CDF-Mara Nih Mara Ram Ah Kan Tuah Mi Vialte Hi CJDC Fial Mi Le Nawlpek Mi Asi Ati!

CJDC Nawlpeknak le Fialmi asi tak tak maw?

CDF-Mara spokeperson Paw Machei, USA nih The Chinland Post ah achim mi cu CDF-Mara nih Mara ram ah kan tuah mi vialte hi CJDC fial mi le nawlpek mi asi ati. A si tak tak ko ah cun kan revolution kalpi ning hi atha tein kan zoh than cio ah atha lai.

Hi ti ning kan kal ah cun mifir le damiah kan si dih sual lai i kan si hlan ah kan ngolh ah ah atha deuh lai. A ruang cu atu bantuk an thil tuah mi hi Mipi bawmhtu cu chim hla Mipi caah lurih hnahnawh tu men khi an si ko. An bia bang in atang ka vun langhter mi pawl hi CJDC nih nan fial mi le nawl pek mi (phundang chim ah cun CJDC Policy) a si lai cu.

1. Lailenpi ah MEC nih a ngeih mi COME school siseh, Cozah High School Library le Sipin zung mei an khang mi, 2. MEC Office ah zurit bu in meithal he MEC Pastor pawl an lut hnawh mi, 3. Pasai khiathar le Pathiantlang lei ah lam cawhnak JCB tawh an chih hna hnua ah phaisa tampi he an tlanh ter mi.

4. Zei sualnak atuah lo mi CDM, saya Vakhaitha cu (ရည်းစားစာလာပေးတာလား) a ti tiah phuahchom case in zantim ah meithal he a innchung ah luh hnawh i an tlaih. Cu lio ah a fapa cu a lau sual i atu Saiha Sizung ah an tlawp lio cuahmah. 5. Sualnak zeihmanh angeihlo mi Ngaiphaipi khua upa pathum an tlai hna i khuami nih sthi luanbak in an va nawl hnu ah an rak thlah hoi.

6. Lailenpi khuanu khuapa hna nih an fale ca cawn hna seh tiah na duh tuk caah an mah khuakhannak in sianginn an awn mi ah Riantuantu Saya Neitlau cu an va tlaih hoi i thi deng an vuak hnu MMK 30 laks in Lailenpi khua upa hna nih an va tlanh than hoi. An tukvelnak hmâ a faktuk caah atu Saiha sizung ah an zohkhen lio asi. (hi zawn ah CDM a tuah lo mi an ti ah cun amah long hi maw Chin ram pumpi ah Non CDM cu a si kun ne). Ziah mi dang zong nan tlaih ve hna lo.

7. A dang sualnak ngeihlomi tlaih le hrem ding ah an dawi i India ah azam mi hna an um len rih. 8. Mara ram in kawram lei Khultlawmg mi poh Lautu CDF gate tan khawh nak ding caah CDF Mara recommendation ahau an ti hoi i pakhat ah MMK 5000/- an hal mi le 10000 taing an halh hna.

Hi vialte thil acang mi hi CJDC nawlpek mi le fial mi asi tiah an spokeperson nih The Chinland Post ah a chim cang kha mu. Hi hi maw Mipi ralkap ding cu an si. Mipi tuk le vel i chimhrinnak nih hi ta kan revolution a awng min taktak lai tiah na zumh maw. Defance ti silo in Damiah ti tu ah kan min i thlen a hau cang. MAH Ralkap hman a tluk lo mi nih Mipi ralkap e, ram kan veng lai e ti cu a si thiam ngai hnga maw. Mah lei ttanpi lo poh ah kan ral in kan rel ah cun hi hnu kum khat ah cun Mipi hi kan ral an si dih te ko lai.

Lailenpi um kawl Ralkap nih Sianginn awn uh zong an ti ballo i kharh uh zong an ti bal fawn lo. Mipi tu nih an fale zawnruah ah Private in an awng mi tu a si deuh. MATC nih siang inn 30 leng an awn mi zong zei te hmanh hna an hnawh bal fawn lo i Mara ram hruainak an kalpi cuahmah mi zong ah cukha an ti bal rih lo. Kawl Ralkap nak in CDF-Mara tu nih hnahnawhnak an tuah deuh lehlam khi asi.

CDF Mara pawl an thil tuah mi le an bia chim ning a si ah cun zeiruang ah CJDC nih Hakha, Falam le hmun dangdang zong ah ralhrang siang inn an awn mi pawl hna khi nan luh hnawh ter ve hna lo, Mara ram siang inn khel khel hi maw Kawlram revolution teihnak ding cu a si tiah nan ruat. Ralhrang noh an awn mi a ttung lo, khuami nih ‘’kothukotha’’ in an awn mi pei asi ko cu.

Meithal puak lawng hi MAH dohnak cu asi lo i apuak rihlo mi poh zong MAH ttanhtu an si ve fawnlo ti hi kan theih zong a herh. Tuchun Mara ram chung thisen luang lo te in MATC/ MDF nih uknak 90% an tuah kho. CDF-Mara hi hna hnawh hla sehlaw 98% an control dih diam lai ka zumh. Cu bantuk Civil uknak kan duh ruang ah cu pei Meithal kan i tlai chih mi hi a si lo maw. Meithal hi i thah i nawngnak ding lomgah silo in kan duh mi a tlamtling khawhnak ding caah bawmhchanhtu hmanrual pakhat asi tiah ruat ding asi. Kan theih ding cu tutan revolution hi Meithal in a dih khawh ding khi a si lo i political solution dang pakhatkhat chap chih a herh te lai ti hi philh hla u sih.Atu CDFs le PDFs tampi hi NUG nih a hmuitinh taktak mi policy an nganh thluahmah mi hi a poi ngai ngai.

Cu ka ah cun CNF/A zong hi aa tel ve thluamah cang. Mipi zong nih doh le kap lawng hi revolution tauh ah kan rel ve hoi cang. Meithal puak long ah MAH a doh mi asi heiti phun khin kan Federal ram serhnak caah kan saduhthah nak cu a si cang. Khua fak deuh in kan ruat tthan a hau. Kan dohthlengnak lam hi kan pialtak sual cikcek ah cun kan mah mipi lila nih kan tuar te lai zong hi philh hna hla u si.

Thuro bang nunmem i rul bang fim u sih timi kha te khawika dah nan chiah dih ne. A tu lio te hi Miphun tenau vialte pakhat le pakhat duhnak i theithiam piak le pakhat le pakhat kan i khah lonak zawn tete kha i cohlan piak i kan i khahnak vialte funhtomh in hmunkhat te ah kan ram sersiam nak caah dothlennak tuah caan zong asi. Kan vorh lei ah kan ram sersiamnak rian kan tuan pa lai i kan ke lei ah kan ral kan ni veng pa lai. Ral long kan zuanhnawh ah cun kan hmuitinh mi kan tlolh lai ti hi fiang tuk in a langh.

Cu caah atu i CDF Mara bantuk mumal ngeihlo, terrorist bantuk, damiah bantuk, gangstars bantuk hi Chin ram chung Dawhlanzi kan kalpi asi ah cun Chin mi lungrualnak a hrawktu tayekhan cu CDFs le CJDC hi kan si te lai. NUG le CRPH policy pin lei ah kan kal cuahmah cang ti hi philh hna hla u si. Credit:

Be the first to comment

Leave a Reply

Your email address will not be published.


*