Paletwa Peng Ah Nu Pakhat Cu Bomb Lamhsualnak In A Nunnak A Liam! SAC ralkap le AA kar kahdohnak a chuahnak Paletwa peng, Abaungta (အဘောင်သား) khuami pakhat U Khine Aye cu August 21 khan a tlau i, a nupi Daw Nan Laung Kham nih a va kawlnak hmun ah bomb lamhsual in a nunnak a liam, tiah theih a si.
A pasal U Khine Aye cu August 21 ah khan ramlak ah rua-tuai kawl ding in a kal i inn a hlam ti lo, tiah theih a si. Amah cu Abaungta (အဘောင်သား) khua siangniamrun ah sianguk a si. Daw Nan Laung Kham, kum 43 a nunnak a liam kong hi nihin August 24 zinglei ah khuami pakhat U Ko Aung nih a chim.
Nunnak a liam mi Daw Nan Laung Kham ruak cu zinglei suimilam 8:00 hrawng ah khua he tlawmpal aa hlatnak hmun tiva ral lei ah khuami nih an hmuh.
“Khua leng i tiva ral lei ah a ruak cu kan hmuh i, a pasal tu cu zarhpini zaanlei suimilam 3:00 hrawng ah lo a kalnak in inn a hlam bal lo caah a nupi nih thinphang in a va kawl. Khuami zong nih kal lo ding in an kham ko nain a duh lo. A pasal a kawlnak ah bomb i hliamhsualnak in a nunnak a liam,” tiah U Ko Aung nih cun a chim.
Bomb i hliamhsualnak in nunnak a liammi Daw Nan Laung Kham cu a kee pahnih in a bul i, a takpum le a kut ah hliam fak ngai a pu, a tlaumi U Khine Aye cu hmuh a si rih lo, tiah a chimchap.
Nunnak a liammi Daw Nan Laung Kham nih cun a vapa leng ah sianglairun kai lio mi fapa pahnih le kum 6 mi fanu pakhat a tantak hna, tiah theih a si.
Thawngpang dang relchap : Sithu Ko Ko Le A Nupi Thah An Tonnak Kong Ah Tualchung Hriamtlai Phu Nih Ngaihthiam Halnak An Tuah
Mandalay no.30 le no.57 lamkam ah nizaan August 23, zinglei ahkhan Ko Sithu Ko Ko le a nupi Ma Hnin Wai Hlaing cu minung i palhsual in, tualchung hriamtlai phu nih an kah sual hna caah an nupa in an nunnak a liam. Hi kong he pehtlai in Tiger Force Mandalay nih mizapi le fahnak a tuartu chungkhar sin ah ngaihthiam halnak an tuah.
Tiger Force Mandalay phu in ṭuanvo ngeitu Bu Lah Yaung nih nihin August 24 ah nawlnak cathanh a chuah. Cu cathanh chung ah cun CID palikbawi Soe Ko Ko a rianṭuannak kong cu a thli in thawngpeknak a um i, hlathlainak tuah tik ah a dik ko ti theih a si caah cawlcanghnak tuah a si. Tualchung hlathlaitu hna thazaang dernak le i palhnak ruang ah minung cu i palh in, kah sual an si caah kan lung a ṭha lo ngai, tiah an langhter.
Nunnak a liammi hna cu kah an timhmi palik bawi siloin Hotel rianṭuantu nupa an si, tiah cawlcanghnak tuah khawh hnu in kan theih ṭhan, tiah an langhter. CID palik bawi Soe Ko Ko cu a tlau i, a chungkhar he zong pehtlaihnak an ngei lo, tiah theih a si. Cucaah thil sining ṭha tein kan check hlat ko tiah an thanhmi ah cun an langhter chih.
Tualchung hriamtlai pah-kah-phah phu lei nih ṭuanvo lak ding kan si, kan i palhnak cung ah le minung 2 nunnak a liamnak kong ah mizapi le chungkhar sin ah zaangfah ngaihthiam halnak/nawlnak kan langhter. Kan palhmi thil kong ah sualphawtnak zong kan in lai, tiah an cathanh chung ah cun an langhter.
Leave a Reply