Tamu Ah Thah A Tongmi India Mi Pahnih Ruak Cu Kan Khangh Cang – SAC!

Tamu Ah Thah A Tongmi India Mi Pahnih Ruak Cu Kan Khangh Cang – SAC!: Sagaing ramṭhen Tamu ah thah a tongmi India ram mi pahnih hna ruak cu July 6 zinglei ahkhan kan khangh cang hna, tiah SAC ralkap lei chimphuannak nawlngeitu general Zaw Min Htun nih July 7 ah a chim. India rammi thah an tonnak kong ah pehtlaihnak a kan tuahtu an um lo caah an ruak cu kan khangh, tiah general Zaw Min Htun nih cun fianhternak a tuah.

Ruak kan khangh hnu July 6, chunhnu lawng ah India, Manipur ramkulh Moreh ummi, ramri ah thilphorh rian a ṭuantu hna phu in ṭuanvo ngeitu pakhat nih a kan pehtlaih i, thah a tong mi hna cu India ram mi an si kong a kan chimh, tiin a chimchap.

Thah a tong mi India rammi pahnih hna ruak cu SAC ralkap nih India lei an pek hna lo caah July 6 ahkhan Moreh mipi minung 200 leng nih duhlonak langhter in India-Myanmar ramri palik gate pakhat zong an khangh. July 6, Tamu-Moreh ramri lakphakti dawr cu Moreh khuami nih an kharter hna ruangah buainak tlawmpal a chuak i, Myanmar rammi 2 nih hliamhma an tuar, tiah theih a si.

India rammi pa pahnih cu Tamu khuachung ah July 5 chunhnu ahkhan SAC kuttang Phusawṭi nih meithal in an kah hna i, an nunnak a rak liam. Hilio ah SAC chimphuannak nawlngeitu general Zaw Min Htun nih cun India mi pahnih a thattu cu PDF an si kho, tiah a chim ve.

Manipur ramkulh Tengnoupal pengkomh uktu(District Commisioner) nih cun a herh tuk mi a um lo ahcun India mi cu Myanmar ram lei ah kal lo ding in le, kal a herh ahcun anmah he aa pehtlaihnak hmun i nawlngeitu hnatlaknak laak hnu lawng ah kal ding a si lai, tiah July 6 ah hnawhnam ngai in cathanh a chuah. Moreh khuachung ah July 6 thok in rikhiah um lo in mibu um le a phuphu in umkalnak nawl cu Tengnoupal DC nih caan karlak a phih chung, tiah theih a si. Credit : The Chin Post