Yaw tualchung hriamtlai phu (YPDF) nih hriamthil an chiahnak hmun cu July 31 ahkhan a kaang i, Ks. sing 300 leng man kan sung, tiah nihin August 15 ah YPDF nih cathanh an chuah.
Hriamthil sernak ah hmanmi zen cu a linh tuk ruang ah mei kanghnak a chuak i, cu mei kanghnak ruang ah hriamtlai phu lei hliamhma tuar mi cu an um lo, tiah an langhter. Mei kanghnak a chuah ruangah phaisa fang in Ks. sing 40 leng, cycle, laptop, dynamo, zen phun tampi le zeidang thilri, Ks. sing 300 leng man kan sung, tiah an langhter.
Mizapi nih bawmhnak nan pekmi le nan hlutmi phaisa hna cu a lak in kan sungh caah mizapi nan cung ah ngaihthiamnak kan in nawl hna. Hmailei ah hi bantuk sunghnak a chuahsual ti nakhnga lo ralring tein kan ṭuan cang lai, tiah YPDF nih an langhter. An sunghmi thilri cawk ṭhan nakding ah mizapi bawmhchanh halnak zong an tuah.
KNU Le SAC Ralkap Kahdohnak Ah Palik Bawi Pakhat Le SAC 10 Hrawng an Thi I, Hriamthil Zeimawzat An Lak: Nihin August 15 zinglei, Karen ramkulh, Kawkareik(ကော့ကရိတ်) khuachung kahdohnak ah SAC palik bawi pakhat tel in SAC ralkap 12 an thi i, minung pahnih cu an nung in an tlaih hna. AK meithal pakhat le meithal dang 5 zong kan lak khawh, tiah KNU nih cathanh an chuah. “Minung pahnih cu an nung in kan tlaih hna i, cu chung ah pakhat cu law officer a si, pakhat cu zung rianṭuanmi a si,” tiah an langhter.
Nihin August 15, zinglei suimilam 10:30 hrawng ah Kawkareik(ကော့ကရိတ်) khuachung palik sakhan cu KNU nih an luhhnawh hna i, kaphnih kar kahdohnak minutes 15 hrawng a chuak. Cu hnu ah Kawkareik(ကော့ကရိတ်) SAC ralkap umnak 97 hmun lei nih khua pawnghrawng cu hriamngan in an kah. SAC ralkap 100 leng nih rallam sial in, khualeng ah hmunhma an lak, tiah tualchung mi nih an chim. Credit : The Chin Post
Leave a Reply