Sagaing ramṭhen le Magway ramṭhen aa tonnak hmun, ni li chung kahdohnak ah SAC ralkap 13 an thi

Sagaing ramṭhen le Magway ramṭhen aa tonnak hmun, ni li chung kahdohnak ah SAC ralkap 13 an thi i tualchung hriamtlai phu lei in ralkap 4 an nunnak a liam, tiah PRA nih nihin August 26 ah cathanh an chuah.

August 20 in 23 tiang fak ngai an i kap i, SAC ralkap lei nih vanlei kahdohnak zong an tuah, tiah theih a si. “SAC ralkap hna he kan i kahnak ah atu tan hi hliam faak bik kan ton tan a si,” tiah PRA hruaitu Bu Japan nih a chim.

Hmunram a himnak ding ah tiin kahdohnak hmunram hna cu PRA nih an langhter rih lo. Cun, atu tiang ah kahdohnak a fak ngai rih, tiah theih a si. August 20 thawk in PRA nih cawlcanghnak an tuah caah Sagaing ramṭhen, Pale le Magway ramṭhen Myaing peng a tonnak hmun ah SAC ralkap nih helicopter 4 in minung thazaang 100 an leng chap i, rallam an sial.

SAC ralkap nih rallam an sialnak caah Myaing peng aa tonnak hmunram khua 8 leng in tualchung mi 4,000 hrawng cu ralzaam dirhmun an phan, tiah theih a si.

Be the first to comment

Leave a Reply

Your email address will not be published.


*