Yinmapyin pengkulh chungah Kawl ralhrang nih an bochan taktak mi le an hruaitu (တပ်ကြပ်ကြီ:) Myin Thu cu Yinmapyin PDF Tat-yin 3 sinah a hriamnam tling he CDM a rak tuah caah PDF pawl nih laksawng ah Ks ting 80 an pek ve tiah PDF nih thawngthanh nak an tuah hi asi.
Ralhrang uktu (တပ်ကြပ်ကြီး) Myin Thu nih a chim ve mi cu “kan chungkhar le unau harsat nak an ton ding kan duh lo ruangah kan cohlan khawh ve lomi ralhrang uknak tang ah le nawl ngeihnak taangah um in mipi harsat nak phunzakip pek le hrem hi kan celh ve hrim ti lo, caan sautuk chung cu tlik le zaam hi kan duh ko nain hmunhma le caan sining nih an kan pek lo caah ralhrang riantuan in mipi harsat nak ken pek hna hi asi.
Ka hawikom pawl zong tlik le zaam a duhmi tampi an umko nain an chungkhat pawl cu ralhrang sakhan i an chiah hna ruangah le hrocernak tamtuk an ton ruangah an rak zaam kho rih hna lo hi asi” tiah ralhrang hruaitu nih cun a chim hi asi.
Hriamnam tling te in CDM a rak tuahmi ralhrang hruaitu တပ်ကြပ်ကြီး Myin Thu cu Yin-Ma-Pyin khuami le mipi nih sunglawi tein an don hnuah laksawng ah tiin Ks ting 80 an pek hi asi tiah thawngthanh nak an tuah mi ah cun hmuh asi.
Leave a Reply