Chin Ramkulh Chung Ralzaam Hna Lak Ah Raifanh Zawtnak A Karh!

Chin Ramkulh Chung Ralzaam Hna Lak Ah Raifanh Zawtnak A Karh! Chin ramkulh chung hmun cheukhat ah ralzaam hna cu rai nih a fanh hna lengah an taksa ah raifanh zawtnak hrik(Malaria) hmuh a si ruangah sii boih mi khiangthawng an herh ngai, tiah Chin Health Organization nih an thanh. Kum dang ah cun Chin ramkulh i peng pakhat ah kumkhat chung ah raifanh zawtnak in a zaw mi minung 3 in 15 lawng hmuh an si caah 2025 ahcun raifanh zawtnak a tlau kho mi hmunram ah ruah mi ramkulh a si.

Chin Health Organization in rianngeitu pakhat nih cun, “Cazin kan laak khawh mi hi Kanpalet, Matupi, le Mindat peng hna an si i, April thla in June thla tiang ah kan laak mi cazin a si. Thlathum chung ah raifanh in a zaw mi cu 40 tluk an um cang. Hi bantuk in raifanh zawtnak a karh nak a ruang cu ralzaam dirhmun an phanh ruangah sii-ai runvennak le khiangthawng an ngeih lo caah a si,” tiah a chim.

Tu kum chung ah Matupi in Mindat lei ah a zaam mi pakhat cu raifanh zawtnak in a nunnak a liam cang tiah theih a si. Atu lio hi ralzaam hna sinah thluak ah a kai mi raifanh zawtnak hmuh an si i, hi zawtnak hrik hi minung thihnak tiang a phakter khotu zawtnak hrik a si. Cuhlan ah cun Chin ramkulh chung ah raifanh zawtnak cu Paletwa peng lawng ah hmuh a si cang nain atu ah cun Mindat, Matupi, Kanpalet le Thantlang peng zong ah ṭhan hmuh a si.

RELCHAP: Falam Peng Chung Kahdohnak Ah SAC Ralkap 30 Leng An Thi Cang!: Chin ramkulh, Falam pengchung ah, July 10 ahkhan kahdohnak a chuak i cu kahdohnak ah cun SAC ralkap 11 an thi, tiah CNA in chimphuannak nawlngeitu Salai Hṭet Ni nih Mizzima ah a chim. July 10 ah khan Falam peng, Ramthlo khua le Tlangzar khua kar ah kahdohnak a chuak i, cu kahdohnak ah cun SAC ralkap 11 an thi, tualchung hriamtlai phu lei in ralkap 4 hliamhma an tuar ve nain an hliamhma kong ah thinphan ding a um lo, tiah theih a si.

July 9 zong ahkhan Falam-Hakha lampi Tlangrawn le Ṭaal khua pawng ah kahdohnak voithum a chuak i, cu kahdohnak ah cun SAC ralkap 21 an thi, tiah theih a si. Cu ni ṭhiam ah cun SAC ralkap nih Ṭaal khua inn 29 an khanghpiak hna leng ah inn 5 cu baoh in thilri an soksam dih, tiah CNO nih cathanh an chuah.

SAC ralkap hna cu motor 28 in an kai i, motor 4 nih cun inn saknak thilri an phorh i, ralkap 40 hrawng cu ke in an kal. SAC ralkap cu an dihlak in 120 hrawng an si lai, tiah zumh a si. July 11 zinglei suimilam 4:00 hrawng ah Ramthlo khuachung ah umhmun khuarmi SAC ralkap hna cu CNA le Tualchung ralkap pawl nih an kah hna i, a thimi le hliamtuar kong tu cu ah fiang in theih khawh a si rih lo. Hakha ah SAC ralkap 30 hrawng nih cawlcanghnak an tuah i, kahdohnak a chuahnak Falam peng lei ah kal an i timh zong a si kho, Thantlang lei ah minung thazaang chap an timh zong a si kho, tiah Chin ralkap pakhat nih cun a chim.

SAC ralkap hriamngan kahnak ruangah Tlangrawn khuachung Biakinn le sii sayamah nu umnak inn cu an rawk, tiah theih a si. July 10, chunhnu zong ah Tlangzar khua cu SAC ralkap nih an khanghpiak hna caah inn 6 an kaang, tiah CNO nih cun an langhter chih. Credit : The Chin Post

Be the first to comment

Leave a Reply

Your email address will not be published.


*