Myanmar Now Thawngzamh Nih “The Confederation” Timhlamh Nak Kong Biahal Nak An Tuah Mi Ah “AA” Nih A Leh Mi!
ULA/AA nih aa timh mi policy cu The Confederation hi a si. Kan Kawlram sining he The Confederation hmuh (ngah) a tlak mi kan si timi hi AA nih kan fehter mi cu a si. Cu bantuk in The Confederation hmuh (ngah) kan i tlak tiah kan chim tikah zeibantuk cozah sin hmanhah cu “The Confederation” cu kan hal lai lo. A Hal zong kan hal lo (Hal zong kan i timh lo).
Chim duhnak cu kan mah tein kan doh lai, kan mah tein kan hmuh lai. Doh in The Confederation cu kan hmuh lai. Kahdoh in kan hmuh congah lai (Hal a bawh mi kan si lo). Kan duh herh mi pawl cu mipi he i bomin le kut i tlaih in a ngah, ngah ding bakin tlam kan tlin ter lai. Kan mah duhherh mi goal tung cu, kan mah i kan zulh mi lam lawnglawng a zul mi phu kan si. Kan mah i kan goal tung lawngah a kal mi phu kan si .
Zeibantuk minung nih kan cohlang hna seh. Zeibantuk minung nih kan cohlang hna hlahseh, kan mah nih cun i remhsiam (Remnak siam) a ngah ah cun a tha bik kan ti. Khat lei le khat lei in a thi-tlau i, i theihthiamnak a tlawm deuh ah, i remhsiam (Remnak siam) a ngah a si ah cun, i remhsiam (Remhnak siam) a si ko lai.
I remhsiam (remnak siam) a ngah lo i, an duh lo a si ah cun kan mah lei nih kahdoh a herh ah cun kan kah ko hna lai, Mah cu a si ko. A biapi bik mi cu kahdoh a herh ah cun kan kahdoh hna lai. Remnak siam a herh ah cun remnak kan siam lai. Kan mah i kan zulh mi lam (kan i timhmi policy) cu kan mah nih kan hnatlak mi, le kan mah i Rakhita lam ningin kan thisa he hmai kan fong (kal) ko lai i,
Kan mah nih kan duhherh mi goal tung cu kan mipi hna he a ngah, ngah ding bak in hmai kan fong (kal) ko lai. Zeibantuk bomhnak hmanh um hlah hmanhseh hmai ah kan fong (Kal) chunchin ko lai, Cu cu a biapi bik mi a si.” tiah bia lehnak a tuah. Note-A tu kan mah Chin ram dohthlennak a tuah mi phu he cuai vun thlai chunh ve tuah aa dang ngai ngai.
Rakhine ralkap nih cun NUG zong aa bochan bak lo hih. Zeibantuk bomhnak zong kan herh lo ti a si ko. Kan mah zulhphung kan kal pi ning in kan kal ko lai ti bak a si ko hih. Confederation Uknak zong zeibantuk cozah a kai zong ah kan hal hna lai lo, kahdoh in kan congah hmuh lai ti bak a si ko hih. Hi bantuk policy hi an Chin hriamtlai phu nih kan i cawn ve ding a si. AA nih cun Kawl pawl nih tlangcung mi kan duh herh mi cu Hal in cun an kan pee duh lai lo timi cu 100% bak an i fiang ko hih.
AA cu AA ralkap a rak dirh hlan ah an ram mirum pawl an len hmasa hna.An ti khawh tawk thawh rikhiah in phaisa an thawh. Malysia um mi nih 100ks a thawh ah cun Thailand a um mi nih 100ks a thawh ve. U.S a um mi a si ah cun tamdeuh an thawh. Malaysia a um mi a si ah, Thailand a um mi a si ah, U.S a um mi an si ah, a si kho deuh mi nih AA caah tam deuh an thawh. A si nain a tho lo mi cu an um ve ko lai ta a phung a si.
Kan thawnhnak hnga ding a si ah cun an ti i, an duh ah cun thatlonak thil zuar zong an tuah ko, Ho hmanh nih sual an phaw hna lo. An phawt hna zong ah an zei poi hlei lo. AA nih cun kan duh mi cu thuhdent cungin an ka pee duh lai lo tiah an i fiang. Mipi zong nih an dirhkamh hna, a dirhkamh lo mi cu um phung a si ko kaw. Cun bantuk cun AA caah phaisa an thawh caah, zei maw caan kar SAC ralhrang nih hramhram in uknak an laak hnu in cun an thawng tuk cang. AA ca’h zongah tlang an au len lo.
Kan nih Chin mi cu a si lo, kan ralkap pawl an mah thawnnak hnga ding ca’h a si zongah thilthalo tuah hna seh, mipi kan zai lai ning. Thil a hme tete an tuah sual hmanh ah an thangchiat kan zar. Chinland Club zong cu ngeih a si ko nain, phaisa a thawk hnga ding tluk minung nih kan rak thawh lo ti usih law kan palh lai lo dah.
Phaisa kan thawh deuhdeuh ah kan hmursau, mi kip kan veng. kan mah cio Kan rian a si ti kan i hngal lo. SAC ralhrang nih hramhram in uknak an lak hnu, a tu lawng ah hriamnam a biapit zia mipi nih kan i fiang hihi cu phehawk a tha lo. Hriamnam a biapi zia kan i fiang hnu ah cun kan Kee hram ah kan ral nih an kan pah cang. Kan i sersiam manh ti lo.
A hram thawk tein hriamnam a biapit zia mipi nih rak i fiang hna usih law, a tu ah cun hitluk tiangin tlangau len zong kan hau tuk hnga lo, Kan ralkap an thawng tuk cang lai. A tu ah cun hriamnam zarh zong a har cang. Chin mi mipi kan lumgfim kan tlai tuk sual deuh vak. Phaisa kan bomh hna hmanh ah hriamnam cawknak caah kan ti, an tlun kalnak le an eidin tukmaktek caah kan ruat piak hna lo.
A sinain mipi kan lungdong rih hlahseh, i sersiam caan a tang rih ko. Mipi nih kan ralkap pawl hi dirhkamh peng hna usih. Kawl pawl nih kan duh mi cu thudent cung, hal in an kan pee duh lai lo timi hi i fiang hna usih. Kan mah kutkee tein kan ralkap pawl dirhkamh hna usih. Miphun dang Kawl pawl kan i bochan hna karah kan caan nih an liam tal sual lai, phan a um. Cu caah kan Chin ralkap an thawnnak hnga ding cu mipi kan si. Kan nih Chin mi zong ka holh-phung i dang ko hmnahseh Chin (Lai) ah miphun khat kan si timi hi i tlaih hna usih.
Leave a Reply