A Poi Tuk Ee: Depeyin Pengchung Sianginn Pakhat Kahdoh An Ton Caah ngakchia 11 Nunnak A Liam Mi Kongah UNICEF Myanmar Nih Cathanh A Chuah!

Depeyin pengchung sianginn pakhat cu SAC ralkap nih vanlawng hmangin kahdohnak faktuk a tuah caah, a tlawmbik ngakchia minung 11 nunnak a liam mi kongah UNICEF Myanmar nih nihin September 19 ah cathanh an chuah.

A luancia September 16 lio ah khan, Depeyin pengchung sianginn pakhat telhin tualchung mi hna an umnak cu SAC ralkap nih ralringlo ngai in vanlawng he kahdohnak a tuah caah, a tlawmbik ngakchia minung 11 nunnak a liam tiah an thanhmi ah cun an langhter.

UNICEF nih fale nunak a sungmi nu le pa chungkhar hna caah nan ngaihchiatnak kan in hrawmpi hna, thil sining fiang tein fehter khawh kan i zuam” tiah an langhter.

Kahdoh an tonnak sianginn in siangngakchia a tlawmbik minung 15 hrawng an tlau caah UNICEF nih a tlaumi ngakchia him tein an kir khawhnak ding caah nawlnak an tuah. Ca cawnnak sianginn cu a himnak hmun a si ding a si i, ngakchia hna cu zeitik hmanh ah doh ding an si lo tiah theihternak an tuah fawn.

Cathanh an chuahmi chung ahcun SAC nih ngakchia an thah hna tiah sualpuhnak hmang loin, vanlawng hmangin kahdohnak, i ralringlo ngai in kahdohnak an tuah tiah UNICEF Myanmar nih an cathanh chuahmi ah cun an langhter.

Ref:People’sSpring

Be the first to comment

Leave a Reply

Your email address will not be published.


*