China ram nitlak thlanglei Sichuan ramkulh ah 6.8 magnitude tluk a fakmi li aa hnin caah a tlawmbik minung 65 tluk an thi i, minung 100 leng an tlau, tiah ṭuanvo ngeitu hna nih an chim.
Sichuan ramkulh cu atu le tu lihninh a tuar mi an si i, tutan li a hninnak hmun hi ramkulh khualipi Chengdu in km 200 a hlatnak hmun, Luding peng, tlang ram ah a si. Lihninh ruang ah hin Electric mei hri a cat, inn zong an rawk i vawlei zong an cim, tiah China Central News Agency nih an thanh.
2008 kum zong ah khan Sichuan ramkulh ah hin 7.9 magnitude a fak mi lihninh a rak chuah ruang ah minung 90,000 leng cu an rak tlau, tiah Al Jazeera nih a ṭial. Tutan lihninh ruangah harnak a tong mi hna bawmchan ding in President Xi Jinping nih bawmchantu minung 6,500 hrawng a thlah hna, tiah theih a si. Credit : The Chin Post
thawngpang dang relchap : Daw Aung San Su Kyi Tonnak Nawl An Ka Pek Lo Cun Myanmar Ka Kal Ti Lai Lo – Noeleen Heyzer
Myanmar ram ah SAC nih uknak an lak hnu in tlaih a tongmi Daw Aung San Suu Kyi he tonnak nawl an ka pek lo ahcun Myanmar ram ah ka kal ti lai lo, tiah United Nations Special Envoy on Myanmar Noeleen Heyzer nih cun a chim.
Kan hnu thla Myanmar ram a tlawn lio ah SAC Chairman General Min Aung Hlaing he tonnak an rak ngei, Cu lio ah cun Daw Aung San Suu Kyi he tonnak nawl a rak hal i a halmi cung ah Min Aung Hlaing nih cun ton khawh ding phun in an rak leh. Nai te ah Daw Aung San Suu Kyi cu thongtlak kum an chapmi le rianhrang tuan chih ding an timi kong ah Suu Kyi ngandamnak ca ah ka thinphang tuk, tiah Singapore ram ah ISEAS nih tuahmi biaruahnak ah Noeleen Heyzer nih cun a chim.
Uknak lak hnu in Daw Aung San Suu Kyi cu a sualnak an kawl i case tampi in tazacuai a si, biaceihpiak cangmi chung ah thong kum 20 tla ding in biakhiahpiak a si. Noeleen Heyzer nih cun Myanmar ram ah ramkhel daihnak a um lo caah ram mipi hna cu ralzam dirhmun an phan hna, cucaah ramdang hna zong nih bawmhchanhnak rak pek cio a herh kong tonbiaruahnak ah cun a chim.
Leave a Reply