PDF Zoland Nih Hlawhtling Te In Drone An Ser Khawh

Chin Ramkulh, dohthlennak a tuahtu hriamtlai phu pakhat a si mi Zomi Federal Union (PDF-Zoland) nih hlawhtling tein raltuknak Drone kan ser, tiah August 9 ah khan an thanh. A rihzan 12kg in 15kg tiang a phur kho mi a si i, budget a tlawm ruang le battery lei tlamtlin lo ruang ah meng 9 tiang a zuang kho, tiah PDF Zoland in chimphuannak nawlngeitu pakhat nih a chim.

Drone sernak ah phaisa a dihmi cu Drone a hmetngan cung ah aa hngat. A cawk in cawk ah cun 15kg a phurkhomi hi Ks. sing 90 in sing 100 kar a dih tawn nain kanmah tein kan ser caah sing 20 lawng kan dih, tiah PDF Zoland in ralkap pakhat nih a chim. ZFU/ PDF Zoland Engineering & Innovation in, Mi ngiathlainak Drone, Raltuknak Drone le Thilphurhnak Drone tiin phunthum an serchuah cang i, hriamtlaitu dang sin zong ah bawmhnak an pek cang hna, tiah theih a si.

Meng 100, 400 le 500 tiang a zuang i a rak kir ṭhan khomi zong kan serthiam ko nain budget lei kan tlamtlin rih lo ruangah atu bantuk in kan budget he aa tlakning in meng 9 tiang a zuang kho mi lawng kan serchuah rih, tiah PDF Zoland in chimphuannak nawlngeitu nih cun a chim chap.

RELCHAP – Bhamo Khuachung Hmun Thum Ah Puahkehnak A Chuak, Minung 4 Nunnak A Liam!: Kachin ramkulh, Bhamo (ဗန်းမော်) pengkomh Bhamo khuachung cozah zung, palik umnak inn le Innwa bank pawnghrawng ah nihin August 10, zinglei ahkhan puahkehnak a chuak i, minung 4 cu SAC ralkap nih an kahthah hna, tiah theih a si.

“Zung kai caan, zinglei suimilam 11:00 hrawng ah cozah zung hmun, cycle chiahnak pawng ah puahkehnak a chuak, Puahkehnak ruang ah cun cycle 5 an kang i, a kangmi cycle hna cu meithat motor nih ti a kah lio ah, SAC ralkap nih puahkehnak a chuahter khotu thilri a kengtu minung 4 cu an kahthah hna,” tiah tualchung mi nih an chim.

Cozah zung pawng i puahkehnak a chuah hnu tlawmpal a rauh ah palik umnak sakhan le Innwa bank pawng ah puahkehnak a chuak ṭhan, tiah theih a si.

SAC Ralkap Vanlawng Oil Phortu Motor Hna Cu PDF Nih Bomb An Puahhnawh I, Ralkap 2 An Thi: Sagaing in Monywa lei ah a kalmi SAC ralbawi motor le vanlawng oil phortu motor hna cu nihin August 10 ah voi hnih tiang bomb kan puahhnawh hna i, SAC ralkap 2 an thi, tiah Moe Nyo Revolution Force (M.N.R.F) nih cathanh an chuah.

Tu zaanlei suimilam 4:00 hrawng ah Kanphiazayat(ကန်ဖျားဇရပ်) le Htisaung(ထီးဆောင်း) kar ah SAC ralbawi nih zulhmi motor cu bomb lung 5 kan puahhnawh hna. Zaanlei suimilam 5:00 luan hrawng ah, Kanphiazayat (ကန်ဖျားဇရပ်) le Htisaung(ထီးဆောင်း) kar ah vanlawng oil phortu SAC ralkap motor 2 cu bomb lung 10 kan puahhnawh ṭhan, tiah Moe Nyo Revolution Force (M.N.R.F) nih an thanh.

Cu kahdohnak cu Moe Nyo Revolution Force (M.N.R.F), PENTAGRAM , People’s Guerillas Commando – Myinmu le PEOPLE REVOLUTION FORCE (P.R.F) phu li fonh nih an doh hna, tiah theih a si. Credit : The Chin Post

Be the first to comment

Leave a Reply

Your email address will not be published.


*