Tulio Donald Trump Dirhmun Le Tuzaan lei Court Chuahpi Ding!

Tulio Donald Trump Dirhmun Le Tuzaan lei Court Chuahpi Ding
=======
January lio i National Archives nih ka sinin nan lak cangmi box 15 ah khan cozah capar pawl an i tel dih cang, zeicahtiah kha hna pawl kha presidential records an si caah a si, tiin Wednesday i zung i a chuahpimi capar chungah Trump nih a tial.

Florida ka inn cozah capar an lak, ti cu kai theih (admit) ko. Asinain, cozah capar kai chiah ruang i mah bantuk in boruak linhsatter hi cu a si lo. Cun kan inn luhhnawh taitai zong a herh in ka thei lo, tiin Thursday i a kong an ceih hlan ah Trump nih a chim. Trump a palai pawl nih Florida a inn i cozah capar pawl an thuhnawh, cozah capar zeizat dah a tan rih, timi kongah hlathlaitu pawl an hlen hna, tiin sihni pawl sinin biaka a len caah, a tu bantuk in Trump hi Wednesday ah taza an cuai hi a si.

2024 ah president i cuh kho ti hlah seh, ti an ka duh caah a kong hlathlai in an i la. Ka pumpak ngeihmi capar le ka presidential records pawl dothlat rian DOJ nih ai lakmi hrimhrim hi sual kawl duh rumro a si, tiin Trump nih a chim.

June thla tein khan ka sin a ummi cozah capar vialte ka khirh dih cang hna, tiin Trump nih a chim hnu ah, a sinah cozah capar ai chiahretmi a tangbang ko rih. Cu capar pawl cu a palai pawl nih an thuhnawh, tiin FBI nih tehte an hmuh caah DOJ nih a inn ah kawlhawlnak tuah dingin nawl kan chuah hi a si. A tu bantuk in Florida a inn kan luhhnawhnak a ruangbik cu capar box 15 chungah residential records biapi an um, tiin cozah lei nih an ruah caah a si, tiah Trump sihni nih an chim.

Asinain, an hmuhmi capar pawl hi Presidential Records ah za ah za in an bunhpiak awk te a si. Presidential Records lakah hin a biapimi capar hi um phung a si caah, a tu bantukin khuatlang cul in linhsatter ding a si hrimhrim lo,” tiin Trump a sihni nih an chim.

Presidential Records Act phung tangah cun, National Archives nih hin DOJ sin phakter lo in, anmah tein thinlung tha ngei in capar pawl an vung lak awk a si, tiin a sihni nih an chim. Capar vialte ka phiat (cati nak in) dih cang hna, tiin hmanthlak in Trump nih Wednesday ah khan a Truth Social ah a tial. “FBI pawl nih ka inn an luhhnawh ning cu zoh a chia tuk. Ka tuang khat in cozah capar an samh hna (Trump nih a tuahmi a si, hei ti phun khin!) i, mipi hmuhter duh ah heh tiah hman an thlak hna. Biathup ah chiah an i tim, tiin nan ruat kho hnga maw? Capar pawl ka phiat dih manh hna caah kan van a tha!” tiin Trump nih a chim.

Asinain, hmanthlak i Trump nih a langhtermi capar pawl hi cu ‘Top secret” an si theng lo, a lengphaw lawng an si. Cun cozah capar a phiat cang, timi tehte zong a um fawn lo. Wednesday i an chuahpimi tlap 19 zong phiatmi cazin ah an i tel lo. Tlap khat le bang cu, cozah capar hmanthlak in a cuang. Kaphnih taza an i cuai tonhmi ah hin, pakhat deuh cu Trump nih a capar zohfeltu dingah “special master” khanhpiak dingin nawlnak a tuahmi a si. Mah bantuk riankhinh cu kan tuah kho lai lo, a ruang cu kalpi cuahmah lio mi hlathlatnak hi a chiatchuah ding a si, tiin federal sihni phu nih an hnonpiak.

Special master cu rianpek a si tak ko ah cun, Top Secret/SCI security kong hi thatein a bihzohpiak hna lai.
Biaceih can hi Thursday 1 pm ET ah a si lai. Ka sin nan lakmi capar vialte le zung nih remh lo tein fehternak nan tuahmi copy vialte ka herh, tiin Trump nih a chim. FBI nih an lakmi capar pawl an copy hi “special master’ le Trump nan pek ve hna awk a si, tiin Trump sihni pawl nih cozah an chimh hna.

Cun cozah nih kawlhawlnak nawl nan chuahmi capar a copy zong ka pe u law ka duh, tiin Trump nih a chim. Kan hnung zarh i an remhcia mi fehternak capar a copy zong a hal chih hna, tiah theih a si. “An lakmi capar, Kawlhawlnak Nawl, kawlhawl dingin an i hmaithlaknak an tialmi capar an copy vialte hi Special master le Movant hi cozah nih an pek ve hna awk a si,” tiin Trump sihni lei nih capar in an duhnak an langhter.

Remh rih lo mi fehternak capar kan chuah a si ah cun, federal nih capar hlathlainak an tuahmi hi a hnursaun ding a si, tiin DOJ nih an chim. Inn luhhnawh lio ah ai tel ve mi tehte pawl an min langhter dingin Trump sihni nih an duhnak an langhter. Cozah biaceihbawi pawl nih ninghngal ngaiin Presidential Records Act hi sualnak kawlhawlnak phungphai ah an hman, tiin Trump nih a chimmi cu DOJ nih an rem lo ngaingai.

Hlathlainak kan tuahmi hi ningcanglo in presidential records fimtawl a si mi kong he lawng ai seng lo. Espionage Act buarso ruangah le, thatlonak tinhnak he cozah capar i fimtawl ruangah le diknak (justice) hnursuan a um ruangah, hlathlainak kan tuah hi a si,” tiin cozah biaceihbawi pawl nih an chim. Presidential records thuhnawh, asiloah kadang i thialkam, timi hrimhrim hi sualtuah pakhat a si, tiin an chim.

Thursday ah Special Master le Zohfelnak kong Ceih ding a si. A inn an luhhnawh nak in 14 hnu ah Trump nih taza a cuai chin ve hna i, ka Constitutional right an ka buarpiak, tiin a chim. Florida ka inn i FBI nih an lakmi capar pawl zohfeltu dingah ‘Special Master’ (Lenglei sihni) ka herh, tiin a ti. Tamdeuh can ah cun, an zungkhan kawlhawl a tongmi sihni hna lakin “master special” hi hlan tawn an si. Cozah nih an lakmi capar pawl a zohfel lai i, hlathlaitu pawl banhphak lo nak ah cu capar pawl cu a chiah hna lai, ti a si.

Trump nih tazacuainak a kalpi mi hi phung kongah chamhbaunak tete (legal elements) a um caah, a tazacuainak capar kongah tuanvo an pekmi Judge Aileen Cannon nih chap a herhmi chap dingin Trump a sihni pawl a chimh hna. Kan hnung zarh Saturday tiangah khan cun, “special master’ rian pek hi Cannon nih a lung a tling lo i, tutan zarh Thursday i a kong ceih dingmi tu hi ngaihpiak ta i cu hnu ah khuakhan than te dingin timhlamhnak a ngei.

Special master” rianpek hi a herh lo. A ruang cu hlathlainak tuah lio pi a si caah, intelligence community zong a hnursuan ding a si, tiin DOJ nih Tuesday i zung an chuahpi mi capar ah an langhter. Trump nih nawlnak a tuahmi kongah chirhchan thitha in a langhter kho lo, tiin biaceihbawi (taza a cuaitu) hna nih an chim.

Trump nih special master a halnak a ruang hi pakhat te lawng a si. Asinain special master auh a si nak dingah cun, a ruang tampi a um a hau, tiin DOJ nih a chim. Trump nih cantha (chirhchan) ai ngeihmi tham cu a inn i kawlhawlnak an tuahmi ah hman a si cang. DOJ nih hlathlaitu hna sinin capar vialte zong a then dih cang ko. A tangmi capar zong cu agents pawl nih an zohfel ko cang. Cucaah, Trump nih a hleice in cantha (privilege) hal khawhnak lam a ngei ti lo, tiin biaceihbawi pawl nih an chim.

DOJ nih a capar pawl zohfeltu dingah a dangtein phu pakhat a sermi zong cu Trump nih biatak tein a doh. August detka tein kha mah hi phu hi US Magistrate Judge Bruce Reinhart nih a ser cangmi a si. Amah ti ning a si ko ah cun, Privilege Review Team nih hin tazacuai a tongmi pa nih fenhnak tuahnak nawl ai ngeihmi hi an cohlan awk a si, tiin Trump sihni pawl nih an chim.

Cu ti a si ah cun, Filter Team nih chirhchan ah i hman ding an timi phun 3 hi tazacuai a tongmi (Movant) i a duhnak kilveng kho an si ti lo ti nak a si. Cucaah, Privilege Review Team nih biaceihmi pa biachahnak asiloah cantha ai ngeihmi hlathlaipiak khawhnak lam zong an i ngeih ti lo tinak a si ko lai, tiin Trump sihni nih an chim.
‘Special master’ kong i kan hnung zarh Friday i biaceihbawi duhnak hmangin capar an apmi ah khan, special master nih zeitin dah a cawlcangh lai, timi zong an langhter lo.

Trump nih tazacuainak le nawlnak capar a apmi zoh tikah, khahlan President pawl le National Archives karlak i capar an i pekchanh vialte umter lo dingah le cozah nih a capar kawlhawl kho lodingin a palai pawl an cawlcanghter hna nak vialte a phozar bantuk a si. FBI nih a inn luhhnawh in capar pwl an laknak a ruang cu amah Trump bia lila ruangah a si. Amah nih cun pei DOJ sihni pawl le FBI hlathlaitu pawl hi a inn ah sawm hna i, security kongah ruahnak a hal hna cu. Credit: Chelsea Bawi