CDMer Sianginn Uktu Pakhat Cu Shanni Nationalities Army(SNA) Nih An Thah!

CDMer Sianginn Uktu Pakhat Cu Shanni Nationalities Army(SNA) Nih An Thah!: CDM a tuahtu Humalin (ဟုမ္မလင်း) peng, Takketaung(သက်ကယ်တောင်) khua middle school sianguk U Aung San Win (ဦးအောင်ဆန်းဝင်း) cu Shanni Nationalities Army (SNA) nih an tlaih i, an thah tiah Humalin peng zatlang uktu phu nih thawngpang an thanh.

U Aung San Win cu July 16 zaan ahkhan tlaih a si i, a inn he aa naihnak Chaunggyi tiva kam hai kung tang ah an kahthah i, a ruak cu nihin tiang hmuh a si lo, tiah an langhter.

Saya U Aung San Win an tlaihnak a ruang cu pumpak in a rem lotu pakhat nih lih le hrokhrol in report a pek caah a si, tiah Humalin zatlang uktu phu nih cun an chim. Saya Aung San Win nih cun a nupi le a fale 3 a liamtak hna, tiah theih a si.

Saya U Aung San Win A thattu cu SNA ralbawi pakhat, amin Lin Kyaw(လင်းကျော်) a si i, Letpanthar(လက်ပံသာ) khua sianginn hmai duty post a hngaktu a si. Meithal i tlaih in lam ah aa chok mi hna cu a volhpamh hna i, a hrocer hna lengah a tukvelh tawn hna, tiah an chim. Cupinah mino pakhat cu PDF na si tiin a rak thah cang, tiah theih a si.

SNA hi SAC nih uknak a laak hnu in SAC ralkap he i bawm in raltuk cawnnak zong an ngei i, SAC a bawmtu le thazaang a petu ah aa tel mi phu pakhat a si.

Myaing Peng Ah Ni 16 Chung Kahdohnak Faak Ngai In A Chuak:Magwe ramṭhen Myaing peng ah July 3 in nihin July 18 tiang pehzulh in ni 16 chung tualchung PDF le SAC ralkap kar kahdohnak faak ngai in a chuak, tiah tualchung PDF nih an thanh.

SAC ralkap hna cu Myaing peng mizapi vengtu ralkap phufonh; Myaing PDF, Pungtaung Ngenaung(ပုံတောင်ညီနောင်), 7 Star, Pale pah-kah-phah batallion 1, Bo Yakkhah(ဗိုလ်ယက္ခ) Special Commando Force le Myaing peng PDF hna i bawm in an kah hna, tiah theih a si. Credit : The Chin Post

Be the first to comment

Leave a Reply

Your email address will not be published.


*