Aizawl Ah Myanmar Mi Sinin Rithaisi (bingrang) Tlaih Than A Si

Aizawl Ah Myanmar Mi Sinin Rithaisi (bingrang) Tlaih Than A Si!
================================
Mizoram ramkulh, Aizawl, Zuangtui sang ah, nizaan September 12 ah, Myanmar mi sinin bingrang kan tlaih tiah, Mizoram palik nih an thanh. YMA nih rithaisi dohnak caah tiin an dirhmi phu, Central Anti Drugs Squad(CADC) hna nih an thanh ning ah cun,” Bawngkawng palik hna cu, nizaan September 12 zaantim ah, Zuangtui ah an ra i, checkhlatnak an tuah tikah, Kalaymyo peng,

Eisuak(အိပ်စွပ်) khuami, Mizoram Zokhuathar ah khua a sami pakhat sinin, bingrang 205 grams an tlaih tiah,” an chim. Bingrang an tlaihmi man cu, tulio thilman rate in, Rupees sing 100 man a si i, cu an tlaihmi pa cu, Bawngkawng palik sakhaan nih a herh ningin dantatnak an pek lai tiah, theih a si. Credit : The Chin Post

thawngpang dang relchap : Rakhine ramkulh chung kahdohnak ruangah Maungdaw khuachung ah ralzaam 800 leng an karh

Rakhine ramkulh, Maungdaw peng chaklei ah SAC ralkap le AA kar kahdohnak a fah caah, tualchung mipi 800 renglo cu Maungdaw khuachung ah an i dor tiah mi bawmchantu phu hna nih media ah an chim.

Hkamaungsait(ခမောင်းဆိပ်), Yanaungpin(ရန်အောင်ပြင်), Mitait(မီးတိုက်) telh in khua 10 leng in khuami hna cu ralzaam dirhmun an phan i, Maungdaw khuachung phungki sianginn hna le ralzaam sakhan ah dorter an si tiah an chim chap.

“Tukar hrawng cu SAC ralkap le AA kar i kahdohnak cu a fak ngai, SAC ralkap lei nih hriamngan an hman leng ah raltuknak vanlawng hmang in kahdohnak an tuah caah atu bantuk ralzaam dirhmun kan phanh hi a si” tiah tualchung mi pakhat nih a chim.

“A liamcia thla chung ah khan a zaam mi cu an um pah cang hna, tukar hrawng cu kahdohnak a fak i SAC ralkap nih hriamngan le raltuknak vanlawng hna an hman caah khua kiangkap ah hriamngan an tla, khuachung ah kan um ngam ti lo caah Maungdaw khuachung ah kan i dornak hi a si. Hmundang ah a zaam mi zong an um ṭhiam, Maungdaw khuachung ah ralzaam dirhmun in a ummi 800 renglo kan si cang” tiah a chim chap tiah theih a si.

Maungdaw peng chaklei ah a luancia July 18 thok in SAC ralkap le AA kar fakngai in kahdohnak a chuak. September 10 ah, Maungdaw peng thlanglei ah ummi SAC ralkap khah-mah-yiah 352 sakhan pakhat cu lakpiak an tong i, ralkap 4 le hriamthil tampi kan lakkhawh tiah AA nih cathanh an rak chuah. Credit : The Chin Post