330 Khuapi Aum Mi Lak Ah 200 Leng cu CDF / PDF Nih Kan Uk Cang

Paucan Dohthlennak ka TEI lai maw? Dohthlen Can asau lai maw, tiah Biahal nak atam ngai. A dikmi aphi khawh mi kan tlawm te lai. Kaa khat hnih in phi khawh loin Phihlik tlangvelh in chimhrel cio asi. Mipi nih tei kan duh caah mipi a tei ter tu kan tam deuh lai. KIA, KNU, KNDF, KNLA, CNA/CDF/CNDF teinak lawng in Rallokap kan thluk cang hna ti awk ah asi kho maw? Tlangcungmi ram lawng ah kan TEI hna, kan that hna, Kawlram huap in MAH kan tei cang kan ti ah tah, nan cohlan khawh lai maw? Rallokap minung hna nih Rallokap tu an kan TEI ter ve.

NUG Upa Luban le CDF Upa hna bia ning in cun, kan tei ko lai nain, atlawm bik kum 5-7 kan rau lai ti cio asi. Nangtah zeitin na tuak I na ruat ve. Kan TEI dengmang, a rau ti lai lo; ati tu vialte cu mifim le ram dawtu ah cohlan an si I, kan tei rih lai lo, a rau rih lai ti ahcun Dalaan mit in zoh bak kan si ve. Kan Tei khawh lai lo ti ahcun; Mipi bia in thih khawh asi ve.

Uknak Chuttu MAH nih SAC in an kan uk hi 2020 February in a si cang nain ṭha tein an kan uk khawh Naisai rihlo. SAC uknak hi a karh lei si loin a ṭumchuk lei tu ah Nikhat hnu ni khat a panh chin lengmang. Ahnu ah uknak an rawk dih ko lai. Mipi ṭhithruai tu ding cozah le minung kan herh cawlh te lai. Culocun mipi cu uktu le khalh tu ngeih lo Tuufa bang kan vaivuan dih te lai. NUG cu Ramdang in / Online lawng in cozah an si caah a hmunhma ah an kan uk khawh rih lo.

NUG kusale rual nih le bawmh nak phaisa ah an I za. An chuak ka in an hmuh ballo mi Phaisa tawmpi le Dollar relcawk lo asi tikah; an mawh lo. Zeitindah ka fir khawh lai, ka hlen khawh hna lai, ka rum te lai, tbk lawngte khua an tuak nak ah CHINLAND cozah tuah tiang an philh. An vang an I karh le nuam hih, an ti, an ham, an ngut, an Mitkuh a thaw, an I mawi I an I zaa ko.

CDF dirh hlan ah Chin Cozah ser awk ah ICNCC cu riankhinh asi ko nain, Tutiang an ti khawh lo. Statements chuah zungzal in Bawmhnak phaisa I lak zungzal kha an nunphung asi cang. Chin Cozah ser in, khuate lei tiang cozah ser ahcun an sin ah Ramdang bawmh nak Dollar tawmpi a um ti lai lo an ruah ah hri awk hmanh an ngamh cang. An fir lo ee a ka ti tu pa / nu nih lung in ka chep hmasat seh.

Kawlram ah khuate (65148); Tract (Uksuh) 13742: Veng (Khuapi) 2548: Myone 330: District (Khazai)63 (SAC chap mi aa tel rih lo). SAC le mipi nih hmunhma hip le ukkhawh kha I zuamcawh asi. Uknak an lak ri in, PDF CDF nih hriamnam tlaih hlan ah Pyithuh Ukchukzi phu cu dirh cio asi. Abau mi khuate kip ah CDF nih Pyithuh Ukchukzi cu an tuah nolh ṭhan.

Cucaah CDF / CNDF / PDF / LDF nih Khuate vialte cu Pyithuh Ukchukzi in kan uk hi, kum khat leng a kai cang. ICNCC zong a rian aa limh ah aa cang. An pension a herh cang ko. ICNCC cu Chin Pine Uktu le cozah sersiam awk ah an rian aum ti lo caah, I dinh cang ko hna seh. CDF nih Khuate in Uksuh. Uksuh in Myone, Myone in Pine tiang uknak an tuah dih cang. Kumkhat leng asi cang. Cucaah ICNCC nih CDF le Pyithuh Ukchukzi hi hnahnawk ti hlah uh, Dai tein I din cang ko rawh uh.

Anmah CDF nih uktu ding in an in sawm hna belte ah: lungtho tein le lunglawmh tein cohlan ko uh. CDF cu raltuk lawng an thiam I, uknak cu an thiam lai lo caah Mifimthiam le Khua Nupa cu uknak nawl an pek cang hna. ICNCC cu Pine le Myone tu ah rian khinh ah aa ningcang bik lai caah, nan duh ko ahcun, CJDC ah sawk ko hen uh, zeihmanh I faksak ding aum lo. Raldohnak ah CDF kutke kan toh bangin Uknak zong ah anmah kutke toh cu I faksak duh hlah hen.

SAC nih Khuapi 330 kha ka ukkhawh ahcun Mipi ka uk khawh hna tiah aa ruah nain asi tilo. Mipi ukpen nak le Ramkhel hi khuate tu ah a rak um diam. Thantlang Khualipi ka hrawk dih ahcun Thantlang peng ka uk khawh lai tiah SAC nih an ruah nain asi ti lo. Kawlram khuapi 330 lakah 200 leng cu Pyithuh Ukchukzi nih an uk. 130 lawng Rallokap nih bultan in an uk khawh. Khuate kip cu CDF/CNDF/PDF nih an lak dih cang, an hip dih cang. Federal Uknak Hniksaknak caah khuate cu an hmang cang hna. Uknak, Biaceih zung le Upadi suaitu (CHIN Acts le ṭhanchonak Upadi) pathum cu ṭha tein khua ah aa merh cang. Fimthiamnak le Ngandam nak zung zong special an si dih.

Hlanlio nak hmanh in aa special dueh. Uktu, Biaceih bawi, Upadi thiam hna cu a hmun khuate ah um in, mipi cu an hruai hna. Myone asi khawh lo nak ah: aatlak bik mi hmunhma le khua pakhat kha an thimh I, cu ka cun Myone uknak cu CDF nih an thawk cang. Pine zung umnak belte Hakha asi khawh lai lo caah an hlat cuahmah lio. Ramthumnak, Ramdang, Aizawl tbk in uk cu asi khawh lo nak lawngte asi. Cucaah ICNCC member cu uktu si nan duh ahcun nan rak kir a herh. Aizawl um buin Online le Zoom Meeting in hruai le uk ci asi lomi Federal Uknak asi. Myone uknak cu CDF center ah an si ngawt dih. Cu caah CHINRAM cu Myone (9) lawng uknak in asi khawh ti lo.

CDF he CHIN cozah si awk cu ICNCC nih CDF anaa tinh nan duh hna caah, buainak aa thawk nak asi. CHIN cozah ah I tel a duh mi ICNCC member cu: CJDC ah sawk khawh asi. CJDC ah surrender tuah in lut khawh asi. Nanmah tein cawlcangh ti hlah uh, Nannih cu 2008 phunghrampi ning in nan nung ko nain, NUG nih a thah caah thah chih nan si zong kha nan philh lo ah a ṭha lai, Bawmhnak phaisa caa lawng ah thluak ṭhat ding nan silo.

NUG nih meithal nan bawmh khawh lo mi / nan bawmh duh lomi / PDF le LDF cu nan kal tak thluahmah hna. Hi hi asi awk asi lo. Nan pehtlaih thotho hna lai. Hriamnam lawng si loin adang nan bawmhchan khawh mi lei tuin nan bawmh hna / ruahnak nan cheuh hna a herh ko. NUG kuttang PDF LDF nakin, nan hlawt mi PDF LDF nih ral an doh deuh, nunnak le thisen an pek deuh ti hi NUG nih philh ti hlah uh. NUG kusale le ICNCC chungtel an fello nak CHINRAM cu NUG nih nan pehtlaih thotho hna a herh ko.

Ralhrang kan thluk tikah NUG cozah special asi khawh nak hnga, Rallokap a doh tu bu kip he remh tein le tangdor tein, dongcat lo tein NUG nih pehtlai a herh zungzal ti hi philh lo ding asi lai. ICNCC member hna nakin CJDC he CHINRAM nan hruai ah eibar a chuak lai ti hi NUG nih hngalh ding. Ruah lo pin Rallokap kan thluk tikah, CHINRAM tluang tein Ukhruai khawh kha abiapit mi asi caah CJDC he nan si khawh bik lai. Rallokap kutin uknak lak in Rampi hung hruai ding hi tuak hmanh uh, Sipuazi le Zatlang nun an rawk dih cikcek cang.

MAH nih an kan tei lo ding kha a hngalh tuk cang caah Raltuknak Vanlawng in thah dih lawlaw an kan timh cang. Uknak lak ruang ah Sipuazi le Mipi harsatnak cu Covid pulrai nih a zulh rih caah, Thinghmui hma ngeih le thakpher ngei buin, mifir le Damiah he I tawn bantuk asi. Rampi Milurel 2/3 cu Eidin tirawl kan harsa, ¼ cu ei awk a ngeih ti lo mi kan si. NUG nih Hriamnam nan bawmh lo mi nan pehtlaih hna aherh nak cu: Sifah Retheih mi chanchuah, Ngandam nak lei, Fimcawnnak lei le Humanitarian tbk in mipi chanchuah awk ah rian tampi nan ṭuan khawh rih caah asi.

Zohhmanh, Ralzam le IDP 1000000 leng an um mi ah 800000 cu khuate lei an si. CDF nih an si khawh chung in ṭuanvo an lak hna. Ramthumnak ah aum mi CHINMI cu CDMers, Fimcawnnak, Ralzam, IDP, Ngandam nak, Khua ṭhanchonak, tbk tiang in ṭuanvo an lak dih.

ICNCC kutneh aum lo hi CHIN khuate lei ah. CHINRAM hip aduh mi NUG a si ahcun; ICNCC kha hlawt uhlaw, CDF tu he I pehtlaih cang uh, Ramdang ah nan santlaih lonak phuang asi hlan ah.

Paucan Dohthlennak ah Rallokap hi hmakhat te ahcun an sung khawh lailo. Raldohnak kip ah kan tei lengmang ko hna, nain kan thluk khawh hna lo. Rallokap hi a ngawr mi bang duhsah tein aa hrim lengmang ve lai I, harsat ngai in an kan doh zungzal lai caah: Raldohnak hi a chan asau lai kan ti nak cu asi. MAH nih Rallokap cu 500000 kan si ati nain, 350000 lawng hi si dawh an si. Raldoh khawh mi hi 100000 leng lawng an si.

Tampi kan thah cang hna caah 80000 hrawng hi punghman tein Raldoh ding mi Rallokap an si. NUG Mahameih EAO phu 5 (NCF, KIA, KDNF, KNU, KNLA) le NUG kuttang PDF 50000, NUG kuttang lo Mahameih PDF LDF 70000 vialte hi hmunkhat fumton khawh sehlaw, Ralbawi pakhat order le command tangah Raldoh khawh si sehlaw: ni khat ah hmunhma 20 tal ah Raldoh zungzal khawh usih law: MAH cu a rau hlan ah kan thluk hrim lai. Nain NUG nih ati khawh bak ve lo mi hi apoi cem mi cu asi. AA le UWSA kha Raldoh cang dingin NUG nih an sawm khawh hna ahcun: TEINAK kan hmuh tuan ve lai.

Rallokap hi 1950 hrawng in Ramkhel ah pumpi in an rak lut cang. Kawlram Ramkhel ah anmah Rallokap an um zungzal caah, Kanmah loin Kawlram asi khawh lo an ti cang. Kanpi Suu aum lo ah kawlram asi khawh ko. Rallokap aum lo ahcun asi khawh lo an ti.

Cucaah cihmih an herhnak cu asi. Doh an herhnak cu asi. Ramkhel ah an lut bakin Rampi phaisa, Natural Resources, Dollar le Ramdang in a lutmi phaisa, tbk vialte cu tawh an tlaih dih, chakhri an tlai dih. U Pai Co. Ltd; Crony le an Kawidua Sipuazi tama le Co. Ltd tiang in Rallokap kuttang ah an chiah khawh dih hna. Hlan ahcun Phaisa an ngeih lo.

Tu ahcun phaisa an ngei, mi fimthiam tampi an ngei caah, kum 70 chung fek tein a dir cang mi Thaizing kiptuh ah kan thluk lai ti cu asi khawh ve lo. Cuticun a tlangpi le Theory in tuak ahcun: adik ngai mi a lawh ko nain, a tak in thil asi mi ahcun asi tilo. Rallokap 100000 fai lawng nih ral an doh hi asi. 80000 hi biatak tein Raldoh mi an si. Cucaah MAH le Rallokap hi thluk an fawi te, ṭih hna hlah uh kan ti tawn cu asi.

Rallokap 80000 lawng he aa doh mi kan si nain kan thluk khawh lomi hi apoi cemmi cu asi. Anmah nakin kanmah kan tam deuh ko nain, kan thluk khawh hna lo caah, kan ngawl a ngah lo kan ti nak cu asi. Chinland, Karenni, Karen, Chaklei, nichuak chaklei, nichuak lei hi tamdeuh in Rallokap an kuat hna. Cu ram ahcun KIA, TNLA tbk in Tlangcung mi hriamtlai mi phun 20 leng an um. Anmah EAO bawmhtu PDF le LDF he pehtlaih nak an ṭha khun.

Mobile le IT chan kan phak cang mi nih TEITU dirhmun ah an kan phan pi. Pehtlaihnak an ṭha I, thazang kan ṭhawn chin ve. Cellularised Warfare he aa zikmawi mi Rallokap an si cang. NUG Thanh ning ahcun: Rallokap hi tamtuk an thi cang. 2000 leng nih CDM an tuah. Rallokap lutter awk ah PDF cheukhat zong surrender an tuah cang. PDF LDF he remhnak tuah zong a poi an ti ti lo.

Raldohnak I ngawl ta in, Rallokap thazang chap an duh caah, PDF he PEACE tuah ka duh tian a au len. Loudspeaker bak in khuapi lam le zalam tlang ah an sawm hna. Poster le Vinyl zong in an tar. PDF LDF he Peace tuah lio ah Rallokap thazang tampi chap kha an planning asi. PDF LDF he Peace tuah lio ah Rallokap thazang tampi chap kha an planning asi. Tatzinhmu le Tathmu atu le tu an thlenmi sullam cu: an kan tei tilo tinak asi.

Ramdang phihnak nih, Rallokap phaisa lutchuak le hriamnam an cawk mi lamthluan cu an phih khawh lo. Hlan Bantukin punghman a si; SAC nih khuapi lawng an hip khawh. Cu hmanh ah PDF LDF an Thawngṭha nak khuapi cu an uk khawh ve baklo. CDF CNDF an ṭhawnnak Khuate ah Rallokap nih ukkhawh ding cu asi kho lo. Cazin ning in cun, Khuapi 330 lakah 200 leng cu PDF LDF nih an hip dih cang hna tinak asi. EAO cheukhat cu: an ram an kau ter deuh hna, CHINRAM belte amah ning in Kanram bitkauh asi ri. AA tu ni Paletwa chut an kan duh fawn.

Cunglei kan phuang mi zoh tikah, Rallokap nih tluang tei kan uk khawh cang an ti mi cu an hrawkhrawl tu a rak si deuh. Kanmah tu nih kan thluk deng ti ah adik dueh lai.

Rallokap hi a sungh zong ah aa hngalh ter lo. An sung dueh deuh mipi an kan doh dueh asi ve. Hi ti hin a kal lengmang lai, aa hrim leng mang lai I, Raldoh can hi a sau ko lai.

NUG nih maw, Ramdang um chin mi dah, MAH thluk khawh ding in hriamnam nan kan bawmh khawh ni cu Ralhrang kan thluk ni asi ve lai, tiah Dohthlen caan asau lai mi tiah biahal tu hna cu kan leh hna. Ral teinak cu mipi sin ah aum. Kan bawmh rih uhlaw, kan pek rih ko uh. Nan Retheih tuk cang ko lai nain, Teirial rih ko usih. Credit: Zingtincuai Cinzah

Be the first to comment

Leave a Reply

Your email address will not be published.


*