Cangsualnak ruangah Ralhraang ralkap 5 an thi phah!

Sagaing ramṭhen, Monywa-Mandalay lamzinpi ah mipi ralkap kam mi bomb an ti puak pang ih ralhraang ralkap 5 an thi tiah theih a si.

August 18 zinglam nazi 7 hrawngah Monywa-Mandalay zinpi thianfaitu ralhraang ralkap in mipi ralkap kam mi bomb pawl a hmu ih, an kut sung a um lai ah cangsual pangin a puak kuai ruangah a hmun rori ah ralhraang ralkap 5 an thi tiah khawmi pawl in an sim.

Tualsung media pawl ah cangsualnak ruangih puak kuai mi sivekin tarlang a si nan, PDF – South Monywa ṭuanvonei Daung Karyan cun an mai ti puak mi si in a rel.

Tuzing ah Monywa ralhraang ralkap feh nak ding zinpi an sial sak ih, cumi ah bomb kam mi 3 an hmu. An kut sung a thlen hnu ah kan ti puak ih a hmun rori ah ralhraang ralkap 5 an thi, hriam tuar khal tampi an um” tiah amahcun a rel.

Bomb puak a um thu cu Monywa-Mandalay zinpi ih cangvaitu mipi ralkap pawl khalin an nemhnget ih, pyosawṭhi le ralhraang ralkap bomb puah hnawh an si ih mithi an tam thei tiah thu an suah an si.