Press "Enter" to skip to content

Pastor “Lian Chawn ” Nih A Nau ( Khua Hlun ) A Thih Nak Kong Le A Sian Lo Nak Kong A Mitthli He A Tial Mi

Ka Nau (Pa Hlun) Mangtha Mu
Lian Chawn

Lungthli ruah lo kiak tuan chantawi
na tlei roling li bang hnin ai
len cim hlan i par bang hnawl cu
zuuntuar nawl har sian lo ka nau.

Tuan na relnak Thantlang sizung
ka hoi ngam lo na bau riangmang
Na tlonlennak ruun inn chumtual
zuunrim ai bang na tlei tuan cu.

Semnak nupa chuakti unau
kan mitthlam in na liam kho lo
hnathlam ai zeel na aanka pau
na caam peng lai kan nun chung cu.

Khupthirual he tuanrel zawn ah
chungkhar tling in rawldum caan ah
Nizarh caan i biakruun panh ah
na bau cang lai sian lo ka dawt.

2019 June 7—Ninga Ni, zing niceu nih ngaihchiatnak mitthli a kan phurh te lai ti cu lungthli pel hmanh in ka ruat lo. Ka nau (Khua Hlun) thih ni a si te lai ti cu kan chungkhar aho taktak hmanh nih kan ruat hrim lo. Asinain kan sian lo Pa Hlun nih mual a kan liamtak ni a si. June ruahhmai sin ah thihnak thennak mitthli nih a kan zelh ni a si. Zingnu khuakhan a cohlan a har hringhran ko.

2019 June 7 zingka ah thawngchia taktak kan theih mi cu JMBC kan missionary Pastor Kyaw Aye nih Yangon sizung ah mual a kan liamtaknak thawng a si. Cule cangka, JMBC EC le E&M upa meeting kan tuah colh. Pastor Kyaw Aye cu 2019 June 8 zanlei suimilam 2 in Yangon ah a ruakvuinak caanhman ding a si. Cucaah Rev. N. Lai Uk, Keimah, Nu Cherry (Pastor Kyaw Aye fanu), Pa John (Kan mawtaw mawngtu), le Vl. Bawi Duh ti in a ruakvui pumh tanh manh ding in 2019 June 7 zanlei suimilam 3:30 ah Thantlang in kan i thawh. Ka nau (Pa Hlun) hi Thantlang sizung ah a um ko nain zualhma tuk a si lo caah le Khrihfabu rian ai thuat deuh caah Yangon kan kal lai zong ah ka va veh manh ti lo—siaherh lo tein ka kaltak.

2019 June 7—zan suimilam 11:02 ah Yangon a tlawng mi ka riantuanhawi Pastor Ca Cung Bik nih phone a hun ka chawnh. “Kawi Chawn, thawngpang na theih mi a um el maw,?” a ka ti. “Zei thawngpang hmanh ka theih mi a um lo ee,” ka ti i ka lung a hring tuk colh. Saya Ca Cung Bik nih thawngpang a rak theih hmasa nain ai zumh lo tuk ve ruang ah keimah a rak ka chawnhnak cu a si—nain biafiang a rak ka chimh ngam lo bia a si. A rau lo, ka thaisung Miriam Nu nih a tah-aw in phone a hun ka chonh colh. “Kawi Khua a thi ee,” tiah fiang te hmanh in a chim kho lo. Ruah lo tuk palia in cu thawng hun theih cu kai zumh kho colh lo. Facebook, viber le messenger cahmai pawl ah ka nau thihnak thawngpang nih hmun a hun khuar i thal meitlaan bang khuaza a cul colh. Pastor Kyaw Aye ruakhumh ah a kal cuahmah mi keimah cung ah ka nau thihnak zual ko nih a hun ka dawi mi cu lungfak taktak a si ko. Zan suimilam 11 a luan hnu a si—Kyaw khua lonh i zinan khur an cawhnak kan phan cang. A fawinak cun Kyaw khua le Pale karlak, Monywa pal lo in Yangon lei kalnak lampial kan phak lai te a si. Hringtu ka pa phone ka hei chawnh colh. “A si ko, pa te. Na nau nih a kan liamtak i innlei ah a ruaksuannak he pehtlai in a herhhai mi kan tawlrel cuahmah,” tiah pacan i cuh ngai ko nain a thazaang a der ngai mi aw-aan he ka pa nih a hun ka leh. “Zeitindah na si lai, na hung kir kho lai maw?” tiah lungawtawmnak ai tel mi awrau he ka pa he phone kan i chawn. Tutan ka pa he phone kan i chawnh tluk in a nuam lo mi le a har mi biaruah ka tong bal hraw rih lo.

Zeitiawk tha tiah Rev. N. Lai Uk nih kan mawtaw mawngtu Pa John kha Kyaw tiang kir phot usih a ti i kan kir colh. Thantlang ah a um mi ka unau le ka hawikom a si mi Na Sing le Robert phone kan chawnh colh hna i mawtaw in rak ka dong u kan ti hna. Leklak an hun i thawh colh ve. Kyaw lei ah kannih kan kir colh. Kyaw khua mi an rak it dih cang, mawtaw hlan awk tuaktan ding zong a um ti lo. Mandalay in Gangaw karlak a tlungkal mi mini-bus pakhat zinglei suimilam 1:30 hrawng ah a phan ding a um i cucu kan hngak. Cu mawtaw cun Gangaw lei ah ka hung kai i ka hawile cu Yangon lei ah an lan than ve. Thihnak le ngaihchiatnak tichum zelh bu in kawl pawl sin ah keimah te lawng khuaza ruat in ka thu—ka thinlung le ka mitthlam ah ka nau muithlam lawngte.

“Ka nu le ka pa nih an tuar kho lo tuk sual lai, far fangkhat te kan ngeih mi Zingku nih a tuar kho lo tuk sual lai,” tiin atu lelek phone ka chawnh hna. Zinglei suimilam 4:15 ah Gangaw kan phan i khua a dei rih lo. Khoika tlunnak le i thumhnak hlei a um lo caah lamkam lakphakdawr i thutdan cung ah ka zau. Ka zaupah in, ka nau (Pa Hlun) i a tuanbia tawi ka phone in ka tial. Kan Khrihfabu chungtel nih thihlohnak an ton caan i ruakvui pumh caanhmannak ah a thi mi tuanbiatawi hi ka tialpiak tawn hna. Atu keimah ka chuahpi ka nau taktak a tuanbia tawi ka hun tial cu ka mitthli nih ka phone hmai hmu kho lo in a ciah lengmang, a fawi lo.

A ka dongtu Nasing, Robert, Mawngku le Thawngthawng Gangaw an hung phak ahcun zinglei suimilam 6:25 a si. Lakphak kan i dinta hnu ah Thantlang lei cu kan lan i chun suimilam 12:00 ah Thantlang kan inn kan phan. Pathian dawtnak in khual ka tlawn a tam i voidang ahcun panh tein a ka dongtu ka nau, a mithmai panh le a awka a leng ti lo. Tutan khual in inn ka tlun tluk in a nuam lo mi zong ka tong bal rih lo. Kan inn ka hung phak cu ngaihchiatnak le tah-aw nih a rak ka don. Asinain hi tluk in ai hlawh lo mi le mi a daw kho lo kan si ko nain innchung innleng le tual tlum lo, kan inn pawngkam a lawnkaannak paoh ah dawtu le hramtu ka hmuh hna tikah a tap ding le a ngaih a chia ding ka si lo ti ka ruat.

Hringtu ka nu le ka farte nih ka kut zong tlai ti lo in daite in a it i a rak ka hngaktu ka nau (Pa Hlun) cu, “Na u a tlung cang, a phan cang—hun chawnta hme,” tiah hnawhcawk lo mitthli he an chawnh len nain ka nau nih zei bia hmanh a let hna lo—daite in a it. Tla lo ding in ka kham len mi ka mitthli ka biangcung an tlolh manh ka hngal lo. Hi maw vawlei, hi maw nunnak—tuar thiam a har ko. “Ka fa, ziahhme inndang um zong ka duh lo, ka nulepa nan sin ah ka um peng ko lai, na ti tung, ka dawt….,” tiah thazaang uai ngai in a hram lengmang mi hringtu ka nu aw nih ka thinlung a khuai hringhran.

Ka Nau, Pa Hlun (Khua Hlun) hi keimah a ka changtu a si. 1982 September 9 ah Bungkhua khua ah Pu Phun Thleng le Pi Tial Men i an ngeih mi fa paruk lakah pathumnak a si. 2002 ah Thantlang Hornbill saung in Tanghra a awng i 2003 ah Thantlang sizung pi ah rian a lut. A thih ahhin cazipi (UD) rank in rian a tuan cuahmah lio a si. Kan unaurual lakah hawikomh le mitlaihchan a thiam bik le chungkhar sahlawh rualchan a tlaihchan bik a si. Tizu ngacel zalh le ramtang chuahvah ah a thapphar ngaingai mi le lehtecelh a thiam i a huam mi a si. Ai hlawhnak a um lo nain mikip nih an dawt. Asinain a pumsa duhnak a tei kho lo—zudin a tha lo ti cu a hna tlum lo le a ngaih cawk lo in kan chimhruah bik mi bia a si. Asinain a thlah kho hlei ve lo. Mitthli he Pathian sin ah thla kan campiak zungzal. Zung a kai peng ko nain tutan hi tlawmpal a cei deuh caah sizung ah ih in sii hna kai ronh lai a ti caah sizung ah a it. A tuanhawi le a dawtu siibawite zong nih hiti a thih ding cu an ruat lo. Sizung ah riah le umpi hau zong a si lo. Asinain minung nunnak cu kanmah ta a si lo.

2019 June 7—zan suimilam 10 hnu in a umtuning a dik lo tikah siibawite nih rianrang in an hun zuanhnawh. Oxgyen an ronh, a tha bik in an dirkamh nain a nunnak nih a zo ti lo. An chanh kho ti lo. Cuticun hringtu nulepa, ulenau le riantuan hawi zong biacahta lo le rovuihta manh lo tein pialral ram lei ah a kan liam tak. Rung kir ko ka dawt, na liamsia a herh lo maw, a tuan tuk rih lo maw? ti len zong ah zei san hmanh a tlai ti lo. Minung cu thihnak nih a kan hngah cio mi kan si ko nain hiti rianrang le ruahlo tuk in a kan liamtak lai ti cu kan ruat bak lo.

Zan vaarpi a si ko nain keimah khual lam ka um caah 2019 June 8—Zarhte Ni, zanlei suimilam 1 ah a ruakvui pumhnak thok a si. A donghnak bik ka nau ruak thlah pumhnak a dih khawh in a ruakkuang innchung ah an hun luhpi. Lung a fak ko. A ruak kan suannak ihkhun in ruakkuang chung ah ka nau cu kan thial—kan celh hrim lo. A thil thlak ding vialte mitthli he ka nu nih a timhlamhpiak dih mi cu kan hun chiah chih—mitthli a vorh in ai vorh. “Ka fa, Khua Hlun—va kal ko ne law,” tiah thlanmual tiang a ruak a thlak kho lotu ka pa hrum-ai thawng nih kan ruuninn a hninh hlah maw ti tluk in a kan runh. Nichiarte zungkai ding in ka nau nih kan inn a chuahtak tawn nain zanlei ah a hung lawi lengmang. Asinain tutan cu taksa pum in zeitik hmanh kir ti lo ding in ka nau nih kan inn a chuaktaak cu a har bik tuarnak a si ve ko—i lungsak a fawi lo. Ka nau cu, zanlei ah a lawi ding hngah awk a tha ti lai lo, zanriah ei ah hngah awk a tha ti lai lo.

Thlanmual kan phak in Khrihfabu phung in a ruakvuinak tuah hlan ah cozah riantuan a si bantukin cozah phungning in a thi cang mi cung ah cozah nih a min cazin in hlawt a sinak cathluan Thantlang sizung sibawi nih a rel lio cu ka ngai ngam lo, ka hnakhaw kai phih. “Ka nau, cozah phung ning in na min cazin hlawt na si cang nain kan innchungkhar cazin in zeitikhmanh ah kan in hlaw lai lo mu, kan in siang lo mu,” tiah ka lungchung in ka hraam.

Ka nau (Pa Hlun), na ihnak khaan kan luh ah kan celh rih lo, na mawtaw cycle kan hmuh ah kan celh rih lo. Na riantuannak Thantlang sizung i nehhnu hun khirh te ding ruah ah kan i nawl a har rih ko. Zeitik hmanh ah kan in philh kho lai lo. Zanmang tal ah kan leng in kan chawn law, na rauthla tal in hung kan leng camcin hram mu. Kan thinlung, kan nunnak le kan thisen chung ah nang cu na luang chih zungzal lai. Kan in sian lonak le philh khawh lonak hi tichum bang a tian kho lai lo. Vawlei cu hihi a si. Van a si lo.

“Mangtha, mangtha law kan i then riangmang cang lai, zanmang bang a si, leicung kan nun hi, a poi tuk ee leicung cu duhnak a tling kho lo, thaizing ahcun kan nun hi tuanbia ah an cang lai.” Ka nau, kan i ton than hlan tiang mangtha mu.

Chinchiah: 2019 June 7 Zan suimilam 11 ah hi vawlei nunnak in a kan liamtak i, June 8 ah a ruak kan vui mi ka nau (KHUA HLUN) philh lonak ca ah. Ka nau nih thihnak in a kan then tikah, ramchung ramleng in kan ngaihchiatnak a kan hrawmpitu nan dihlak Bawipa nih thluachuah in pe ko hna seh!.

Be First to Comment

Leave a Reply

Your email address will not be published. Required fields are marked *