Press "Enter" to skip to content

KAN TI TUK DEUH LO MAW? (Myanmar Idol le Kan Lungput ka Ruah Dan)

Kan theih vekin Myanmar Idol Season 4 cu a cem ih ruah loh pi piin thil a cang siih ruattu le, thil can dan cu a si dan ding awm tak a si, tiih ruattu pawl, cun Hakha le Falam karlak ih media aukhuang pawl ruangah ka Facebook ong paih loin ka ret ring ring men. A tu cun, an au kiau a zia deuh ding tiah ka hun ong cu.

Esther cu Kaleymyo a ra thleng ih Carson Baptist Biak inah hlung hlai ngaiin an rak hmuak, cawimawinak ca an pek, mipiin an rak sunloih ti thawmvang ka hun siar, Benjamin Sum a ra thleng zik ih Chin pawlpi hohanakin rak hmuak dingin an rak tawl rel ve, Kaleymyo Airport feh thei lo pawl khalin an veng Hmunlai lam pan khawm sehla, tiah theihternak ca an suah, ti vek thu pawl ka siar ngah la la.

KA RUAHNAK A BUAI

Laimi a tiawtu pawl, Falam le Hakha telin Kristian kan si kan ti aw ih, asinan, Pathian thu hnakin Idol ih tiṭha kan sunloih le kan uar dan ka ruahah Kan Kristian sinak hi ka zum tuk lem nawn lo. A hmin men men ih Kritian kan si a bang. Esther DCS le Benjmin Sum hi sunloih lo ding, ti lam hi ka rel tum a si lo. Ka rel tum sawn cu thil hi a cin tawk a um, a mawi tawk a um ti hi a si.

A ngai ngai ti ahcun Esther hi kan phun hnam Idol ah maw kan ruah ih, Benjamin Sum hi kan phun hnam in cawimawitu ah maw kan ruah? Si nai sai lo !!! Kan phunhnam in cawimawinak nak ding cu an hmai lam caan sungah a um. Pathianin hla sak thiamnak aw ṭha a pe ih cu cu a si mai. Phun hnam hrang ah ziang so an tuah ih, a cutluk lawm mam ih kan rak sunloih ih kan rak hmuah ciam co?

EL-AWKNAK THINLUNG

Top finalize lamah cun au le kiau a tam! Hakha le Falam hi nitin kan nunphungah cun kan duhdaw aw zet. Hua aw thei dinhmunah kan ding thei lo, kan sih cih-aw thluh. Mai hrinhnam zawngih voting a hung feh tikah Hakha lam cun Esther, Falam lam cun Benjamin Sum an hun vote cio ih, cu cu thil si daan ding a si ko. Asinan, cu cu hnam feeling la natu hrek khat cun an thei thiam duh lo la la ih online media lamah an au an kiau. Esther DCS hlunghlai takih rak hmuah le rak sunloih hi Hakha lam hin Falam lam pawl sawiselnak lakih a hung tling tho tho lungawinak ruang a si tel pang maw? Tu ih Benjamin Sum hmuah nan tum teh hi Hakha lam khalin an ti, mai phun hnam sunloih tlak cu sunloih ve ding, etc tiin Hakha lam ti dan thinlung ih ruat telin nan ti pang maw?

SUNLOIH TLAK KAN SUNLOIH MAW?
Hi hi a si, kan thu hmaisa lam ih ‘kan ti tuk deuh maw’ kan tinak san bik cu.

A ngai ngai ah cun Idol hin ziang tik hmanah kan phunhnam a tuah ṭha lo ding. Idol ih teltu pawlin phun le hnam hrang ṭuan an zuam vivo nak lawngin phunhnam hrang san a tlai ding. Hi ti lawmmam ih phunhnam kan duhdawt ahcun tlawng nauhak tam pi phun hra a ong ter ih hmat ṭha ṭha hmuhtertu pawl le, tu ih kan ram thlai cin ṭhansoter nak ding ih nasa takih cangvaitu pawl hman sunloihnak capi pek an tlak deuh lo sawm? Kan phunhnamin mi kan bang ve theinak ding ruat ih ṭan la rero tu, calai lamih in hruaitu pawl tla hi, a ngai ngai ti cun, kan phunhnam rolung pawl an si. A cuvek hman sunloih nakcang thiam set lo ih Idol ih hmin ṭha tivek men kan tawngpaw sunloih ciam co hi cu, Falam lamin siseh, Hakha lamin si seh, kan ti tuk deuh lo maw? Kan Laimi (Hakha + Falam) hin sunloih tlak ngai ngai hi mi zo vek teo so an si ti kha hi kan rak ruat thiam hrih lo cu a si hi. Kan ti tuk lawm mam!

Leh hnu lam khalah a huau huau (a nuam le lâr zawng) ih hung lar deuh paoh paoh kan cawisan tum ih, kan phunhnam hrangih sunloih tlak ngai ngai (an lar tuk lo khalah) sunloih nak cang kan thiam lo sung cu kan phunhnam hin hmai a nawr thei ngai ngai lo ding. (Hi ca hi anmah Benjamin Sum le Esther DCS duhlonak thu a si lo; mi piin kan ti dan, kan khawruah dan sawn hi kan rel duhmi cu a si) T Lalruatfela Mafela

Be First to Comment

Leave a Reply

Your email address will not be published. Required fields are marked *