Ralhrangbu Caah Hrawh A Har Tukmi Chin Miphun Dothlennak Thir Vampang Pathum: Salai Henry Lian (US)

Hramhram in nalwngeihnak latu Ralbawizik Min Aung Hlaing hruaimi ralhrangbu caah Chin miphun dothlennak cu dawnkhamtu hling pakhat a si. Chin miphun, Chin dothlennak le Chin puahceh meithal hna cu rampi nawlngeinak lak a timtu ralhrangbu hlawhtlinnak dawntu ngan bik pakhat a si ve.

Chin miphun nih vawleicung ralpi pahnihnak lioah Mirang le Japan cu kan rak doh hna. Zalennak kan hmuh hnu zongah Chin miphun ralkap (Chin Rifles) hna nih rampi caah zumh an tlaknak le an i pumpeknak cu Myanmar ram tuanbia cahmai ah a um peng cang lai.

Chin miphun hna hi zalennak kan hmuh hnu ah Pyimah (Kawlrawn) he hmunkhat ah kan dir peng. Ne Win nih nawlngeihnak a lak i Revolution Council (တော်လှန်ရေး ကောင်စီ) chan a phak hnu lawngah dothlennak rian ah kan i tel ve.

Cuticun 1988 ah Chin National Front (CNF) le Chin National Army (CNA) cu dirh a si i Federal Democracy kan hmuh khawhnak dingah ramkulh dothlennak an rak tuah. A tawinak in chim ahcun Chin miphun hna hi Democracy kan hmuh khawh nakhnga dothlennak ah kan rak i tel lengmang ti kha hmuh khawh a si.

Atu cu nawlngeihnak an lakmi a hlawhtlin khawh nakhnga ralhrangbu nih Chin ramkulh ah biatak tein kahnak a thok cang lai. Zeiruangah ti ahcun Spring Revolution nih Chin miphun dothlennak a hrin caah a si. Asinain ralhrangbu nih Chin miphun dothlenak hi fawitein a hrawk kho lai lo. A ruang cu Chin miphun dothlennak cu a fek tukmi thir vampang pathum in dirh a si.

Chin National Front (CNF) le Chin National Army (CNA): Ralhrangbu nih an pal/lonh hmasa a herhmi pakhatnak thir vampang cu Chin National Front (CNF) le Chin National Army (CNA) hi a si. Ralhrangbu nih CNF/CNA hi zeiah a rel lo, a nihsawh ngaingai. Min Aung Hlaing nih media pakhat he biaruahnak ah “CNF kha maw? Zeihmanh buai ding a um lo. CNF cu hmasa te khan hriamtlaibu an si lo pi. A hnu lawngah U Aung Min te nih mah hna zong hi cozah he biaruahnak ah phungning tein aa telmi an si caah telh ve ding an si a ti i mahca cun tatmadaw nih kan cohlanmi a si ko lo maw. Zeihmanh an ngei lo i zei buainak hmanh an tuah fawn lo” tiah a chim.

Chin National Front cu Chin miphun aiawh hriamtlaibu a si i March 20, 1988 ah dirhmi a si. CNF tinhmi cu mahtein i uk khawhnak, miphun tlukruannak le democracy hrambunhmi Federal Rampi ser ding hi a si. CNF nih aa tinhmi hna cu Panglong biakamnak ah khan hram a bunh.

CNF an dirh hnu tlawmpal , November, 1988 ah Chin National Army – CNA zong dirh a si. Federal Democracy kan hmuh khawh nakhnga Chin miphun nih dothlennak kan tuahnak kum 33 a tling ve cang. Hi chungah Chin miraltha 70 leng nih ram le miphun caah nunnak an pek.

CNF cu Jan 6, 2012 ah Chin ramkulh cozah he Union level in remdaih minthutnak an ngei. Cun October, 2015 ah ram pumpi huap kahdaih hnatlaknak (NCA) ah min a thumi hriamtlaibu pakhat a si.

Cu pinah kum 10 chung a theipar a um lomi remdaih khuakhannak rian ah an i tel peng. CNF hruaitu hna hi Myanmar ram politics le tlangcungmi politics kongkau ah hruaitu dirhmun in an i telnak tampi hmuh khawh a si. Cu lawng si loin CNF cu caankarlak cozah NUG he riantuanti dingin May 29, 2021 ah hnatlaknak an tuah. NUG he hnatlaknak a tuah hmasa bikmi hriamtlaibu an si. Hihi indirect in ralhrangbu zuamcawhnak pakhat a si. Cun Chin miphun hruaitu hna i a dikmi biakhiahnak, a fekmi zumhnak, a thawngmi lungthin le ralthatnak hna zong a langhter hlei ah hriamnam i bochan in midang a namnehtu Min Aung Hlaing le a ralhrangrual hna tihnak pakhatte hmanh an ngeih lo zia zong a fianter.

Ralhrangbu nih zei ah an rel lomi CNF/A cu atu ah cun Myanmar rampi nih Federal Democracy a hmuh khawhnak dingah Chin miphun le Myanmar rammi hna caah bochan awk a tlakmi Chin ralkapbu pakhat dirhmun in mipi hmaiah a dir i ralhrangbu dohtu a si cang.

Cu lawng si loin CNF cu Chin ramkulh chung Chinland Defense Force dirhnak ah a herhmi ral lei thiamnak le hriamnam a bawmtu a si. CNF dirkamhnak le lamhmuhsaknak thawngin CDF cu biatak tein ralhrangbu a dohtu an si cang.

Chin ramkulh ah a ummi Chin mino 15,000 hrawng cu raldoh cawnnak an dih cang i ralhrang dohnak kip ah an i tel cang. Chin ramkulh lawngah si loin Sagaing le Magway ramthen zongah CNF nih mino tampi raldoh an cawnpiak hna. Atu hi ramchung ramleng a ummi Chin mipi hna nih CNF tha an pek bik caan a si. Emergency National Security Fund (ENSF) ah US $ nuai 7 (7 million) leng Chin mipi nih dothlennak i hman dingah an thawh cang. A dang an thawhmi zong a tampi.

Hi nih hin Chin mipi nih ralhrangbu kan duh lonak le huatnak a laughter. Myanmar ram dothlennak tuanbia kan zoh tikah mipi nih dirkamhmi MIPHUN RALKAP hna cu an sung bal lai lo.

Zei ah an rak rel lomi CNF/A, a pakhatnak thir vampang hi Min Aung Hlaing hruaimi ralhrangbu nih an hrawk kho lai maw?

Chinland Defense Force (CDF): Ralhrangbu nih an pal/pah dingmi thir vampang pahnihnak cu Chinland Defense Force (CDF) hi a si. 8888 dohthlennak nih CNF a hrin i 2021 Spring Revolution nih CDF a hrin ve ti khawh a si hnga!

Puahceh meithal he Mindat in aa thokmi dothlennak cu atu ah cun Chin ramkulh dihlak ah a karh cang. Mindat kahdohnak a um hlan, Kalaymyo kahdohnak ah khan Chin mino zeimawzat an i tel. Chin miphun hna hi kokek sinak in ramvaih le sa kah a thiam ngaimi kan si. Pa paoh nih meithal a tlaihchanmi kan si.

Chin ramkulh chung peng (myone) kip ah CDF bu 15 a um. Chin ramkulh leng a simi Kalay-Kabaw Gangaw (CDF KKG) zong hlawhtling tein dirh a si cang. Hi nih hin Chin mino hna nih khongton uktu ralhrangbu le an hnuzul pawl cu an hram in coih i hrawh cikcek an duhnak lungut kha a laughter.

Hriamnam ah i thlau in milu tlawmtam ah kan tei hna hmanhsehlaw lungthin ah cun ralhrangbu le an hnuzul hna nih CDF cu zeitihmanh in an tluk hna lo. Mindat kahdohnak kha fiantertu a si ko. Puahceh meithal he ral a domi Chin miphun hna cu ralhrangbu nih hriam hme, hriam ngan, Helicopter le Vanlawng tiangin doh hmanhsehlaw atu tiang a tei rih lo.

Chin miraltha hna nunnak cu an lak khawh men ko lai nain a fekmi an lungput le a tlu kho lomi an zumhnak cu zeitikhmanh ah an hrawk kho lai lo. Cu lungput le zumhnak hi chan khat chan khat a nung cang lai.

CDF cu mipi chungin a chuakmi a si bantukin mipi nih za ah za dirkamhmi a si. CDF nih ralhriamnam, ti le rawl le zeidang an herhmi hna cu ramchung ramleng Chin mi hna nih an bawmh hna. Tutan dothlennak cu mipi dothlennak a si ti hi Chin miphun dihlak nih kan cohlanmi a si. Mipi nih an dirkamhmi CDF cu mipi an um chung a hmun ko lai.

CDF cu CNF/A he i bawm in kan ral nganbik a simi ralhrangbu dohnak ah biatak tein an i tel. Hi a pahnihnak thir vampang hi Min Aung Hlaing hruaimi ralhrangbu nih fawitein an pah kho hnga maw?

Chin Civil Disobedient Movement: Kum 2021, March thla dih ah Chin ramkulh cozah riantuan dihlak i 90% cu CDM ah an i tel cang. A hnuah cun Myanmar ramchung ramthen le ramkulh vialte lakah CDM a tuahmi an tam biknak kan si kho. Hakha le Thantlang lebangah cun CDM tuahmi 96% an si. Ralhrangbu hrocernak tam hmanhseh CMD tuah in dothlennak ah aa telmi cozah riantuantu 80% an si.

Chin miphun hna hi CDM hmual a ngeihzia le thawnzia theih khawhnak ramkhel fimnak kan ngei. Cucaah CDM nih khongton uknak kha hmualngei taktak in a kham khawh ti kan i fiang. CDM nih ralhrangbu nih nunter an duhmi seh (machine) riantuan kho loin a tuah khawh. Atu tiang ralhrangbu nih ram pumpi uk dih an i timhmi an hlawhtlinlonak a ruang pakhat cu CDM ruangah a si i cu kan theih ciomi a si.

Cucaah Chin CDM hi kan thawnter chinchin lai. Chin miphun nih ralhrang khongton uknak dohnak ah CDM phunglam hi kan human lai tiah biakamnak an ngei. C-CDM a tuahmi hna cu mipi an si ve caah ramchung ramleng ummi hna nih an bawmh hna.

C – CDM cawlcanghnak cu CDF nih a dirkamh tikah ralhrangbu nih an i ruah bal lomi dohlennak a chuak ko. C-CDM hmual le a thawnnak hi Min Aung Hlaing hruaimi ralhrangbu nih an celh te lai maw? Hi thir vampang pathumnak hi ralhrangbu nih an pah kho lai maw?

Federal Democracy kan hmuhnak dingah CHNF/A nih kum 33 chung hriamnam in siseh ramkhel biaruahnak in siseh ralkap khongtonna cu a dikmi lam in an doh. Cu dothlennak cu Spring Revolution nih a thawnter chin bantukin Chin miphun hna nih Federal Democracy dothlennak cu hrawh le pah khawh a si lomi thor vampang pathum CNF/A, CDF le Chin CDM in an dirh cang.

Cucaah Min Aung Hlaing hruaimi ralhrangbu nih an nawlngeihnak a hmunh khawh nak dingah thir vampang pathum hi an thawn a hau lai. A fiangmi cu Chin miphun dothlennak hi ralhrangbu caah dawnkhamtu hling pakhat a si, ti hi a si. Chin miphun hna nih “Dothlennak ah kan tei lai (အရေးတော်ပုံ အောင်ရမည်)” tiah au buin Federal Democracy kan hmuh tiang kan doh lai.

Theihternak: Salai Henry Lian nih The Irrawaddy News ah Kawlholh in a tialmi ka lehmi a si Catialtu Henry Lian hi America ram Kentucky state, Louisville khuapi ah a ummi a si. Southern Baptist Theological School ah Ph.D candidate pakhat a si. Lettu: Salai CP Lian

Leave a Reply

Your email address will not be published. Required fields are marked *