Camp Victoria Ah The Chin Post Office Onnak Le Weekly Journal Tlangzamhnak Tlamtling Tein Kan Tuah Khawh

Camp Victoria Ah The Chin Post Office Onnak Le Weekly Journal Tlangzamhnak Tlamtling Tein Kan Tuah Khawh
=========================
August 20, cawn niruk ni ah miphun hriamtlai phu hna hmunpi a simi Camp Victoria ah The Chin Post Office onnak le The Chin Post Weekly Journal tlangzamhnak cu tlamtling tein kan tuah khawh!

CNF/A upa hna nih lunglawm tein an kan cohlan i hmunhma zong an kan pek caah an cungah lawmhnak tampi kan ngei! Tutan caan hmannak ah CNF/A AGS-2 le Spokesperson Pu Htet Ni, Public Relation lei tlaitu Pu Solomon Thang Ding, Party Office Director Pu Robert Siang, UCCF pastor Rev. Tluang Hre le Central Committee upa dang hna nih an kan telpi!

Pu Htet Ni le Pu Robert Siang nih biachimnak an ngeih i Rev. Tluang Hre nih office le Journal caah thlacamnak a ngeih! Caan kan hman dih hnuah The Chin Post nih timhtuahmi zaanriah hrawmtinak kan ngei hna!

The Chin Post cu thawngchim lawng si loin holh le ca thanchonak kong biatak tein a ruat i aa zuammi kan si caah Journal zong kan chuahnak a si! Camp Victoria office ahhin riantuantu pathum kan chiah hna (atu cu pahnih lawng an si rih, pakhat kan kawl lio) i cuka cun zarh fatin cawn ninga (Friday) paoh ah Journal kan chuah cang lai!
Journal ahhin ramchung ramleng in catial thiam hna nih ram le miphun caah san a tlai dingmi ca tampi an kan tialpiak lai! Ramleng a ummi hna nih Lai lei khuami hna, ralhrial in a zammi hna le miphun ralkap hna caah hlut piak khawh a si lai!

Kannih cu dohthlennak ah media kha meithal ah hmangin rian a tuanmi kan si! Dohthlennak a dih hnu zongah media hmangin ram le miphun caah riantuan kan pehzulh peng lai!
Salai CP Lian CEO August 20, 2022. Credit : The Chin Post

Be the first to comment

Leave a Reply

Your email address will not be published.


*