Rakhine ramkulh, Taungkok(တောင်ကုတ်) peng, Chaungthonegwa(ချောင်းသုံးခွ) khua lei ah nihin August 25 zaanlei suimilam 4 hrawng ah Arakan Army(AA) le SAC ralkap kar minute 20 tluk hrawng kahdohnak a chuak, tiah theih a si.
“SAC ralkap hna cu kan sakhan lei an ra ti thawng kan theih caah kan bawh hna i kan kah hna, SAC ralkap 14 hrawng an thi i, kanmah lei hliamtuar an um nain an hliam kong ah thinphan ding um lo,” tiah AA nih thanh.
Kahdohnak a chuahnak hmun cu Taungkok khua in meng 10 hrawng a hlatnak hmun ah si. Cu ka pawng um mi Kyautkyat (ကျောက်ကျပ်) khua ah cun SAC ralkap thazaang 100 hrawng cu umhmun an khuar, tiah theih a si. Kahdohnak a chuahnak kiangkap khua hna cu SAC ralkap nih khua chuahtak ding in nawl an pek hna, tiah theih a si.
Yee Peng, Yee Hlei Checkgate Cu PDF Nih An Kah Caah SAC Ralkap 9 An Thi!: Mon ramkulh, Yee peng, Yee hlei checkgate cu nihin zing suimilam 10 le cheu hrawng ah tualchung hriamtlai phu pakhat si mi Yee Bi Lu (ရေးဘီလူး) PDF nih an kah, tiah theih a si. Cu kahdohnak ah cun SAC ralkap 9 an thi i, hliamhma tuar zong an tam, tiah Yee Bi Lu hruaitu pakhat nih a chim.
“An checkgate cu kan lak khawh i, thilri zong zeimawzat kan lak, checkgate cu hrawhhralnak zeihmanh um loin amah ningte in kan kaltak, tiah a chim chap. Cu kahdohnak ah cun tualchung hriamtlai phu lei hliamtuar um lo in hnu an tolh, tiah theih a si.
Leave a Reply