Ralhrang Nih Falam Peng Thlanrawn Khua An Khangh

Tuzingah Ralhrang Nih Rialti Khua Inn Pathum An Khangh Than, Thlanrawn Zong An Khangh Lio: Oct 13, nizan ah ralhrang nih Falam peng Rialti khua ah inn 8 an khangh i Oct 14, tuzing ah biakinn, kudawng le inn pakhat an khangh than . Rialti khua cu meikangh lo mi inn 3 te lawng a tang cang. Khuami hna cu a him nak hmun ah an zaam. Ralhrang hna cu nizanah Falam in an chuak i Rialti khua ah an riak. Ref: Zalen

Rialti khua in Hakha lei, Hakha le Kalay lam kam ah a ummi Thlarawn khua zong an khangh lio tiah thawng kan theih. Ca kan tial tiangah inn 3 cu an khangh cang i inn dang zong khangh thluamah an timh tiah kan theih.

Tamu Khua Pawngah Ralhrang Motor Tiva Chungah A Tla Bawmchantu Umlo: Sagaing ramthen, Tamu khua pawng Khaw Mun Nuam (ခေါ်မွမ်းနွမ်) le Yan Lin Fai (ရန်လင်းဖိုင်) khua karlak ah ralhrang motor a hmemi pakhat cu tiva chungah a tla nain ahohmanh bawmchantu an um lo tiah theih a si.

Mit in hmutu pakhat nih “A hramthok ah cun kanmah zong va kal in va zoh kan i tim ko nain pakhat a hung tho thanmi kan hmuh le cangka in kan kaltak colh hna. Zeibantuk motor hmanh nih an dirpiak lo. Motor chungah minung 5-6 hrawng an um hna i mah motor cu Khampat zongah ka hmuh zungzal mi a si. An thi ko lai, a ruang cu an motor tlak ning le lehning hi film chung i kan zoh tawn bantukin aa let dih. 4+4 motor phun a si i Khampat lei tlung ding an si rua, kannih kan hmuh lio caan hi zaanlei suimilam 3:00 tluk a si” tiah a chim. Ref: Zalen

Pharusu (ဖရူဆို) Pengah Ralhrang Nih RC Biakinn An Hrawh: Oct 13, nizan ah Kaya ramkulh Pharusu pengah ralhrang nih RC biakinn cu hriamngan in an kah i a rawk ngai tiah khuami hna nih an chim. Biakinn lawng si loin minung umnak inn a rawkmi cheukhat zong an um.

Khuami pakhat nih cun “Nizan chunhnu suimilam pahnih hrawngah ah Lawbuda (လောဘူးဒါး) sangah hriamngan in voithum an kah i inn pakhat zong a rawk” tiah a chim. Ref: Kachinwaves

KIA Ralhrang Tangka Laknak Sur Khur Cu Khar Dingin Nawl A Pek Hna: Hpakan peng Shaduyuat (ရှဒူးဇွပ်) khua pawng i Jawan suikhur (ဂျာဝမ်ရွှေမော်) riantuantu hna cu ralhrang he kahdohnak a fak chinchin kho, cucaah a hnubik Oct 15 ah chuak dih u tiah KIA nih nawlpeknak cathanh an chuah.

Ralhrangbu khah-lah-yah (ခလရ ၂၉၇) 297 tangah a ummi ralhrang hna nih khuami hna sinah a diklo ningin tangka halnak, Sui khur kiangkap i thil a zuarmi le a lutchuakmi hna cu an check hna i an vuak hna. Cu pinah Sui khur kalnak lam ah bomb an hmanh tiah theih a si.

Rangon Ramthen Khayan Peng Venguktu 69 Nih An Rian An Chuahtak, Ralhrang Ukhruainak A Dih I Caankarlak Mipi Uktu Bu A Dir: Ramgon ramthen Khayan pengah khuabawi le sang bawi 69 an rian in an i din i ralhrang ukhruainak cu a dih cikcek cang tiah Khayan Channel nih a tial. Khayan pengah hin Oct 3 thok khan PDF Khayan khua/sang uktu hna cu nih rian chuahtak dingin cathanh an chuah Oct 6-13 karlak, ni 8 chungah khua/sang uktu 69 nih an rian an chuahtak hi a si.

A rian a chuahtakmi hna hi Khayan khuapi chungin mining 13 le Khayan peng khuate hna in minung 56 an si. Cuti i khua/sang bawi vialte nih an rian a chuahtak lecangka in Khayan peng mipi uktu bu an ser colh.

PDF-KALAY Facebook Page An Hack Piak Hna, Positive Reviews Tuahnak In Bawm Cio Hna Usih: Kan ram thatnak caah biatak tein ralhrangbu a doh cuahmahmi PDF-KALAY Facebook Page cu an hack piak hna caah rawk dengmang in a um cang.
A rawk ngaingai cu a si rih lo. Tuanvo ngeitu hna tuahremh dingin an i zuam cuahmah lio a si. Mipi nih positive reviews tuahnak in kan bawm cio u tiah PDF-KALAY nih Oct 14, tuzing ah thanhnak an tuah.
Lawngtlai Khuapi Ah MYC Tawlrelnak In Chang Ser Cawnnak An Tuah: Mizoram Youth Commission (MYC) nih mino, Kala ram i riantuanmi, Covid-19 hrirai ruang ah Mizoram i a kirmi hna, riantuan awk a herhmi hna nih riantuan kho ding i thiamthil an ngeih khawh nakhnga, thiamthil phunphun cawnternak MYC nih a timhtuahmi, Cake Baking(Chang Ser) cu nizan October 14, ah khan Lawngtlai AOC sang, YLA Hall ah thok a si.

Training onnak caan ah hin Lawngtlai DC Dr Andrew H. Vanlaldika cu khuanlian a si i, Lawngtlai Khuapi ah Chang Ser cawnnak tuah khawh a simi cu lawmhawk a si kong le mizapi nih chang cu kan duh ciomi a si caah a ser thiammi hna ca ah cun pawcawmnak tlak a si kong zong a chim. Training ding i a kalmi vialte cu taima te le pehzulh peng ding in a forhfial hna.
Training onnak ah hin Lawngtlai Additional Deputy Commissioner Pu James Miahlung nih caan a tlaih i, cozah lutlai dangdang hna zong an i tel ve. Chang Ser cawng kho ding hin minung 20 an thim hna i, Medhavi Foundation nih an cawnter hna, tiah Department of Information and Public Relations, Mizoram nih a langhter. By. Salai CP Lian & Tluanga Zathang

Leave a Reply

Your email address will not be published. Required fields are marked *