(R.I.P) A Poi Tuk Hringhran E : SAC Ralkap nih Pu Thawng Lun Mang le Salai Thawng Nei Mawi an thah hna

Kalaymyo in Laitlang lei a rak kai mi SAC Uico ralhrang nih Falam peng ah Pu Thanwg Lun Mang (kum 29) le Salai Thawng Nei Mawi (kum 34) an thah hna i lampi ah an ruak an hlonh tiah theih asi. October 11, 2021 ah Falam peng, Tuphei khua mi pahnih hna cu SAC ralhrang nih an thah hna i an ruak an rak hlonh hna, nihin October 13, 2021 lawng ah khuami le chungkhar nih an ruak an hmuh hna hi asi.

Chungkhar lei nih an kawl len hna, ralkap nih an tlaih hna hnu in inn an hlam ti lo caah lungrethei ngai in an kawl hna hi a si. A si nain nihin October 13, 2021 lawng ah lam kam ah an ruak in an chuah hnawh hna hi asi. An ruak cu Meithal kuanfang le tukvelhnak a um len ti a si. Pu Thawng Lun Mang hi fa pahnih a ngei mi, nupi le fa he a um mi asi i Salai Thawng Nei Mawi he a ruang um loin an rak tlaih hna i an rak thah hna hi asi.

Hi kong he pehtlai in Tuphei khua mi pakhat nih “Pu Thawng Lun Mang le Salai Thawng Nei Mawi hi Zawnglen khua ah an kal, cu Zawnglen khua in Falam lei ah a rak kai mi SAC ralhrang he lampi ah an rak i tong i an rak tlaih hna a si men lai, inn zong an hlam ti lo caah chungkhar lei cu an lungre a rak thei tuk i an kawl len hna. Innpa chakthlang zong an sawm hna i an kawl len hna nain an hmu hna lo. Cun nihin ah khan lampi ah an ruak in an hmuh hna hi asi. An taksa ah kuanfang le tukvelh nak aum. AN ruak cu namchan in vui hau dirhmun a si caah RC Father nih nihin chun suimilam 12pm ah khan a vui hna hi asi” tiah a chim. Laikokekjournal

Leave a Reply

Your email address will not be published. Required fields are marked *