Tharsi ah LPDF Sakhan Cu SAC ralkap Nih An Luhhnawh I, Sakhan Chung Kahdohnak Ah SAC ralkap 12 An Thi! Mandalay ramṭhen Tharsi (သာစည်) peng Myatkhain (မျက်ခါးအင်း) khua pawng i Black Brother, LPDF SINTGAING le Future Star PDF nih hriamthil an sernak sakhan cu SAC ralkap nih an luhhnawh caah kahdohnak a chuak. Cu kahdohnak ah cun SAC ralkap 12 hrawng an thi i, cu sakhan cu kan kaltak, tiah LPDF in chimphuannak nawlngeitu Joeka nih Media ah a chim.
SAC ralkap nih LPDF sakhan cu a luancia July 25 le July 29 ahkhan luhhnawh in an rak kahdoh hna. Kaphnih kahdohnak cu a fah deuh caah SAC ralkap nih thazaang an chap i tualchung hriamtlai phufonh lei cu hnu an tolh, tiah theih a si.
LPDF sakhan an luhhnawh hnu ah SAC ralkap hna cu Kyaukpachoh(ကျောက်ပချုပ်) khua le Myatpain(မျက်ပါးအင်း) lei ah kal in khuami inn 4 cu meikhangh in an hrawhpiak hna, tiah theih a si.
thawngpang dang relchap : Uknak Kan Laak Hnu In Thla 18 Chung Ah Tualchung Mi 6200 Leng Kan Tlaih Hna – Min Aung Hlaing
Uknak Kan Laak Hnu In Thla 18 Chung Ah Tualchung Mi 6200 Leng Kan Tlaih Hna Tiah Min Aung Hlaing Nih A Chim: Febuary 1, 2021 in July 2022 thla dih tiang ah tualchung mi kan tlaihmi hna hi 6,236 an si cang, tiah nihin August 1, 2022 ah SAC Chairman Min Aung Hlaing nih a chim. Uknak an laak hnu kum khat le cheu chung an ṭuanchuah khawhmi thil tete a chim pah in Min Aung Hlaing nih tualchung mi an tlaihmi hna zat cu a telh chih.
Kum khat le cheu chung ah bomb puahnak voi 7246, kahthahnak voi 6567 le meikhanghnak voi 1094 a chuak i, hriamnam phun phun in kahdohnak cu voi 6311, zen phunphun in kahdohnak voi 335,184 a chuak. Kutcheh bomb lung 11,715 kan laak, tiah Min Aung Hlaing nih cun a chim. A thimi hna chung ah phungki, cozah rianṭuan, ngakchia, uknak lei he aa pehtlaimi hna le mi sawhsawh(civil) 3483 leng an si. Hliam pumi 3065 an um i, a tlaumi 41 an um, tiah a langhter.
Kahdohnak vialte chung ah Sagaing ramṭhen ah voi 4026, Yangon ramṭhen ah voi 2442, Mandalay ramṭhen ah 2194, Magwe ramṭhen ah 1359 kahdohnak a chuak. Thongtla zohkhenhtu phu, AAPP cazin ning ah SAC ralkap nih uknak an laak hnu in July 29, 2022 tiang ah tlaih a tongmi hi minung 11,820 an phan i, cu chung ah 1364 cu thong tla mi an si, tiah an langhter.
Gangaw Peng Khuate Ah SAC Ralkap Le Pyusawhti Nih Kum Tling Lo Nu An Tlaihhrem Hna!: Magwe ramṭhen, Gangaw peng khuate cheukhat ah SAC ralkap le Pyusawhti nih kum tling lo nu an tlaih hrem hna, tiah Western Regional Military Headquarters PDF ṭuanvo ngeitu nih a chim.
Gangaw peng khuate cheukhat ah July thla chung internet line an phih pinah SAC ralkap nih Vanlawng in voi tampi kahdohnak an tuah. Cu ruangah khuami hna nih an inn le lo an zamtak hna, tiah theih a si.
SAC ralkap nih kahdohnak a chuahnak hmun paoh cu phone le internet line an phih dih. July thla chung ah Gangaw, Htilin le Kalay ah rallam an sial i, nihin tiang Vanlawng aa hel lengmang ko, tiah Western Regional Military Headquarters PDF ṭuanvo ngeitu nih cun a chim. Credit : The Chin Post
Leave a Reply