YouTube aiawhtu Mtube Platform cu a rauh hlan ah hman a si cang lai tiah SAC nih a chim. Muicawl (video) pawl zoh khawhnak Platform a simi YouTube aiawh ah ramchung Myanmar rammi hna nih an tuahmi Mtube cu hman chunh a si cang tiah SAC nih September 2 ah a thanh.
A rauh hlan ah hman khawh a si cangnak zong kha kan thanh than te lai tiah a chim. SAC nih Myanmar rammi nih a tambik hman a simi Facebook aiawh ah Social Platform pakhat kan ser lio a si tiah SAC biachimnak nawl a ngeitu General Zaw Min Htun nih media pawl sin ah a rak chim.
SAC a dohtu phu pawl nih Digital Strike an tuah i Facebook, YouTube pawl chung i click tuah in Fund kawlnak pawl kha tlaih aa zuam caah atu bantuk in a tuah hi a si tiah an ruahdamh.
August thla chung Karenni ram kahdohnak ah SAC ralkap 40 an thi, ralkap 4 CDM an tuah: Karenni ram August thla chung kahdohnak ah SAC ralkap 40 an thi i ralkap 4 CDM an tuah tiah KNDF nih September 1 ah a thanh.
August thlakhat chungah SAC ralkap pawl nih Pharuso khua in Demoso khua le Loikaw khua tiang tlaih an i zuam i Demoso peng le Pharuso peng hna ah ralkap an samh. Cucaah August 22 ah Demoso peng thetse tlang pawngah a kalmi SAC ralkap le KA, KNDF battalion 10 hna 15 mins hrawng kahdohnak a rak chuak.
Cubantuk in Demoso peng, Thaesulay khua chungah hmunhma a khuarmi SAC ralkap pawl cu KNDF battalion 5 nih an va kah ve hna. Cu kahdohnak pawl ah SAC ralkap a thimi an um tiah KNDF nih a thanh.
August 24 ah Ngwetaung hrambunh Infantry 102 sakhaan pakhat cu KA le KNDF battalion 10 nih an kah hna i SAC ralkap 3 an thi. August 26 zinglei zongah Sanpiah khua pawng tlang cungah hmunhma a khuarmi SAC ralkap pawl cu KNDF battalion 9 nih an kah hna i SAC ralkap 1 a thi, a hliammi zong an rak um.
August 25 le 27 zongah Bawlakhe peng Matsalaung tlang cungah hmunhma a khuarmi SAC ralkap pawl cu KA le KNDF battalion 16 nih an va kah ṭhan hna i SAC ralkap 4 an thi. August 29 zongah Bawlakhe peng Pun tiva hlei pawng SAC ralkap sakhaan cu KA le KNDF battalion 21 nih an kah hna. Cu kahdohnak ah SAC ralkap 2 an rak thi.
Shadaw peng, Punchaung khua pawng i SAC ralkap sakhaan cu KA le KNDF battalion 14 nih August 27 ah chunitlak deng an kah i SAC ralkap 3 a hmun ah an thi. August 30 ah Pekon peng, Pungpin le Loiwai khua pawng i SAC sakhaan cu KNDF battalion 3, SSRY le PKPDF phufonh nih an kah hna i SAC ralkap 3 an rak thi.
Karenni ram August thla chungah kahdohnak a tlawmbik voi 46 a chuak i SAC ralkap 40 an thi, 25 an i hliam tiah KNDF nih a chim. SAC ralkap nih vanlei kahdohnak voi 8 a tuah i bom lung 32 mipi umnak sang ah a thlak.
SAC ralkap i vanlei kahdohnak le hriamngan ruangah mipi 5 an thi i 15 an i hliam. Thlakhat chungah sii chiahnak inn 1, mipi inn 9, pura 1 a rawk tiah a langhter. August thla a hnu bik zarh ah SAC ralkap 4 KNDF sin ah CDM an tuah tiah KNDF thawngthanhnak in theih a si. Credit: The Chinland Post
Leave a Reply