Khin U Ah SAC Ralkap Pakhat Cu A Hriamnam He An Tlaih: Sagaing ramṭhen, Khin U peng nichuah lei ah SAC ralkap Thu Ying cu a hriamnam he nihin August 25 ah kan tlaih, tiah Khin-U Dynamite Squad in ṭuanvo ngeitu pakhat nih Media ah a chim.
“SAC ralkap pakhat cu a kalnak lam aa palh caah, atu bantuk in a hriamnam he kan tlaih, atu ah cun ṭuanvo ngeitu kut ah kan pek cang hna,” tiah ṭuanvo ngeitu nih cun a chim.
A hriamnam he tlaih a tongmi SAC ralkap cu August 25, chunhnu suimilam 1:00 hrawng ah tualchung hriamtlai phu Khin-U Dynamite Squad, Yaungni(ရောင်နီ) pah-kah-phah, Nayahpaṭih(နယပတိ) phufonh nih an tlaih, tiah theih a si.
thawngpang dang relchap : Sagaing Le Magway Ramṭhen In Thla Hnih Chung ah PDF Chungtel 80 Leng Thah An Tong
Tualchung mipi le media hna nih thawngthanhnak an tuahmi le RFA nih cazin an khomhsuatmi cazin ning ah 2022, July in August tiang thla hnih chung ah, Magway ramṭhen le Sagaing ramṭhen chung ah PDF chungtel 81 thah an tong, tiah theih a si.
PDF hna cu an umnak hmun ah thah an ton lawng siloin, a nung in an tlaih hna i ralphaw ah hman hna, an hrem hna i an thah beh hna. Mizapi nih ṭihnak ngei hna seh ti in uk an i tim, tiah NUG chimphuannak nawlngeitu U Kyaw Zaw nih a chim.
Magway ramṭhen le Sagaing ramṭhen chung ah tualchung hriamtlai phu hna le SAC ralkap kahdohnak a chuah ah, tualchung hriamtlai phu lei in minung thazaang le hriam thazaang der deuh tawn caah a thimi an tam khunnak a si. SAC ralkap hna zong nih PDF ti an theihmi poh cu an thah hram hna, tiah a chimchap.
Khua pakhat nih PDF lungtlinpinak a ngei, tiah SAC ralkap nih thawngpang an theih lecangka in khuachung ah PDF an um le um lo hlathlainak tuah hmasa lo in a khua ning in a khangh. Cucu ramchung ramleng upadi nih cohlan khawhmi dirhmun a si lo, tiah Bu Htan Htun nih a chim.
SAC chairman general Min Aung Hlaing le chimphuan nawlngeitu general Zaw Min Htun nih cun khuate lei inn a khangtu cu SAC ralkap an si lo, tiah voi tampi an i pheh. SAC chairman general nih cun hramhram thilsual tuahtu PDF hna cu hramhram in doh an hau ko, tiah August 1 ah a rak chim ve.
2022, June 6 in July 29 tiang ah phungning tein SAC ralkap ah a lutmi PDF chungtel pa 156 le nu 49 tiin an dihlak minung 205 an si, tiah nai ah tuahmi thawngfianternak hmun ah SAC chimphuannak nawlngeitu general Zaw Min Htun nih a chim.
SAC nih cazin langhter ning ah hriam a chiatu hna tiah PDF cazin an langhter mi ah Ayeyarwady ramṭhen in a tambik an si i, Magway ramṭhen, Sagaing ramṭhen, Yangon ramṭhen, Chin ramkulh le Karen ramkulh hi an tlawmbik tiah an langhter. Credit : The Chin Post
Leave a Reply