Press "Enter" to skip to content

Kalpi Ko Seh

Tthaal caan, nikhua a linh saling si ko hmanh sehlaw rilikam i an rak tlaakmi khua kan ti cu a linh ning a dun le daan te aa rak dang deuh ngaingai. A si khomi a ruang phunphun an um ko hnga. Mah lak ahcun phunhnih in hun purhdap u si law; vawlei kokek sining in thlidai nih a kan helhhum caah si khawh a si bantukin minung kokek sining in hnipuan pen tete aa aihmi pawl nih an kan kulh ca zongah a si kho. Phundang in chim ahcun rilikam a rak leengmi thli cu hmundang-kadang i a hrangmi thli nak in an dai deuh tawn bangin rilikam a rak fuhpanhmi minung hna zong hmundang-kadang i a ummi minung nak in an hruk-aih a tawi deuh khun. Cucu sining kokek asiloah kokek sining ti ko u si.

“Ti le nga bang tthen siang lo leeng tti ding in …” le “Lei le dang bang hmunkhat ah kan leengtti lai …” hi vawlei kokek sining ah aa zulkhaal zungzalmi le aa sengtlai zungzalmi an si i, hlaphuah thiam pawl nih hla tiang in an rak phuahnak a si. Cu ve bantukin, “Pa mit le nu hnulei tungtai” zong hi minung kokek sining in aa tthen kho lo mi le hmunkhat ah a leeng tti zungzalmi an si ve. Cucu hitihin tehte kan hun langhter lai.

Nikhat zing cu Kawi Cung le Pa Kung he kan laihritlai tlukin kan i ruahmi Kawi Van sushi rian ttuan ding ah kan hawikom pali in hmunkhat te ah kan i thawh. Zinglei si ko hmanh sehlaw tthaal caan kan ti cu 90 °F in a cunglei a hung phan colh i mizei paoh nih thil pen le tawi hruk an duh dih cio ko lai dah, a bik in nungak pawl. Zaan a tawi, nichuah a tuan i zinglei suimilam pariat a tlin cun biatak tein nikhua aa hawk i zingcaw zalh duh ah Kawi Van sushi dawr umnak hmun a rak fuhmi pawl hi ni dang nak in an tuan khun i, a tam zong an tam deuh khun.

Voi tampi cu zinglei rian ttuan kan thawk caan ah hin fawi le bai in kan kaa kan aang kho tawn lo i biahram domh kan i harh ngaingai tawn, nungak kong dah ti lo. Nihin zing zong mah tthiamtthiam. Thawh phak nawn pipi khin Kawi Van, Kawi Cung le Pa Kung cu lukun nawn in anmah le sushi rian cio an tuah cuahmah lio ah khin, “Zoh ta hmanh u! Mah nu tungtai rem khawh cu number 8 pungsan bak a si ko,” tiah fangriat man sushi label ka hei benh pah khin biahram ka hei domhpi hna. An pathum cun a paw ttaammi pawpi bang arti ngawngaw mit-au in minu cu an zoh i, minu a liam le cangka khin Lai nunphung a tlaihchan ngaimi Pa Kung nih “Lai sumkhal he aa lo hei ti lawlaw ko,” tiah lungtling diriam ngaikhin a hei ka leh.

Tthaal, nikhua a lum caan a si caah mizei paoh fenh-aih tawi tete he eidin dawr cu an hun fuh cio. A hleiin nungak pawl, an thil pen tete he an tungtai sining cio kha fiang khun in an langhter i, ngata fuan bang an rak fuan. Nungak kongkau ahcun iangcuanhthiam taktak bantukin kan i zohchomi Kawi Van nih, “Zoh hmanh u khi, khi, khi!” tiah lakhruak au khin a kan au hnawh. “Mah nu taksa var tthat le dawh zia cu nga hei si sehlaw Salmon bak a si lai,” tiah Salmon Sashimi a tuah pah in lung siaherh ngai khin a hei kan hmuhsak. “Dai tein um cu lungtlin langhternak phunkhat a si,” ti a si bangin dai tthup in kan mah le rian cio kan i hmaithlak lio ah iangcuanhthiam Kawi Van nih, “Zoh zokzok u khih, khih, khih!” tiah inn dah-ra a kang cang ti awk in, a kan lauter dih. “Cu nu titsa sen tthat le tungtai rem dan cu Tuna bak a si ko,” tiah Tuna nga a ah pah khin minu a liam tiang a kan cuanhpi. Minu a liam dih hnu, Kawi Van a vun “dak” dih bak in sushi can tiatia kan mit-au cu kan fim zokzok i, kanmah le rian cio kan peh tthan.

Kawi Cung hi kumkhua leiin upa khuahngalbik a si i, khuatuaknak le biakhiahnak lei ah kan i bochan ngaingaimi a si fawn. Biaknak lei zongah kan lakah cun biakinn a phan khobik a si, maivan in. A li len caan hmanh ah thangtthatnak hla bak in a lung aa hnem tawnmi a si. Hlabia a zahnak zawn a phanh hrim ahcun thahreng bang thang taktakin a kan sak hnawh i, a thiamlonak zawn tete cu a hmur in fifik aw a rinter tawn. A dihlak funtom ahcun thangtthatnak hla tam ngaite a thiam i, Khrihfa hlabu hrim cu a zah dih ko lo maw ti awk khin a um.

Chuncaw hlam caan a hung phan ciammam i kan buai kho taktak, a bikin Kawi Cung. Thilcawtu an duh herh vialte a tawlrelpiaktu a si bantukin kwin pawng (RMD) asiloah sahdah (GOLDEN) hmawm buin mileng a chawnbia lengmangtu mihmurka ttha taktak a si. Ruahlo piin, a voikhatnak Kawi Van te sushi dawr umnak hmun a rak phanmi nungak nute nih Kawi Cung cu aa thawh i, “Zaangfahnak in zuun zuunnak hmun umnak na ka chim kho hnga maw?” tiah a hal. A hmawm liomi kwin pawng cu a hun dolh zokzok i makphek hring dah-ra aa koh sual ti awk in, hmaisen nawn pi khin zuun zuunnak hmun cu a hei chimh. “Nan hmu maw khi, khih! A cu tluk mui dawh le hnulei tungtai rem cu vanmi hmanh nih an iang kho lai lo dah!” tiah thetse ramcarnak hmun i a ummi nih tikhor an hmuh caan ah an mit a thih tawn bang Kawi Cung nih mitthi le hnabei sei ngaiin zuun zuunnak innkahram tiang a mit in a hei thlah.

Minu dawhnak huham nih Kawi Cung lung cu a humzual dih cikcek. Hmuhkhawhlo lungchung a khuaruahnak zeibantuk dirhmun tiang a phak ti cu ahohmanh nih kan hngal lo. Lungchung saduh a thah cuahmah lio ah lungthli a tum liomi nungak nu te nih cun Kawi Cung cu, “Kaa lawm,” tiah a kir pah in a rak hnor. Vaalttul a si bantukin Kawi Cung nih beng kauhkauh mit-au in minu hnulei tungtai cu a voihnihnak a hei thlah tthan i, thangtthatnak hlabia hlawi buin hitihin a lung aa hnem:

“Kan mah ta zeihmanh a um lo,

Kalpi ko seh, a rak kir tthan zau lai.”

[COVID-19 harnak caan ah careltu pakhat cio lungretheihnak hnemtu si hram seh tiin capo phun in ttialmi nihchuak biathawtnam capar a si._ Paul Camping Thang]. Chin Cable Network Channel

Be First to Comment

Leave a Reply

Your email address will not be published. Required fields are marked *