Press "Enter" to skip to content

VANMI HOLH, HOLH THAR, HOLH DANG LE HOLHTHEIHLO AI DANNAK By Aung Myint Thang

 

1. VANMI HOLH (1 kOR. 13: 1-2)

Vanmi nihhin holh an ngeih. Holh an ngeih caanh linguistic communication an i tuah kho. An i chawnbia kho kan ti lai cu. Paul nihcun 1 Kor. 13: 1-2 ah vanmi holh hmanh in holh ning law dawtnak ka ngeih lo ahcun san a tlai lo a ti. Hika zawn ahhin vanmi holh timi hi kan hmuh. Asinain vanmi holh in minung an rak holh bal ko timi Baibal ah a um lo. Cun, atu i nan holhtheihlo hi vanmi holh asi timi zong Baibal cacang pakhat hmanh a um lo. Paul nih a chim duhmi cu “hei holh kho hmanh law” ati duhnak a si. Nan holh kho lai ati nak a si lo. Bianaah Jesuh nih, “mi pakhat nih vawlei i a zaapi tein ngei hmanh selaw, a thlarau a sungh ahcun zeidah a ttha hmen” ati. Vawlei pumpi na ngeih dih lai tinak asi ve lo. Hei si selaw tinaksawhsawh a si.

Cun vanmi holh hi zeibanyuk holh asi kan thei lo. Vancung ah kan kai bal lo. Asinain vanmi nihcun minung holh, minung nih an hmanmi, an theih khawhmi holh in bia an rak chimh. Dididede-fufufu-huihui ti in an rak chawn bal hna lo. Cucaah nan holhtheihlo hi cu vanmi holh cu asi hrimhrim lo ti cu a fiang.

2. HOLH THAR (MARK 16: 15-17)

Holh thar timi hi Mark 16: 15-17 lawngah kan hmuh khawh. Holh thar timi le holh dang timi aidannak cu holh dang cu zumtu vialte nih hmuh khawhmi, tinco khawhmi a si lo. Holh thar tucu zumtu mi vialte hmelchunhnak caah peekmi asi caah zumtu vialte nih an tinco mi a si. A zummi pohcu hi hmelchunnak hi peek an si lai. Holh thar (new tongue) in an holh lai a ti caah zumtu vialte nih tinco dih dingmi khi a si. Cucaah nan holhtheihlo hi cu Mark 16: 15-17 i holh thar a timi khi cu a si hrimhrim lo ti cu a fiang.

Holh thar cu zeidah a si kun? Zumtu vialte hna hmelchunhnak caah peekmi holh thar cu biachia a chimi nih khan, Jesuh dawtnak bia thar an chim lai. Lih chim a hmangmi nih khan an caah bia thar a simi bia hman an chim cang lai tinak a si. Khikhi cu Thlarau thilpek 9 lak i 1 kha a si lo. Zumtu vialte peek dihmi a si.

3. HOLH DANG (OTHER TONUGES) (1 kOR. 12, 13, 14)

Pathian nih Thiang Thlarau laksawng ah zumtu cheukhat (zumtu vialte an si lo) a rak peekmi asi. A tingco mi an rak um. A tingco lo mi zong an rak um.

Hold dang cu miphun dang holh in Thiang Thlarau nih biachim khawhnak a rak peek hna. Cucu zumlotu nih an hmuh i an theih tikah an khuaruah a rak har tuk i zumh khawh nak caah an rak hman mi holh a rak si. Zumlotu hna ca i zumhkhawhnak caah hmelchunhnak (sign)a rak si. Dididedefufu ticu kuaruahhar ding pakhat hmanh a um lo. Zumlotu hna caah hmenchunhnak zong a si fawn lo.

Holh dang Thiang Thlarau thilpeek cu Pathian sin i thlacamnak le biathup chimnak ca zongah an rak hmanmi a si. dididede-dada tiin Pathian cu chawnh khawhmi a si lo. Pathian zong nih dididede-lala tiin minung a kan chawn bal fawn lo.

Pathian nih minung sin i ai phuannak (divine revelation) kha ai phuan dih i cu ai phuan nak cu Baibal ca i record an tuah dih hnu ahcun zumtu hna cu Baibal kha kan lam hruaitu asi cang (2 Tim. 3: 16). Pathian nih minung hna sinah bia a chim ai dinh i minung hna hngalhnak a kan peek ti lo hnu cun Prophet zong Pathian nih a hmang ti hna lo. Israel ram zongah prophet an um ti lo. Laimi lak lawngah prophget ka si ai timi a zaa in an um. Cu prophet hna an dih rualrual cun Thiang Thlarau laksawng holh dang i holh khawhnak zonmg cu a dih ve cang (1 Kor. 13: 8-13). Cucaah kan ram pentecostal pawl vialte nih an i bochan ngaimi holh dang cun atu ah a holh khomi an um ti lo. Anmah nihcun a dih rih lo an ti nain Thing Thlarau nih a peek ti hna lo caah Kawl holh, English Greek le Korea holh an cawn nakah an thi deng.

4.  HOLHTHEIHLO

Holhtheihlo hi Greek Baibal ah a um lo. Paul nihcun Greek holh in Baibal a rak ttial. paul ttialmi ah ai tel lo. An i leh palhmi Baibal lawngah a um. Cu lehpalhmi Baibal ai tlaih mi hna cu mi vanchia an si i cu hna nihcun holhtheihlo cu zeidah a si ti an hngalh lo caah anmah nih an ser chom i an lih in an holh. Acheu nih hla in an sak i mipi an rock ter hna. Baibal i a um lo zongah a poi an ti lo. Cu anmah nih a phuah chommi holhtheihlo cu Pathian Thinag Thlarau thil peek a si an ti. An poi nakcu chimh fian zongah an duh hlei lo. Ahman lo ti an theih buin an ttanh chih.

Credit: Aung Myint Thang

Be First to Comment

Leave a Reply

Your email address will not be published. Required fields are marked *