R.I.P : A Tlau Mi Minung Pathum Cu Caan Saupi Hnuah An Ruak In An Char Hna

Kayin State, Hpa-An peng, Thamma khua ah a ummi pathum hna cu an an thawngpang theih ding um loin an tlau hna, an kawl lengmang ko hna nain an hmu kho hna lo. Ni 13 a rauh hnu November 21 chun ah thlanmual ah thicia in hmuh an si. An min cu Aung Kyaw Thu (kum 40), Ko Kyi Cho (kum 26) le Ko Thaw Thaw Thwin (kum 30) hna an si.

Hi hna pathum hi Administrative Office zung ah catialtu an si. Hi a ruak an hmuh mi hna lak i atel ve mi Aung Kyaw Thu hi October 30 lio ah khan ralhrangbu dirpi nak sandah piahnak hmun i atel ve mi a si tiah thawngtheih asi.

An ruak in hmuh mi minung pathum hna hi November 8 zaan suimilam 8:00pm ah khan a ho ti theih lomi pawl nih Honda Fot Motor in an zung chungah an rak luh hnawh hna i an rak tlaih hna. Cu hnu thok cun zeihmanh an thawngpang theih ding a rak um ti lo hi asi.

An tlaunak kong he pehtlai in an khuabawi nih a chim ning ah cun “an tlau ti kan theih bak tein khuapi in kan kawl cawlh ko hna, asinain an konglam zeihmanh kan thei kho hna” tiah a chim hi asi.

Nizaan chunlai hrawng ah khan khuami hngakchia pawl cu khua pawngkam thlanmual pawng i lente an i celh lio ah mithi ruak pathum kan hmuh tiah an chim. Thawng kan theih bakin kan va zoh hna i an ruak cu kan char hna, kan zumh ning ah cun an tlau ni ah khan an rak thah cawlh hna si lai tiah kan zumh.

An ruak hi a rawk ngai cang, a hnipuan le hruk-aih in a tlaumi minung pathum kha an si ko ti kan fehter khawh hna’ tiah khuabawi nih cun a chim chap hi asi. Hi hna pathum a thattu hi zeibantuk hriamtlai phu dah an si ti kan thei kho rih hna lo, cun lunghrinh in tlaih mi le purhdah mi zong kan ngei kho rih hna lo tiah khuabawi nih cun a chim hi asi.

Leave a Reply

Your email address will not be published. Required fields are marked *