R.I.P : Miphun Dawtu Pasaltha Nih Ram Le Miphun Caah Nunnak A Pek Than

Karen ramthen, Myait-Wa-Di le Kawkaraih lamthluan, (မြဝတီ-ကော့ကရိတ်အာရှလမ်း) Asia lamcung kahdohnak ah KNU/KNLA pasaltha pakhat cu tuchun ah khan a nunnak liam tiah thawngtheih asi.

KNU/KNLA le Gya Thit ralkap hna phu fonh nih kawl ralhrang pawl cu Nizan August 18 khan fak ngaiin an kahdoh hna i kawl ralhrang pawl an umnak Kuan Chian Kung, Ryit Kay Htu le AK gate cung ah a ummi Kyun Pyin Kung ralhrang sakhan 355 cu KNU/KNLA le Gyia Thit phu fonh nih an luh hnawh hna hi asi.

Nizan ah KNU/KNLA nih an kahdoh mi kawl ralhrang hna sakhan le gate pawl hi aren ramthen, Myait-Wa-Di le Kawkaraih lamthluan pawng bakah a ummi an si hna i KNLA le Gya Thit ralkap hna caah tihnung ngaimi an si hna caah nizan zinglei suimilam 5 :40am in tuchun tiang kha faktuk in kahdohnak cu pehzulh in a chuak tiah theih asi.

Nizan in tuchun tiang an i kahdohnak ah hin Kawl ralhrang leiin ralbawi telh chih in minung 13 cu an thi cang i hliamtuar cu an tam ngai nain fiang tein theih khawh an si lo tiah an langhter.

Cun KNU/KNLA le Gya Thit phu fonh leiin Gya Thit ralbawi cu ralhrang sniper in tuchun ah khan a nunnak liam tiah thawng theih asi.

THAWNGPANG DANG RELCHAP : Ngatayaw Khua Cu SAC Ralkap Nih An Khangh Caah Inn 500 Leng An Kaang Cang!

Magway ramṭhen, Yesagyo peng, Ngatayaw khua inn 600 hrawng umnak cu SAC ralkap nih an khanghpiak hna caah inn 500 leng a kaang. Khuami hna cu a rannak in bawmhchanh an herh ko, tiah Yesagyo peng tualchung hriamtlai phu Yesagyo PDF chungtel Wai Kyi nih mipi sin ah a chim.

SAC ralkap le pyusawhṭi hna cu August 17 ah rak lut in, Yesagyo peng, Ngatayaw(ငတရော်) khua ah cun umhmun an khuar, inn 600 hrawng umnak khua cu a khuapi ning awk in an khangh, tiah theih a si.

“Ngatayaw khua ah cun nihnih chung an caam i, cu hnu ah khuachung in le lo cu an khangh. Thilri zong zeihmanh a taang lo, an ciam dih. Caw, rang, innzuat saṭil hna zong mei nih a kangh dih hna. Chungkhar 500 renglo cu umnak an ngeih ti lo caah, ralzaam sakhan ah an um hna,” tiah PDF chungtel Wai Kyi nih a chim.

Ralzaam dirhmun in a ummi Ngatayaw khuami hna cu Yesagyo peng tualchung hriamtlai pah-kah-phah phu nih eidin tirawl an rin chung hna, tiah theih a si.

Be the first to comment

Leave a Reply

Your email address will not be published.


*