai khatmi te a si ko. Hrocernak tuktak nih US hi a ning a tither naisai lai lo, tiin White House’s Mr Kirby nih CNN ah a chim.

Pelosi khuatlawn China nih a duhlonak kong cu Wednesday ah khan Chinese foreign minister Wang Yi nih a vun nolh than.

“Hihi langsar ngaiin politics lei in mi an kan ngiartau bia a si. The One-China Policy a buar, China i a pumpak nawlngeihnak a hnuarsuan. China nih i hmunkhatnak tuah kan i timhmi hna nan kan hnawh lenmi hi US nih nan ngol awk a si. Taiwan hi China he then awk a tha lo,” tiin Wang nih a chim.

Wednesday ah khan phihkharnak tuah dingin China nih biachahnak tampi a tuah. Taiwan lei ah these kuat a phih, thingthei le nga Taiwan sinin cawk ti lo dingin a kham.

China pakhat lawnglawng a um. Cucu Beijing ah hram a bunhmi a si, timi China nih kan i hmanmi One China policy hi nan kan cohlanpiak a hau, tiin ramdang zong China nih hnek hna. Vawleicung pumpi ah Taiwan he diplomat in pehtlaihnak ai ngeihmi ram hi ram 15 lawng an si rih. credit Global Rawn Chin Medai>>>>>>>>>>>>.

Be the first to comment

Leave a Reply

Your email address will not be published.


*