Nungak Ni Iang le a hawi le Motor pah an tonning a hmu tu hna nih hi ti hin an chim lung a fak kho tuk e

Sagaing ramtthen Chief Justice (တရားသူႀကီးခ်ဳပ္) U Win Myint fapa Saing Wana Aung nih Hakha Economic Bank i rian a ttuanlio mi Leeng Ni Iang (kum 23) le a hawi le pahnih hna cu Motor in a pah hna. Leeng Ni Iang cu fak tuk in aa khawn caah Mandalay Sizung ah an kal pi. Aa khawnnak a fah tuk caah 3/1/2019 zan 8:30 pm ah a nunnak a liam tiah thawng kan theih.

Thil a canning cu; Leng Ni Iang le a hawi le (2) hna nih hin pawcawmnak ah tiah zaan ah Arsa rawh/reu zuarnak dawr cu Hakha – Gangaw lam, Hakha View point pawng ah an tuah. Dawr an tuahnak zong kumkhat fai tluk a si cang. Dawr an khar i an ttin lei ah Cycle in minung (3) an i cit. Lamhlat nawn piin a lam lo in Motor a rat an hmuh caah a pah zong a kan pah sual lai tiah Leeng Ni Iang nih a mawnghmi Cycle cu lamkam ah a dir piak. Tlawmpal ah Motor nih cun a lam lo piin a pah taktak hna.

Motor nih fak tuk in a pah hna caah Leeng Ni TIang cu Motor tang ah aa tenh. Motor mawngtu pa nih lam aa palh mi kha amah lam ah a hei tthial. Cu a tthialnak ahcun Leeng Ni Iang cu Motor nih cun a rial chih. Cun a hawi le pahnih zong an i khawng tiah an i pah lio a mit in a hmutu Nu Esther nih a chim.


A hmutu Nu Esther nih aw thang in kan bawm uh tiah a au i inn pa minung nih an chuah hnawh hna. Cu lio ah Motor mawng tu pa nih Keimah ka palh lo, anmah an palh tiah a hro chih hna. Cu lio ah a rian tlam a tlinhmi cozah rianttuan pakhat (တာ၀န္သိ ၀န္ထမ္း တစ္ဦး) nih Palik le PK pawl phone a chonh hna. Palik le PK pawl zong Motor Mawng pa nih cun a hro hna tiah kan theih. Cu aa khawngmi hna cu Hakha sizung ah an tlik pi hna.

Leeng Ni Iang cu a lu a kuai, a orhlei ngal ruh a kiak, A kehlei ban ruh a kiak, cun a dang a hawi pakhat cu a Lu a kuai caah an tthit i sizung ah it lo in an ttin ter. A dangpakhat cu a ttawk aa khawng i sizung ah zaan hnih a riah hnu ah nizan 3/1/2019 ni ah a chuak. Leeng Ni Iang cu aa khawn a fah pin ah Hakha sizung ah cawnghhramh awk a tthat lo caah Mandalay Sizung ah an kal pi. Mandalay sizung ah 3/1/2019 zan 8:30 pm tluk ah a nunnak a liam hi a si.

Motor 5P/8548 (NPD) a mawng i a pah tu pa hi Sagaing ramtthen Chief Justice (တရားသူႀကီးခ်ဳပ္) U Win Myint fapa Saing Wana Aung a si. Annih hi Hakha bawi pakhat nih Hakha ah Kumthar hmang ding in a sawm mi a si i luan tuk lak in zu a rit caah le a power hman a timh caah a tu bantuk in thil kan ton hi a si.

Minung thi lak in a pah tu Sagaing ramtthen Chief Justice (တရားသူႀကီးခ်ဳပ္) U Win Myint fapa Sain Wana Aung cu zei tin dik an luat ter i nihin 4/1/2109 tiang an tlai kho lo. Kan ram kan cozah nih hibantuk thil kong ah anmah ca ah phunglam a ngei lo mi an lawh caan cu a tu kan tonmi cung hin a lang.

Leeng Ni Iang hi Hakha peng Farrawn khuami a si. Hakha an umnak cu Pyidawtha sang YMCA Block a chak lei i a ummi a si. A ruak luang cu MDY khua in 4.1.2019 chun 11:30 tluk in an i thawh i Hakha cu 5.1.2019 dei lei an an phan lai tiah kan ruah. A ruak cu 5.1.2019 ah thlan a tla lai. Ruak cung Service zong LIVE thlah an i tim tiah thawng kan theih. LIVE in ruak humh rak i thawh cio te uh.

Ngaihchiatnak hrawmpi buin

Lian le a nau le…

Thawnglatu pakhat nih a langhter mi chungin van char mi a si.





Be the first to comment

Leave a Reply

Your email address will not be published.


*