Biatak Thlacam Hna U Sih Law,SAC Ralhraang Nih Victoria Camp le Chinram Lak Ding In An Rak Kai Cang

Naihrawng Laitlang thawngpang theih tikah lung a nuam lo taktak. Zeidah kan ton te lai i zeibantuk thawngpang dah kan hna nih a theih te lai ti hi kan hngah cio mi a si lai dah. Chin rampi voikhat ah faak tukin tuk a timh ti cu a fiang liangluang cang.

Nihin ni tiangah SAC Ralhraang mawtaw le raldohnak Tank hi 143 tluk Laitlang a phaan cuahmah cang ti si. Nizaan tiang ah khan Falam peng Lungbang khua SAC ralhraang mawtaw le Tank 55 a phaan cang, nihin zongah Ralhraang mawtaw le tank ceilak Mindat lei ah a zuang tthan hoi. Faak taktak tthuat a timh ti cu a fiang ko cang.

CHRO rianttuantu pakhat a si mi Salai Cung Dawt facebook cahmai ahcun tihin fiang tein langhter a si “SAC Ralhrang Motor le Raldohnak Tank 143 tluk nih Chinram lak ding in an kan rat hnawh cuahmah. Nizaan tiang ah Falam peng Lungbang ah SAC Ralhrang motor le Tank 55 an rak phan cang. Cun nihin zing suimilam 5:00AM tluk in Ralhrang Motor le Tank 88 tluk cu, Pakokku in Laitlang Mindat lei ah an kal cuahmah ve cang ti asi.

Chin ramkulh a ning pi in voikhat ah faaktuk in nam an kan timh, Mindat lei ah SAC ralhrang thazaang tam taktak le Motor, Tank 88, Hakha lei ah Ralkap thazaang tam taktak le Motor, Tank 55 a si. Nihin tiang thawngpang a lang mi zoh tikah SAC ralrang Motor le Tank 143 hrawng cu Chin ram chung ah an rak lut cuahmah cang” ti’n fiang taktak a langhter.

Hi kong he pehtlai in kan nih Chin miphun hriamnam a tlai lo mi le hmun dangah a um mi hna nih cun ngeihchiah chawva in kan bawmh khawh hna lo hmanh ah nifatin kan THLACAM nak tal ah hin cun philh hrimhrim hna hlah usih. Zeizong vialte a tuah kho tu Pathian daw hawh kan ngeih. Thlacam daithlang hna hlah usih.

Leave a Reply

Your email address will not be published. Required fields are marked *