Ukraine ram thlanglei Zaporrizhzhia Nuclear Power Plant Sehzung ah a chuak ṭhanmi kahdohnak kong ah Russia le Ukraine nih ramkhat le ramkhat an i mawhchiat lio ah Russia nih Gazprom Gas Company in European Union ram a pek mi Gas cu caan karlak ka phih chung, tiah Russia nih a thanh.

European Union ram hna Gas peknak Pipe Nord Stream cu remh a herh caah ni 3 chung Gas kan phih lai, tiah Gazprom nih an thanh hnu in nizaan August 31 in Gas cu a phih. Ukraine le Russia tuknak ah Europe ram hna nih Ukraine ram cu bawmhnak a pek caah Russia nih Gas a kan phih sual lai, tiah Europe ram cheukhat hna cu an thin a phang.

Russia nih a lak mi Zaporizhzhia Nuclear Power Plant sehzung cu Ukraine Engineer hna nih an zohkhenh i Nuclear sehzung hin Nuclear zungzam(radiation) a chuak sual lai tiah phan ngai a si lio ah sehzung pawngkam ah cun kahdohnak a rak chuak ṭhan. Nuclear Power Plant Zohfelnak ngei ding in IAEA zong an phan cang, tiah theih a si.

China Communist Party Cu Xi Jinping Kong Ceih Ding In A Voi 20 Nak Meeting An Tuah Lai

China ram uknak a tlaitu Communist Party nih a voi 20 nak Meeting cu a ralai mi september 16 ah an tuah lai. Cu meeting ah cun President Xi Jinping cu President ṭuancaan pehter le pehter lo kong an ceih lai. Xi Jinping nih cun president ṭuancaan cu peh khawh ṭhan ding in a zumh i Mao Zedong khawh in a saubik China ram hruaitu si aa tim, tiah theih a si.

Hi meeting hi kum 5 dan ah voikhat rak tuah tawnmi a si i zarhkhat chung an rak tuah tawn. A bik in Beijing People’s Hall ah an tuah tawn.

Xi Jinping a voihnihnak President a ṭuan chung ah rampi chawhlehnak a der ruang le Covid-19 zawtnak a tawlrel ning kong ah a rak um tuk theng bal lo mi duhlonak langhternak a rak chuak. Cun, Taiwan kong ah US he i hmuh thiam lonak a chuah caah a ralai mi kum cun “China rampi a tha aa hrim ṭhan lai” timi tlangtar a au pi ca ah a voithumnak President rian zong a peh ṭhan lai, tiah zumh a si.

China phunghrampi ah President pakhat nih term voihnih pin peh khawh a si lo, tiah chiah a si mi cu Xi Jinping nih 2018 ah a rak hnon caah tutan meeting ah hin a term thumnak President a tlaih lai, tiah an zumh cio.