Malaysia ram, Kepong khua, Desa Jaya lamton pawng i hlei cung in hringtu pa nih a thlakmi hna ngakchia pathum lak ah sizung ah an chiahmi ngakchiapate cu ICU a umnak in a hun i hlau cang, tiah Malaysia ram Myanmar mibawmtu nih thawng an thanh.
Aluancia August 2, zinglei sml. 5:30 hrawng ah khan Thantlang peng, Meisakotla khua (Fartlang) khuami Pu Chohlei nih a fale pathum cu hlei cung in a thlak hna i amah zong a zuang ve. Pu Chohlei le ngakchia pahnih a nunnak a liam i, a hnaing bik kum 3 hrawng a simi ngakchia pate hi lamkam hramh cung ah a tla i nun him in a um.
Ngakchia pate aa hlauh lecangka in “Ka pa, ka unu le ka upa hmuh ka duh hna,” tiah a nu sin ah a chim. Ngakchia pate hi dam lei a hun panh ngai cang nain hlei cung in a tlaknak ah aa khawnmi a hnak, a lu le a kee hi thlopbul rih an hau, tiah mibawmtu nih thawngthanhnak an tuah.
Leave a Reply