Hakha Ah Kahdohnak An Thok Cang (Kahdohnak thawng dang tampi he)

Hakha Ah Kahdohnak An Thok Cang: Chin ramkulh Hakha khuapi chuahnak ah ralhrang le hna cu CNA/CDF nih an kah cang hna tiah theih a si. CNF chimnak nawlngeitu Salai Htet Ni nih cun “Atu tiang kan fehter khawhmi cu Hakha khuapi chuahnak le Hakha in a hmasa bik khua pawngah kahdohnak a um ti hi a si. Zinglei 11:00 am hrawngah kan thok. Falam khua in mengruk a hlatnak Lungpi khua hrawng zongah meithal thawng theih a si. Kanmah he kahdonak a si maw si lo ti bel cu kan fehter kho rih lo. Hakha pawng kahdohnak cu kan fehter cang” tiah a chim.

Hakha pawng i an kahmi ralhrang hna hi Hakha in a chuakmi an si. Ralhrangbu nih cun Chin ramkulh lak dingah lam pahnih in ralhrang tampi a thlah hna. Sagaing ramthen Kalaymyo in Chin ramkulh Tidim le Falam peng leiah Tank pakhat le mawtaw 40 in an lut i Magway ramthen Kyaukhtu (ကျောက်ထု) lei in Chin ramkulh Mindat pengah mawtaw 80 lengin an lut ve.

Hakha pawng kahdohnak kongah an i kap cang ti lawng theih a si rih i thawngpang dang zeihmanh a um rih lo. Ref: The Irrawaddy. Kalaymyo ah thluaklei thlamtling lomi pakhat ralhrang nih an vuak: Sagaing ramthen, Kalaymyo, Bochoh lamtonnak le Natchuang lamtonnak Cherry inn tang ah a um tawn mi thluaklei tlamtling lomi pakhat cu October 12 zan Suimilam 7:30 hrawng ah ralhrang pali hna nih a ruang um loin an vuak tiah theih a si.

Mithmutu pakhat nih “Thluaklei tlamtling lomi cu ralhrang pali nih fak tuk in an vuak, tlakrawh in an cumh, meithal kuang in an tuk i a lu a kuai mi ka hmuh. Mah an vuak lioah cun ralhrang pakhat nih meithal tinh buin in pawngkam a ummi hna cu video le hmantlak thlak lo dingin a hro hna.Inn ka khar uhlaw mei hmit zokzok uh tiah a au. An vuakmi pa cu nangmah zong tlawmpal ah na thi tam pi chuak lai i na thi lai tiah ralhrang nih an timi kan theih. Minung lungthin zong hi an keng lo “ tiah a chim.

Ralhrang hna nih an vuakmi thluaklei tlamtling lomi cu a um tawnnak hmun ah kan hmu lo, a thisen a tlami hna cu kan hmuh tiah cuka hrawng a ummi hna nih an chim.

Falam pengah ralhrang nih an thah mi khuami pahnih an ruak an hmuh: Oct 11 ah Kalaymyo in a rak kaimi ralhrang hna nih Falam peng Tuphei khua minung 2 cu an thah hna i nihin October 13 ah an ruak cu lamkam ah an hmuh tiah theih a si. Ralhrang kut in nunnak a liammi hna cu fa pahnih a ngeicang mi Pu Thawng Lun Mang(kum-29) le Salai Thawng Nei Mawi (kum-34) an si tiah theih a si.

Tuphei khuami pakhat nih “Anmah cu kee in Zawnglei lei ah an kal. Cu lio ah ralhrang hna cu Zawnglei khua in Falam lei an rat lio a si. Cu zaan cu an pahnih in inn an hlam lo caah chungkhar zong lungrethei in an um hna. Zinglei zongah kawl ding in ruah a si ko nain ralhrang hna an kal rih lo caah nihin zinglei tu ah kawl an si. Kalay in kilometers 81 a haltnak no.5 lam pawng ah thisen kan hmuh caah cuka kiangkap cu tha deuh in kan kawl.. Cuti cun a mit ah meithal hliammi U Thawng Lun Mang ruak cu hmuh a si. Cuka pawngah cun Salai Thawng Nei Mawi (kum 34) ruak zong a paw ah meithal voili hliamnak kan hmuh than. Chun suimilam 12:00 hrawng ah miruak cu char an si, an ruak filhlawm colh ding in RC father pakhat nih timhtuahnak a ngei” tiah a chim.

Ralhrang hna nih cun lamthluan chuak an duh paoh in meithal le hriamngan an kah caah Falam peng Zawlnu khuami pakhat lo rian tuan lio ah a khuk ah kuanfang nih a hliamh tiah Zalen nih a tial.

Zipia(ဇီးပြား) palik sakhan kahdohnak ah palik pahnih an thi, hliamtuar an tam: Magway ramthen Poah peng le Myaing peng ah ummi Zipia palik sakhan cu mipi vengtu ralkap(PDF) phuhnih fonh nih an doh caah palik pahnih an thi, hliamtuar an tam. PDF leiin minung pahnih nih hliam an tuar tiah theih a si.

Nizaan October 12, zaan suimilam 9:00 hrawngah Zipia palik sakhan cu Myaing mipi vengtu phu (Myaing PDF) le Poah PDF phu fonh nih an doh hi a si. Myaing PDF in rianngei pakhat nih “Kanmah phuhnih fonh nih Zipia khua tlangcung ah ummi palik sakhan cu kan dohmi a si. Cu sakhan ah cun palik minung 25 hrawng an um. An umnak hmun ah luhhnawh in kan va dohhna, palik 5 hrawng kan kah hna i pahnih cu an thi” tiah a chim.

I kahnak hi minute 45 hrawng a rau. PDF lei pahnih zong an phei le an kio ah kuanfang nih a hliam hna. Sakhan hi mei in khangh dih an i timhmi a si nain khangh manh loin hnu an tolh than tiah Mizzima nih a tial. Mukung(မုံးကိုး) kahdohnak ruangah khuami za renglo an zaam: Shan ram Musee pengkomh Mukung peng ah Kokanh MNDAA le nawlngeihnak latu ralhrang kahdohnak ruangah khua pathum in khuami minung 400 leng ralzaam dirhmun an phan tiah theih a si.

Cu kahdohnak ruangah khuami vialte an zaam dih, Phawjung khua, Phawjung khuathar le Kawngttat khua in chungkhar inn 100, minung 400 leng cu Myanmar-Tuluk ramri hmun ah ralzaam dirhmun in an um hna. October 12, ralhrang le MNDAA kahdohnak ruangah Phawjung khua inn hnih cu hriamngan khen nak in a rawh lengah khuami minung 6 cu kuan nih a hliam hna. Kuan nih hliammi minung 6 chungah kum-2 ngakchia minung pahnih le kum-60 luan upa pahnih an i tel The Irrawaddy nih a tial.

Kaya ramkulh ah hramhram nawlngeihnak latu ralhrang ruangah inn za renglo an rawk: Kayinni (Kaya) ramkulh chung ralhrang hna ruangah pengkulh 3 ah inn 300 leng a rawk tiah Kayinni phu nih an chim.

Khuachung mipi inn tamtuk a rawhnak pengkulh cu Loikaw, Demawhsu le Phekhung peng an si. Cu pengkulh chungah cun tambik inn a rawhnak hmun cu Demawhsu a si i,a luancia zerhhnih chungah Loikaw peng chungah inn 33 tiang a rawk tiah an langhter. Inn a rawkmi tam deuh cu ralhrang kahnak ruangah a si BBC nih a tial.

Yangon ah Non-CDM tlanglawng riantuan pakhat le pyusawthi phu hruaitu Myo Naing thah an tong: Yangon ramthen, Khayan pengah pyusawthi phu hruaitu Myo Naing cu nihin chunhnu suimilam 12:00 ah meithal kahnak in a thi tiah khuachung mi hna nih an chim.

Khayan peng pyusawthi phu hruaitu Myo Naing cu nihin chunhnu suimilam 12:3 hrawngah a hnu lei in a ho si theihlo mi minung pahnih nih meithal in an kah, cu an kahnak hmun ah cun a thi colh tiah khuachung thawngzamh nak Khayan Channel nih a langhter.

Cun Yangon ramthen Mingalatawngnguat peng ah nihin zinglei suimilam 9:00 luan ah tlanglawng lei riantuantu Non-CDM Thein Win cu meithal kah a tong i an kahnak hmunah a thi colh tiah theih a si. Thein Win cu Myanmar tlanglawng lei thawngzamhnak ah a tuanmi a si i Yan Kin Mawng min in social media ah ca tial tawm mi a si tiah Khit Thit Media nih a tial.

Kyaukthu peng, Moppalin khua pawngah Ralhrang mawtaw rual Bomb puah an si i ralhrang 13 an thi, 4 hliam an tuar: October 12 chun suimilam 12:00 hrawng ah Mon remkulh, Kyaukthu peng, Moppalin khua le Kali Gate khua kar ah ralhrang mawtaw hna cu KNLA Brigade 1, Battalion 3 ralkap hna nih bomb in an doh hna i ralhrang 13 an thi, 4 hliam an tuar tiah KNLA nih a thanh. Ralhrang mawtaw hi pali an si i KNLA nih pakhat an kah in a dang pathum cu an kir than tiah theih a si.

Ralhrang mawtaw hna hi atu le atu bomb puahhnawh lengmang a si caah ralhrang hna cu misawhsawh thilthuam in meithal i put in bomb puahnak hmun cu an va zoh tiah Khit Thit Media nih a tial.

Pale ah ralhrang lam hmaikal hna cu bomh puahhnawh an si, an dihlak ti awk in an thi: October 13 zing Suimilam 9:40 ah Pale peng Wanpin khua lonnh ah ralhang lam hmaikal 30 hna cu hriamngan le hriam hme he lamkam an duhnak paoh kah pah in an rak kai i Pale mipi ralkap (PPDF ) nih bomh he meithal he an kah hna caah an dihlak ti awk in an thi.

A hnuah a rak kai mi ralhrang hna nih hrianngan le hriam hme he pehzulh in an kah hna caah Pale PDF hna cu an thahmi ralhrang hna meithal lak manh lo in hnu an tolh tiah theih a si. October 11 zongah khan ralhrang le Pale PDF hmaitonh kahdohnak voithum a um i Pyu Saw Htee telh in ralhrang 30 leng an thi tiah Palee PDF nih a thanh.

Kawkareih, Ywa Thit khua pawng kahdohnak ah ralhrang le BGF a thi mi an tam: Karen ramkulh, Kawkareih peng Ywa Thit khua pawngah October 12 Suimilam11:00 Am in Zaan 7:30 Pm tiang KNLA, DKBA, Eagles Brigade hna i bawm in ralhrang le ralhrang kuttang BGF hna cu an kah hna i ralhrang le BGF a thimi an tam tiah theih a si.

Eagle Brigade tuanvo ngeitu nih “Anmah lei a thi mi an tam. Tuni hi an ruak kan lak lai tiah an chim. Kanmah lei a hliam mi kan um lo, hriamngan nih thingnge a khen i a kiakmi nih tlawmpal a kan hliammi lawng a si “ tiah a chim.

Ralhrang hna nih Kawkareih myo in hriamngan in an kah caah hriamngan kuan cu Ywa Thit khua chung ah a tla i inn pakhat rawk . Atu ah cun Ywa Thit khua le Kamaigone (ရွာသစ်ကျေးရွာ၊ ကမိုင်ကုန်းကျေးရွာ) khua mipi hna cu a him nak hmun ah an zaam tiah Khit thit media nih a tial. By. Anna Par & Flowery Par

Leave a Reply

Your email address will not be published. Required fields are marked *