Press "Enter" to skip to content

Lung A Fak Kho Tuk E : Nau Ngeihnak In A Nunnak A Liam

Nau ngeihnak ah a thimi Pari kongah thawng fiang deuh tein ttial a si. Hi kan unau nu Pari thihnak kong ahhin ruah awk tampi a um. Minung cu vanchiatnak a tong kho le a palh kho le thil a ti sual kho mi lawngte kan si ko hna nain ralrinlo, thim lo ruangah vanchiatnak kan ti lengmangmi zong hi a um tawn.

Anmah Mizo nih an post ning ahcun hi kan unau nu Pari hi nau ngei dingin Lunglei Civil Hospital a um i normal tein a ngeih khawh lo caah an khuai/ hlai. Thisen zong an pek ko ttha tein operation zong an tuah ko, ttha tein nau zong an ngeihter ko. Asinain ruahlo piin a cei deuh ruangah a nunnak liam tiin zualko an tuah.

A thimi Pari a pasal a cousin/ unau asimi nih a chimmi hi ruat hna hmanh usih! A tialning tein ka van langter lai.

“June 7.2019 ahkhan Lunglei Civil hospital ah ka unau nupi Siaha phak hlan Serkawr khuami cu Operation in Naute a ngei. Tlamtlinh tein operation cu an tuah i, an tuah khawh hnu zongah a lungfim i a ttha dih. Zaan zongah a pasal nih riah a va timh hna. Naute zong a kuh i an it tti. An pa he zong ttha tein an i chon.

Nurse Sayamah nu nih sii a chunh i minute 5 hmanh a rau loh, Nurse nu zong a umnak khan a phan manh lai loh, cu ahcun a thirh bakin a thirh i caan rau lo te ah a nunnak liam colh. Doctor te zong an kawh hna i chanhkhawh ding asi tilo an ti. Kha hlan vialte tthat ko i sii van chunh bakin kha ti kha um kha zeiruanhah dah asi hnga, sii ai kaih lomi maw a um le si hnga, an i ralrin lo caah dah asi hnga? Lung a fak hringhran ko” tiah a ttial. Doctor/ Nurse te pawl hi ruah awk cu an um ngai.

A thimi nu Pari hi a chuahkehnak taktak cu Thantlang peng,Zophei tlangthluan in a chuak i, Mizoram ah a um mi a si i,Delhi ah pasal a ngei i,nau ngeih lai ah,Mizoram i a va tlung mi a si. A poi le poi taktak khi asi ko. Kal taakmi chungkhar Pathian nih hnem ko hna seh. nitinthawngzamh

Be First to Comment

Leave a Reply

Your email address will not be published. Required fields are marked *