Thailand Ram Tuhmawng Lak Ah Phung Ning Loin A Lutmi Myanmar Rammi 24 Tlaih An Tong

Thailand ram, Tak pengkomh tupi chung ah puaisa(agent) nih a kaltak mi hna Myanmar rammi 24 cu nizan August 29 zinglei ah kan tlaih hna, tiah Thailand nawlngeitu nih cathanh an chuah. Tupi chung ah meiceu kan hmuh i, kan va kalhnawh tikah aa hngilhmi Myanmar rammi 24 cu kan hmuh hna, tiah an langhter.

Tlaih a tongmi hna nih cun, “Kan agent nih motor in ka’n laak hna lai, rak ka hngak rih u a kan ti. Don caan a tling cang ko nain atu tiang a kan dong hlei lo,” tiah an chimnak cu Thailand news hna nih an langhter.

Tlaih a tongmi hna hi Yangon, Myawaddy, Taungngu, Mawlamyaing, Pathein, Pago, Rakhine le Naypyidaw in a rami an si i, Myawaddy khua ah aa tongmi an si, tiah theih a si.

Tlaih a tongmi hna cu Bangkok ah rianṭuan ding in a kalmi an si i, agent cu Baht 20,000 in 25,000 tiang an pek. Cheukhat cu an kal hlan zong ah a pe cangmi an um i, cheukhat cu Bangkok phanh hnu in a pe ding zong an um ve. Asinain, an agent nih a hlen hna i, a kaltak hna, tiah theih a si.

Myanmar rammi 24 cu Thailand ram nawlngeitu hna nih eidin ti le rawl an pek hna i, Meyamat(မဲရမတ်) palik sakhan ah an kalpi hna. Upadi ning in dan kan tat hna lai i, an agent zong tlaih ding in kan kawl lai, tiah Thailand palik nih cathanh an chuah. Credit : The Chin Post

Be the first to comment

Leave a Reply

Your email address will not be published.


*