Press "Enter" to skip to content

Kawlram daihnak lamthluan kong Part II : Victor Biak Lian

Daihnak lamthluan kong hi zing le zan in thil sining aa dang tawn. Cu ca ah, tuandeuh ka tial mi peh than te ding ka ti mi kha tlamtling deuh in thawngpang vun hngah ka duh ca ah, tuan ah ka tiallonak a si.

A tu zong August 13-15 an tuah ding mi UPC-21 CPL (Panglong conference) cu relremlonak te te le a tlamtling lo mi te te a um ruang ah August 19-21 ah an thawn than. Hipin zong hi zei a lawhlai cu theihawk a har ngai. Kan laiholh ah kan chim theu tawn mi pakhat cu ” a khuachia/ a khuavang a chuak” kan ti. A sullam cu thil a tha cang ko lai pei kan ti lio ah, mi zeimaw ruang ah deuh-ma-ceuh te aa duh ah khin ah khin a rawkral kho tawn. Cu cu kan lo pah ka ti. A ho khuavang chuah cu chimti duh hlah ning!

Peace Process kong kan chim poh ah hin a tlangpi in phun 3 chimchih a hau tawn mi a um. Cu hna cu Kahdaihnak kan ti mi “Nationwide Ceasefire Agreement” nih in pa 3 a sak. Pakhatnak ah, UPDJC kan ti i (Union Peace and Dialogue Joint Committee). Cu cu NCA chapter 5 aa tial i, a rian cu Political dialogue kan ti mi kan ram kong cabuaicung ah i ceihnak hmun le cu biaruahnak a hruaitu ding a si. Cu biaruahnak ah cun Framework for Political dialogue kan ti mi a um i a sullam cu, mizeidah aa ceih hna lai? zeikong dah an ceih lai? zeitindah an ceih lai ti zong kha aa tel. Phundang in chim ah cun, hi biaruahnak in a chuak mi hnatlaknak hin federal ram kan ser lai ti a si ko. Phundang in chim ah cun a tu 2008 phunghram hi hi ka hmun hin i ceih hnu ah thlen ding ti khi a si. Dr. Lia Hmung Sakhong hi UPDJC i hotu chang a si. Daw Aung San Suu Kyi hi hotu a si.

A pahnihnak NCA nih a sak mi inpi cu, JMC kan ti. Joint Monitoring Committee ti a si i, an nih hi a bik in hriam tlai lawng te deuh an i tel. Ralkap le tlangcung hriamtlai hna an si i, phundang in chim ah cun hriam in aa do mi hna bu hna kha an si. Cu hna cu kahdaihnak hnatlaknak kha bu pakhat cio he si seh (Bi-lateral ceasefire agreement) cu NCA ah siseh, an ngeih mi hna felfai te in a zohkhenhtu bu an si. Phundang in chim ah cun, hriamtlai ve ve an si tik ah, an hnatlaknak kahdaihnak kha pakhat khat nih an zulh lo tik ah, a si lo ah phung an buar tik ah, zeitindah kan daihter lai ti mi kha an rian cu a si i, cu cu NCA chapter 3 ah hin aa tial. Hriamtlai an mah lawng kha an buai tik ah an mah lawng va buai cu tiah, CSO lei upa cheukhat zong an telh ve ko hna. Dr. Sui Khar hi JMC ah cun chungtuan (Secretary) a si i, Kalw ralkap lei nih hotu (Chairman) cu an tuan.
Tulio an hotu cu Lt. General Ya Pih a si.

A pathumnak in an sak mi cu, JICM ti a si i, cu cu Joint Implementation and Coordination Meeting tiah min an sak i hi hi buu in um lo in a herhtik ah a herh bantuk in auh ding mi meeting a si. Sihmanhsehlaw, hi meeting a kai kho ding mi cu ralkap an si ah, cozah an si ah, hriamtlai an si ah, a zik deuh deuh pawl kha kai ding a si i, an rian cu daihnak lamthluan ah buaibainak pakhat khat a um tik ah, tlangtlatu an si lai ti a si.

A cunglei ka tial mi an sak mi in 3 hi nan zoh ah cun “J” ti mi cafang/ biafang hi nan hmuh lai. Asullam cu “Joint” ti a si i, phundang in kan chim ah cun i hrawmhmi in an si. Bu pakhat lawng nih maw, minung pakhat lawng nih maw a ngeih mi in a si lo. A sullam cu, zapi hrawm mi in a si i, i hruainak le riantuannak kong zong ah a hrawm in khuakhan lairel a hau.

A tawinak bik in chim ah cun, cu i hrawmhnak lungthin te an thlau sual ah cun a rawk ko. Minsen a thumi hriamtlailak ah bu nganbik kan ngeihmi hna KNU le RCSS nih hin kan hriamtlai hna hi an hruai bik hna. 2018 UPC-21CPL khan buaihram aa thawk. A ruang cu, a tu kan chim mi “zapi hrawmh” in khuakhan lairelnak ah, a khuavang a tho sual mi nih hi thil nan duh ah cun hi hi nan tuah lai. Cu nan tuah lo ah cun hikong kan ceih kho lo tbt kha a hung chuak. Cutik ah tlangtla bu JICM meeting cu October thla ah an tuah tik ah, thatlei panhlo in, KNU nih UPDJC in kan chuak an ti. UPC cu federal ram ah kan sernak i ceihnak ding hmunhma a si na in, federal kong he aa pehtlai lemlo mi hna kha biatung an rak chuahpi tik ah, KNU nih hi bantuk biaceihnak ah hin cun kan i tel kho ti lai lo an ti i an nuar.

RCSS zong nih 2018 November thla ah JMC I kan chuak an ti ve. A ruang cu RCSS le Kawl ralkap hi voi 300 renglo 2015 October NCA minsen an thut hnu ah an I kap. Cu cu Gen Yaw Serk nih hitihin a chim. JMC nih kan buainak vialte hi pakhat hmanh a kan tlangtlak khawhlo ca ah, kan um a herhnak kan thei lo. Cu ca ah cun kan chuak a ti.

KNU le RCSS an nuar ah cun kan daihnak lamthluan cu hrapcheu a thi ko. A kal kho ti lo. Cuticun a tu kum thawk ka tiang kha pum hrapcheu a nunbu te cun a lawn lengmang tukum January thla 8 khan a hung nung than. Cuticun a tu hi UPC-21CPL zong cu vun tuah kho ding deng deng phun cun a hung um I, kan hriamtlai cheukhat zong cu Naypyidaw an phan cang. Meeting zong an hunt hawk pah cang I, mi zeimaw khuavang a chuah hrawlo ah cun 19-21 August ah cun biakhiahnak he tukum ca ah cun cu vial cu a va si hnga.

Note: Next ah cun zeitinte in dah cu hrapcheu a thi mi cu an thawhter than ti kha le side effect an ti mi cu nih a hrin chih mi damlonak zong kan vun purhdah pah lai. Can nih a kan pek ah cun Kalwram daihnak lamthluan le 2008 phunghram remhnak kong le a ralai mi thimnak hna hi zeitindah an thahri aa peh tlaih hna ning ti kha kan cuanh fawn hna lai. Chin Broadcasting Network

Ka ca a reltu nan dihlak cung ah kaa lawm.

Victor Biak Lian
Ottawa

Be First to Comment

Leave a Reply

Your email address will not be published. Required fields are marked *