UFC Thongh Thiam Mi Nungak Nih Mifir Pa A Phomh Hi Cu A Thah Deng Ko

Thisen zong chuak dih lak in thongh sport a simi UFC(Unlimited Fight Championship) timi hi ttih a nung tak takmi a si i pa a tam u nih an ngamh lomi zong a si. Cu bantuk UFC thongh thiam si khawhnak ding ah cun i zuamnak tampi ngeih a herh i mah le mah i uk khawh zong a herh tukmi a si. Pumsa nuamhnak le zu/sa leipang ah i sum tak tak a hau i mi sawh sawh bantuk in nung awk a ttha lomi sport a si. Cu caah UFC thawngh thiam a tam u hi cu leng an chuahvahnak ah mi nih an ttih hna i an dai ngam hna loh.

An mah zong nih an thonghthiam an si kha an i theih ve caah mi nam va neh kha an i sum tuk ve hna. A tu zong UFC thongh thiam kum 26 a simi Polyana Viana hi Brazil miphun a si i min ngei UFC thongh thiam a si. Zan khat cu Jacarepagua ah taxi a ngah lio ah pa pakhat nih suimilam zeizah dah a si cang tiah a rak hal. Polyana Viana nih cu pa a halmi cu a leh nain cu pa cu kal colh loin Polyana Viana pawngkam ah ai chawk ai let.

Zan ttim a si caah mi chawklet an tlawm i mifir a si theo lai tiah a lung hrinh cia cang. Cu caah a phone cu a angki zal chungah a senh colh. Sinain cu pa nih cun a hakmi pakhat khat in Polyana Viana keng ah a doh i a phone cu a hal. Polyana Viana nih meithal/namte tak tak a si loh timi a theih hnu in liklak tiah a UFC thiamnak cu a hmang i mifir pa cu a tthuat ne ai!! A lo ko mifir pa cu, nu sawh sawh ah a relmi cu UFC thongh thiam a rak si caah chikkhat teah a hmai cu a duk dih.

A kut tum he a ke he a tthuat ciammam i mifir pa cu a celh ruam ti lo caah a tlu. Polyana Viana nih UFC ai thonghnak ah a mi teinak a simi a kuat hmang in mifir pa cu a hrom a reh. Mifir pa cu zei ti hmanh in ai phoih kho ti loh i heh tiah ai sual len cang ko. An pawngkam minung pawl cu police auh piak dingin Polyana Viana nih bawmh a hal hna. Mifir pa zong nih ka thi cang lai hih, police au zawk zawk hna uh tiah a au pah ve. A tu cu police pawl nih mifir pa cu an kalpi cang i a van ttha lehlam tiah chim khawh a si.
Ref:Daily Mail

Be the first to comment

Leave a Reply

Your email address will not be published.


*