Chin Nu Khuang Hliang Par Cu US Ah A Ruak In An Char

Indianapolis – US caan December 23, Zarhpini zingka ah nungak Khuang Hliang Par ruak cu southside apartment complex i hnawmpung nganpi chungah an hmuh. Khuan Hliang Par, kum 27 hi Indianapolis ah chungkhar he khuasami a si. Laitlang an khua cu Thantlang peng, Vuangtu khua an si.

Indianapolis khua i Zophei Baptist Church member an si.

Zarhpini zingka 10am fai ah ‘Teddy Lamkam i 300 block hram hnawmpung nganpi chungah mithi ruak kan hmuh’ tiin palek an chawnh hna. Zeitin dah a thih ning si tih., cu palek nih an fehter rih lo. Lainawn hlattu palek pawl nih thil sining an hlat cuahmah lio a si.

Thil sining a hngalmi nan um ahcun Misual Dotu palek phu phone number 317-262-8477 ah thawngthanh khawh a si. “Ruak vui ni le thlantlak ni cu hnu ah thawng kan thanh te lai,” tiah Zophei Baptist Church nih an Facebook page ah an thanh. Ngaknu Khuang Hliang Par thihnak kong he pehtlai in Salai Biak nih a tanglei bangin a ttial.

Salai Biak: Nihin Indianapolis kan thil tawnmi cu…

Zan lei 6:30pm hrawng ah Indy um kan naupa Rocungnung nih thawngpang a rak thanhmi ka theih i a mah cu phone ka hei call. Thawngpang ch Khuang Par kum (20) hrawng si tiah an ruahmi a ruakin an hmuh timi a si.

A chung le hlat lio a si tiah a ka chimh. IMPD non-Emergency ah phone in ka hlat cawlh ve i, Khuang Par a u le tiah ruahmi inn ah cun ka kal. Kan naupa Rocung le a u le tiah inn ah cun an rak um. Tlawmpal ah detectives pahnih an rung phan cawlh i a unu sin ah thawng an hlat i a unu sin

ah thawng a fiang in an chim ta i, an nau nu Khuang Hliang Par kum (27) a sinak kha an fianh.

Cun tlawmpal zong ah Marion County Coroner in officer nu pakhat a rak phan ve i thilsining dikthlir deuh le a hmanthlak hna a kan zohter i a mah si ko ti kha a u le nih an fianh.

Anih hi nungak a si rih. Amui sam chuak thiam ngaimi te a si. Nizan ah khan a chungle cu Vuangtu X’mas ah an kal i a nih hi a hawi le sin ah a kal tiah an theih. A u nu le pahnih le a unu vapa he khuasami m an si. Inn in a kal hnu ah phone an chawnh nain a phone tlai ti lo. Nihin zanlei ah hin mah tihin Police nih a ruak an hmuh i chungkhar an hlatnak cu ICBC Khrihfabu sin ah an rak hlat hmasa bikmi cu a si.

An hmuhningcang hna an chim tik ah hin, lunghring ngai a si. An dothlat cuahmah liopi a si tik ah a thihnak kong cu fiangin chim awk a um lo. Aho nihdah a ruakcu a hmuh hmasa tbtk kong hna ah theih fian khawhmi a um rih lo.

Zei khom a si ah, Pathian nih a chungkhar hnem hram ko hna seh. Thil thalo tuahtu hna zong cu a ho an si zong ah an luat kho lai lo dah! Yarzawutbay Pyay Ma luat, ti a si.

Laknak : Thak Bawk Pai


Be the first to comment

Leave a Reply

Your email address will not be published.


*